Reʼ 26 reh abril reh 2023, reʼ taqeh ajqʼatal qʼorik ar Leninskiy reh i tinamit Nizhny Novgorod xkikoj kimahk taqeh hermano Oleg Konshin, Sergey Malyanov, eh Roman Zhivolupov a eh reʼ hermana Svetlana Malyanova, rixqʼuun i hermano Sergey. Reʼ taqeh ajqʼatal qʼorik xkikoj reh reh wach multa keh taqeh hermano. Xkiqʼor chi ne inkitoj 450.000 rublos (5.494 dólares) ko 700.000 rublos (8.546 dólares).

Reʼ taqeh hermano inkikuy i tiʼ kʼaxik ruum i ixowanik, inkikʼuhtaaj qeh chi reʼ taqeh inkichop kikʼux ruukʼ i Qajaaw Dios maʼ ne ta irubʼan kiʼibʼ kikʼux (Salmo 27:14).

1. 7 reh febrero reh 2019

   Reʼ ajqʼatal qʼorik iruqʼor keh i policía chi ne inkil taqeh i llamada irukʼul i Sergey eh ne inkil chuʼnchel taqeh i chʼihchʼ irukoj reh qʼorik kuukʼ i tokoom.

2. 16 ko pan 17 reh julio reh 2019

   Reʼ taqeh policía inkisikʼ paam i kipaat 31 chi testigo reh Jehová ar Nizhny Novgorod pan Región reh Nizhny Novgorod. Reʼ Oleg, reʼ Sergey, eh reʼ Svetlana xikʼamarik eh xitzʼaparik chi ko majaaʼ inkibʼan i qʼataj qʼorik chi kinaah. Inkitikʼaaʼ kitzʼirin riij i kikʼachariik.

3. 18 reh julio reh 2019

   Reʼ Oleg, reʼ Sergey, eh reʼ Svetlana xiʼesjik cho ahaʼ naq wiiʼ kitzʼapam taqeh. Reʼ ajqʼatal qʼorik xuqʼor keh taqeh i kiʼibʼ chi hermano nikʼ hora naq kakiʼokik pan kipaat eh nikʼ hora naq nakeliik, xkiqʼor woʼ keh chi maʼ na ta naq kiqʼorik chi kiwach eh chi maʼ na ta naq kikojom Internet.

4. 24 reh agosto reh 2021

   Xkikoj i mahk chi naah i hermano Roman, ruum chi xkiqʼor chi kʼahchiʼ chi kamanik pan jenaj molaabʼ yiibʼ wach, eh maʼ xkikanaaʼ ta chik chi ne inelik pan tokoom tinamit.

5. 3 reh marzo reh 2022

   Irutoqʼaaʼ i qʼataj qʼorik.