Pan 28 reh enero reh 2021, reʼ Tribunal Supremo reh Corea del Sur xuqʼor chi maʼ mahk ta chi jenoʼ maʼ ne ta iraaj ojik pan tijinik reh qʼaqʼinik ruum chi ajnimaneel. Yuʼnaak reʼ taqeh testigo reh Jehová i xiwihʼik pan qʼaqʼinik noq ko maʼ aj nimaneel ta taqeh, maʼ ne ta chik kitaqʼabʼjik prexo mi maʼ inkaaj ojik pan tijinik reh qʼaqʼinik.

Ar Corea del Sur, chuʼnchel taqeh i winaq xiwihʼik pan qʼaqʼinik nakikʼulum kitijinik reh qʼaqʼinik. Nakibʼanam i wilih chuwach waxaqiibʼ haabʼ. Jeʼreʼ noq, reʼ taqeh Testigos xiwihʼik chi soldado kiqʼorobʼjik woʼ naq taqeh reh i tijinik, eh noq inkiqʼor chi maʼ inkaaj taj, kiyeʼarik naq taqeh prexo . Jenaj ehtalil, jenaj hermano xkʼamarik chuwach i policía, chuwach i fiscalía, chuwach jenaj tribunal ahaʼ xqʼatarik qʼorik chi naah eh chuwach jenaj tribunal wilik rajaawriik. Xponik 60 pech ar chuwach jenaj haabʼ.

Pan 2018, kiʼibʼ ajqʼatal qʼorik wilik kajaawriik ar Corea del Sur, xkiqʼor chi mi jenoʼ maʼ iraaj ta ojik pan qʼaqʼinik, maʼ mahk taj. Reʼ wilih irubʼan chi reʼ taqeh ajnimaneel ne inyeʼarik keh tokoom kamanik reh chi maʼ ne ta kiʼooj pan qʼaqʼinik. Xa reʼ laʼ, reʼ taqeh ajqʼatal qʼorik maʼ xkireq ta jenaj kʼuhbʼaal ahaʼ wiiʼ iruqʼor chi reʼ ajabʼees ne iruyeew prexo i maʼ kiʼooj ta pan tijinik reh qʼaqʼinik.

Intyoox reh i xkiqʼor taqeh ajqʼatal qʼorik, reʼ i maʼ inkaaj ta ojik pan yeʼaabʼ ahaʼ wiiʼ inkibʼan i tijinik reh qʼaqʼinik, maʼ minooj ta chik taqeh reh chi ne inkibʼan i wilih. Reʼ taqeh Testigos i xikʼamarik pan taqeh yeʼaabʼ reh qʼataj qʼorik, yuʼnaak ne irubʼan chi ne inkipahqaaj jenoʼ chik kamanik reh chi maʼ ne ta inkitoj i multa eh maʼ ne ta kiʼooj prexo ruum chi maʼ inkaaj ta ojik pan qʼaqʼinik. Reʼ Nam Tae-hee, jenaj hermano i xkikoj rumahk iruqʼor: «Noq xinooj chi kiwach taqeh ajqʼatal qʼorik, kʼih pech xnubʼan chuwach i waxaqiibʼ haabʼ, eh ko reʼ xkireq chi riij chajarik inwaaj. Xwikʼraaj chi xkisaj jenaj ihq chi nunaah».

Inqatyoxej reh i Jehová ruum i wilih eh qʼeʼ insuqbʼik qakʼux kuukʼ taqeh qahermano ar Corea del Sur, ruum chi reʼ keh eh i kifamilia kikʼulum kʼih taqeh kʼaxkilal i maʼ holohik taj «ruum i rubʼanariik iraaj i Dios» (1 Pedro 2:19).