17 REH OCTUBRE REH 2022
RUSIA

Oxlaj chi testigo naruq’atariik q’orik chi kinaah ar Magadan

REPRODUCIR EN

Re’ taqeh ajq’atal q’orik ar Magadan pan tinamit Magadan k’isiin ma’ inkib’an i q’ataj q’orik chi kinaah taqeh hermano: Sergey Agadzhanov, Lyubov Asatryan, Galina Dergacheva, Inna Kardakova, Irina Khvostova, Galina Pechko, Konstantin Petrov, Ivan Puyda, Viktor Revyakin, Mikhail Solntsev, Oksana Solntseva, Sergey Yerkin, eh Yevgeniy Zyablov. Re’ taqeh abogado k’isiin ma’ inkiq’or chajariik i tojb’al mahk naruye’ariik chi kinaah.

Chajariik xk’ularik kuuk’

30 reh mayo reh 2018

Inkitik’aa’ kitz’irim riij i kik’achariik i Ivan, i Konstantin, i Sergey Yerkin, eh i Yevgeniy ruum chi k’ahchi’ naq kikorsam wach taqeh moloj iib’ reʼ kiq’orom chi yiib’ wach taqeh.
1 reh junio reh 2018

Kichoparik taqeh hermano wilih chuwach ju’jun taqeh q’iij
3 reh agosto reh 2018

Xkehsaj i Konstantin aha’ naq wii’ kiyeʼem eh xkitz’ap pan rupaat
5 reh octubre reh 2018

Re’ Ivan, re’ Sergey Yerkin, eh re’ Yevgeniy xi’ehsjik aha’ naq wii’ tz’apalkeeb’ taqeh eh xitz’aparik pan kipaat
20 reh marzo reh 2019

Inkitik’aa’ kitz’irim riij i kik’achariik i Sergey Agadzhanov, i Galina Dergacheva, i Inna, i Irina, i Lyubov, i Mikhail, i Oksana, eh i Viktor. Ma xkiyeew ta chik q’ab’ keh chi ne ki’elik pan tokoom tinamit
27 reh marzo reh 2019

Re’ Ivan, re’ Konstantin, re’ Sergey Yerkin eh re’ Yevgeniy kitz’aparik taqeh pan kipaat eh ma’ inkiyeew ta chik q’ab’ keh chi ne ki’elik pan tokoom tinamit
1 reh abril reh 2019

Xkichih chi pan jun tzuhbʼ naruqʼatariik qʼorik chi kinaah
2 reh marzo reh 2021

Ma’ inye’arik ta chik q’ab’ reh i Galina Pechko reh chi ne inooj pan tokoom tinamit
5 reh marzo reh 2021

Re’ Galina Pechko inq’orarik chi wilik rumahk ruum chi k’ahchi’ chi kamanik ruuk’ jenaj molaab’ reʼ kiq’orom chi yiib’ wach eh xkichih chi naruqʼatariik qʼorik chi naah ruuk’ i 12 chik chi hermano
25 reh abril reh 2022

Irutik’aa’ i q’ataj q’orik chi kinaah

Chi riij i keh

Lyubov Asatryan

Xasjik: Pan 1951 (ar Ganja, pan tinamit Azerbaijan)

Chi riij i ruk’achariik: Waqiib’ chi ak’unb’ees taqeh, re’ reh i más k’isiin. Xkamanik chi aj korsan iq’oom

Inkaaj naq kapeew noq irilow naq i maʼ holohik ta wach ak’al. Xa suq naq chik ruk’ux noq xutik’aa’ tijinik chi riij i Santo Laj Huuj eh noq xutijej chi re’ Dios k’isiin chik ma’ irusach i maʼ holohik wach ak’al. Xkiqahsaj ruhaa’ pan 1991

Re’ iruq’or i reh

¿Chajariik xatrutob’eej reh chi ma’ ne ta naq tiyo’jik?

Ma’ xnukanaa’ ta chi re’ yo’jik ne inokik pan wanima, maj weht’al chi re’ wilih ne irub’an chi ki’ib’ nuk’ux. Weht’al chi ko ruman chi ne inub’an i wilih: nutiij, nanuq’orom reh i Jehová nik’wach inwik’raaj wiib’, nanukojom nuk’ux ruuk’ eh naruwih’iik pan nuk’ux chi re’ reh wilik rajaawriik. Mi inub’an chu’nchel i wilih, weht’al chi re’ Wajaaw wilik pan taxaaj narusuqb’iik ruk’ux (Proverbios 27:11).

Galina Dergacheva

Xasjik: Pan 1956 (ar Myaundzha, pan tinamit Magadan)

Chi riij i ruk’achariik: Xkamanik chi ajkʼuhtoom. Wilik jenaj rixqʼuun.

Irukapaaj naq chi ma’xta jenaj Dios. Xureq chi riij taqeh i rupahqaniik chi riij i k’acharik noq k’ahchi’ naq chi tijinik chi riij i Santo Laj Huuj. Xkiqahsaj ruhaa’ pan 2001

Re’ iruq’or i reh

¿Wilik na jeno’ texto i xatrutob’eej chupaam taqeh q’iij re’re’?

Imponik chi nuwach i iruq’or i Salmo 5:12, ar iruq’or: «WaJaaw nuDios, chatoob’eej ti i korik wach ruk’ux. Eh je’-oq jino’q nimlaj pulato ch’ihch’ chako’leej wii’ ruuk’ ak’axb’al». Re’ i pulato ch’ihch’ wilih ma’ inilarik ta wach, xa re’ la’ noq inub’an i holohik weht’al chi re’ Jehová kirutob’eej eh wilik wuuk’ i ratobʼil.

Inna Kardakova

Xasjik: Pan 1980 (ar Blagoveshchensk, pan tinamit Amur)

Chi riij i ruk’achariik: Xkamanik chi ajlaneel tumiin

Re’ taqeh i rajaaw xkitik’aa’ tijinik chi riij i Santo Laj Huuj kuuk’ taqeh testigo reh Jehová noq re’ reh wilik naq reh 15 haab’. Xkiqahsaj ruhaa’ pan 1997

Re’ iruq’or i reh

¿Nik’wach hat rutob’eem i na’ojb’al ruye’em i rutinamiit i Jehová?

Noq xutik’aa’ i ixowanik ayu’ pan nutinamiit, ma’ xnukapaaj ta chi re’ wilih na wo’ kiin rujot’om i hin. Xa re’ la’, xnub’iraj ju’jun taqeh na’ojb’al xinkitob’eej reh chi ne inukorsaj wiib’. Eh xkiq’or qeh chajariik naq naqab’anam. Q’e’ insuqb’ik nuk’ux chi xnunimaj i wilih. Ruum chi nukorsam naq chik wiib’, ma’ xinyo’jik taj noq xkisik’ paam i nupaat eh xkib’an k’ih i pahqanik.

Irina Khvostova

Xasjik: Pan 1992 (ar Stakhanov)

Chi riij i ruk’achariik: Xkamanik chi ingeniera química

Xub’an kaxaro pan 2013

Xa irukapaaj wo’ naq chaaj wo’ reet wilkooj ayu’. Xureq chi riij i pahqanik wilih noq xutijej chi riij i Santo Laj Huuj. Xkiqahsaj ruhaa’ pan 2016

Re’ iruq’or i reh

¿Nik’wach hat rutob’eem i Jehová?

Inub’an nutiij reh i Jehová reh chi ne kirutob’eej noq ti’ nuk’ux, reh chi re’ taqeh chukuj q’orik inkiq’or chi kiij taqeh testigo reh Jehová ma’ ne ta inkib’an chi ne kinkaqrik. Re’ Jehová ruye’em rutuqkilal nuk’ux, eh ruye’em wo’ rusuqkiil nuk’ux. Re’ wilih kirutob’eej reh chi ne ink’ulik pan nuk’ux chi re’ Jehová k’ahchi’ rukojom rehtaal chu’nchel. Atoob’ ta re’ taqeh aj ixowaal inkaaj kich’uwa’reem wach i rub’ihnaal, weht’al chi re’ reh pan rukuxiik re’ reh narusaqb’isam wach.

Konstantin Petrov

Xasjik: Pan 1986 (ar Nizhnevartovsk, pan tinamit Khanty-Mansi Autonomous Area—Yugra)

Chi riij i ruk’achariik: Xkamanik chi electricista eh irukorsaj naq taqeh ch’ihch’

Xutik’aa’ tijinik chi riij i Santo Laj Huuj kuuk’ taqeh testigo reh Jehová noq ko k’ijool eh xkiqahsaj ruhaa’ pan 2005. Ruum chi ma’ xraaj ta ojik pan servicio militar, xkiyeew chi kamanik ixib’ haab’ ruuk’ waqiib’ poh

Xub’an kaxaro ruuk’ i Tatyana pan 2017

Re’ iruq’or i reh

¿Chajariik na’ab’anam chupaam i k’axkilal wilih?

Ma’ inwaaj ta nusik’im i korik wach b’anooj chupaam i ak’al wilih aha’ wii’ ma’ ajwach ta irub’an i korik eh ma’ na ta nusik’im chi ne inkiyeew ruloq’iil i nub’ihnaal. Re’ inwaaj, re’ chi ne insaqb’ik wach i rub’ihnaal i Dios. Mi inub’an i wilih, re’ Jehová narub’anam chu’nchel i ko ruman reh nutob’jiik.

Ivan Puyda

Xasjik: Pan 1978 (ar Kvitok, pan tinamit Irkutsk)

Chi riij i ruk’achariik: Xkamanik chi aj b’ehsan ch’ihch’

Re’ rajaaw eh re’ rumaam xikojarik preexo ruum i kikojb’aal noq re’ Unión Soviética wilik naq rajaawriik. Re’ Ivan xkiqahsaj ruhaa’ pan 1993

Xub’an kaxaro ruuk’ i Anastasiya pan 2005

Re’ iruq’or i reh

¿Aha’ wilik taqeh i holohik laj na’ojb’al xatkitob’eej reh chi ne inakuy i xatik’ik wii’?

Imponik chi nuwach iruq’or pan Miqueas 7:7. Ar iruq’or: «Eh re’ hin naawuy-eem i rotob’il i QaJaaw Dios, ruuk’ i reh naa nuch’ikaam i nuk’ux, ruum weht’al chi re’ reh naa ruko’liniik weh, eh naa kiin rib’iram». Re’ i q’uniil q’e’ xirutob’eej. Weht’al chi re’ Jehová ma’ jaruuj narukanaam taqeh rajkamanoom. Mi re’ Jehová wilik chi nucheel, ma’ na ta nuyo’jik.

Viktor Revyakin

Xasjik: Pan 1957 (ar Novosibirsk, pan tinamit Novosibirsk)

Chi riij i ruk’achariik: Re’ reh jenaj ajtijineel reh educación física

Xunab’eej wach taqeh testigo reh Jehová noq xkiyuq’ej pan moloj iib’ reh i ruk’uliik pan qak’ux i rukimiik i Jesús. Xkiqahsaj ruhaa’ pan 2002

Xub’an kaxaro ruuk’ i Nataliya pan 2013

Re’ iruq’or i reh

¿Chajariik xtob’inik aweh reh chi suq ak’ux atoob’ ta k’ahchi’ kaat chi ik’ik pan ti’ k’axik?

Inub’an chu’nchel i wilik pan nuq’ab’ reh kamanik chuwach i Qajaaw, kinq’orik kuuk’ taqeh hermano, eh inukapaaj wo’ chi riij i kikuyuuj taqeh i rajkamanoom i Dios najtir cho q’iij. Eh inukanaa’ chi re’ k’axkilal k’ahchi’ nuk’ulum ne kirutob’eej reh chi holohik chik i nuna’ojb’al. Aajwaal wach chi weh rujilariik wiib’ ruuk’ i Dios eh re’ wamigohiil ruuk’ xkowb’ik.

Mikhail Solntsev

Xasjik: Pan 1962 (ar Novosibirsk, pan tinamit Novosibirsk)

Chi riij i ruk’achariik: Xkamanik chi ajiloj keh taqeh avion

Xubʼan kaxaro ruukʼ i Oksana pan 1988

Xutikʼaaʼ tijinik chi riij i Santo Laj Huuj eh xsahchik rukʼux ruukʼ i xureq chi riij. Xkiqahsaj ruhaa’ pan 2013

Re’ iruq’or i reh

¿Ahaʼ wilik taqeh qʼorik xuyeew rukowiil akʼux eh xatrutoobʼeej?

Inkʼulik pan nukʼux chi jenaj hermano xqʼorik wuukʼ eh ruukʼ i wehkʼeen. Xupahqaaj qeh mi qojyoʼjik naq. Xqaqʼor reh chi reʼ Jehová kʼahchiʼ ruyeʼem rutuqkilal qakʼux. Chi riij i reʼ xuqʼor qeh chi reʼ ajYahm ruchʼihiil taqeh i maʼ atoobʼ laj uxlabʼal inkaaj chi ne inqojyoʼjiik. Xa reʼ laʼ mi maʼ qojyoʼjik ruum i ixowanik, ne qojelik korik. Imponik chi nuwach iruqʼor pan i Isaías 44:8: «Reʼ taq hat mat yoʼjik taq».

Iruyeew rukowiil qakʼux chi reʼ taqeh hermano eh hermana suq kikʼux atoobʼ ta ruum runimjiik i Jesucristo kib’ajarik taqeh, ruum re’ i loq’laj Ruxlab’al i Dios inwihʼik kuuk’ chi juneliik (1 Pedro 4:14).

a Maʼ xqabʼan ta q’orik ruukʼ i hermano Sergey Agadzhanov.

COMUNICADOS