Pan mayo reh i 2019, reʼ taqeh i kitaqʼanik ar Guatemala xkiyeew qʼabʼ chi kijibʼ chi testigo reh Jehová ne inkiyeew i kʼuhtanik chi riij i Santo Laj Huuj chupaam taqeh yeʼaabʼ ahaʼ wiiʼ wilkeebʼ taqeh policía eh bomberos. Ko yuʼnaak 450 chi policía eh bomberos inkibʼiraj i kʼuhtanik wilih ar Coatepeque, Colomba Costa Cuca, Malacatán eh San Rafael Pétzal.

Reʼ Juan Carlos Rodas, jenaj ajkʼamal bʼeeh pan congregación i xtobʼinik ruukʼ i kamanik wilih iruqʼor: «Chuwach 15 haabʼ reʼ taqeh testigo reh Jehová inqabʼan i kʼuhtanik chi riij i Santo Laj Huuj chupaam ixibʼ paat ahaʼ wiiʼ wilkeebʼ taqeh prexo ar Guatemala. Reʼ i kitaqʼanik chi kinaah taqeh prexo, kilom chi reʼ taqeh inkibʼan i tijinik chi riij i Santo Laj Huuj inkijal i kinaʼojbʼal. Reʼ wilih xubʼan chi ne inqʼorarik keh taqeh policía eh bomberos chi ne inkikʼul kitijinik chi riij i Santo Laj Huuj».

Reʼ sucursal reh Centroamérica irilow i kʼuhtanik wilih, reʼ inyeʼarik kiʼibʼ pech chuwach i xamano, chuwach 15 minuto. Inkikʼuhtaaj juʼjun taqeh naʼojbʼal, jeʼ rukabʼ i wilih: nikʼwach ne inkikʼam kiibʼ pan korik, nikʼwach ne inkibʼan chi korik i kikamaj eh nikʼwach ne inkibʼan i kamanik pan jenaj wach kʼuxliis. Reʼ taqeh testigo reh Jehová inkibʼan i kʼuhtanik wilih, kiqʼorik chi riij i wilih eh inkikʼuhtaaj taqeh video reh jw.org. Inkikʼuhtaaj woʼ nikʼwach rukojariik i JW Library reh chi ne inkireq naʼojbʼal i ne intobʼinik keh.

Reʼ taqeh testigo reh Jehová insuqbʼik kikʼux chi ruyeʼariik kʼuhtanik keh taqeh policía eh bomberos. Inquyeej chi reʼ inkitijej pan Santo Laj Huuj ne intobʼinik keh (2 Timoteo 3:16).