Jenaj winaq inkamanik ruukʼ i derechos humanos ar Corea del sur xuqʼor chuwach i ajqʼatal qʼorik chi reʼ kamanik kʼahchiʼ kibʼanam taqeh kʼachareel chupaam i tinamit wilih reh chi maʼ ne ta kiʼooj pan qʼaqʼinik, maʼ irukʼam ta riibʼ ruukʼ i kʼuhbʼaal ruyeʼem i derechos humanos chi junsut i naah akʼal.

Pan 2 reh diciembre reh 2021, reʼ akʼ ajkʼamal bʼeeh reh i kiʼilwik reh mi kʼahchiʼ rukʼamariik naah i kʼuhbʼaal xuyeew i Derechos Humanos ar Corea del Sur, a Song Doo-hwan, xuqʼor chupaam i yeʼaabʼ reh Internet chi reʼ i kamanik inbʼaan chupaam i tinamit reh chi maʼ ne ta kiʼooj pan qʼaqʼinik koruman chi ne inkijal wach. Ar Corea del sur xkitoqʼaaʼ kikʼamam naah i wilih pan 26 reh octubre reh 2020.

Xuqʼor woʼhoq: «Pan 2018 reʼ Tribunal Constitucional xuyeew qʼabʼ chi ne inkibʼan jenoʼ kamanik chupaam i tinamit i maʼ kiʼooj ta pan qʼaqʼinik. Xa reʼ laʼ, reʼ hin imponik naq chi nuwach chi ne injaljik wach i wilih, reh chi ne inooj eloq wach chi manlik i xuqʼor i derechos humanos chi junsut i naah akʼal».

Reʼ Song Doo-hwan xuqʼor i wilih noq rumolom chik riibʼ kuukʼ i kikʼamwik bʼeeh pan sucursal keh taqeh testigo reh Jehová ar Corea del Sur eh kuukʼ taqeh testigo reh Jehová reh Asia eh i Pacífico pan 23 reh noviembre reh 2021. Reʼ taqeh hermano xkiqʼahsaj jenaj huuj, reʼ i rubʼihnaal «Servicio Civil Sustitutorio de Corea del Sur (2021)».

Chupaam i huuj reʼreʼ iruqʼor chi reʼ i tinamit Corea del Sur maʼ kʼahchiʼ ta rukʼamam naah i kʼuhbʼaal inkiqʼor tokoom tinamit junsut i naah akʼal. Reʼ kamanik pan tinamit inbʼaan chuwach 36 poh, eh reʼ ojik chi tijinik reh qʼaqʼinik xa maʼ kʼih ta poh. Eh reʼ wilih irubʼan chi xa jeʼncho prexo wilkeebʼ i kʼachareel. Reʼ i maʼ inkaaj ta ojik chi tijinik reh qʼaqʼinik kikamanik ahaʼ wiiʼ wilkeebʼ taqeh prexo. Reʼ peet poh maʼ ne ta irubʼan chi ne kiʼelik ar. Noq xikʼik chik jenaj poh, ne irubʼan chi ne kiʼelik, mi xyeʼarik qʼabʼ keh, eh na naq kisutiniik noq ko majaʼ naq a las 9:30 reh aqʼabʼ.

Reʼ i kikamanik ruukʼ i Derechos Humanos ar Corea del Sur kʼahchiʼ rutzʼirim riij i xkiqʼor i xikamanik chupaam i tinamit reh chi inelik korik. Maʼ ne ta irubʼan chi ne inkijal wach taqeh kʼuhbʼaal, xa reʼ laʼ ne irubʼan chi ne inkiqʼor keh taqeh kʼachareel inkikorsaj taqeh kʼuhbʼaal wilih chajarik inkikapaaj.

Reʼ i kikojbʼal eh reʼ rukorkilal wach kikʼux taqeh hermano ar Corea del Sur iruyeew rukowiil qakʼux. Eh chʼiklik qakʼux chi reʼ Jehová ne intobʼinik keh (Salmo 55:22).