30 REH AGOSTO REH 2022 | REʼ KʼAHCHIʼ RUKʼULARIIK: 8 REH AGOSTO REH 2023
RUSIA

REʼ KʼAHCHIʼ RUKʼULARIIK: INKIPAHQAAJ TUMIIN REH I QAHERMANO | «Ma’ akanaa’ taq rukojariik ak’ux ruuk’ i Jehová»

REPRODUCIR EN

Pan 3 reh agosto reh 2023, reʼ ajq’atal q’orik reh i tinamit Bikinskiy ar Khabarovsk xukoj rumahk i hermano Sergey Kazakov. Xkipahqaaj reh chi ne irutoj 500.000 rublos (5.186 dólares).

Chajariik xk’ularik ruuk’

9 reh noviembre reh 2020

Xkikoj rumahk ruum chi k’ahchi’ rukorsam wach taqeh moloj iib’ yiib’ wach.
21 reh diciembre reh 2020

Re’ taqeh policía xkisik’ paam i kipaat lajeeb’ chi Testigo, eh chi xilaq taqeh paat wilih wilik i rupaat i Sergey. Xkichop eh xkitz’ap.
23 reh diciembre reh 2020

Ma’ xkiyeew ta q’ab’ reh chi ne inelik chupaam i kiye’aab’ taqeh prexo.
4 reh junio reh 2021

Xelik cho chupaam i kiye’aab’ taqeh prexo, xa re’ la’ xkitz’ap pan rupaat.
5 reh agosto reh 2021

Xkikanaa’ chi ne inelik pan rupaat.
28 reh febrero reh 2022

Xutik’aa’ i q’ataj q’orik. Pan peet q’ataj q’orik, xq’orarik keh taqeh abogado chi ne inkikorsaj jenaj k’axkilal wilik keh, chi riij i re’ ne naq chik irub’an chi ne inkib’an i q’ataj q’orik chi naah i Sergey.
28 reh abril reh 2022

Re’ aj q’atal q’orik xujal i runa’ojb’al eh xuq’or keh taqeh abogado chi na naq rub’anam i q’ataj q’orik.
14 reh junio reh 2022

Irutoq’aa’ wo’ chik i q’ataj q’orik.

Chi riij i reh

Sergey Kazakov

Xasjik: Pan 1974 (Pan tinamit Petropavlovsk-Kamchatskiy, ar Kamchatka)

Chi riij i ruk’achariik: Xkamanik chi bombero

Xutik’aa’ tijinik chi riij i Santo Laj Huuj noq xukoj rehtaal chi jenaj ruprimo xujal i runa’ojb’al noq testigo reh Jehová naq chik. Xkiqahsaj ruhaa’ pan 2002.

Re’ iruq’or i reh

¿Mi inawaaj aq’orom qeh chajariik xukowej ak’ux ruuk’ i Jehová?

Waqiib’ poh naq chik iraaj chi ne kinkichop, re’ i nutuut xuk’ul jenaj derrame cerebral, junch’aq i ruti’jolal ma’ xk’uyu’jik ta chik eh ma’ xq’orik ta chik. Xinooj wo’ chik ar Kamchatka reh rilariik i nutuut. Noq xinkichop, xnukapaaj chi riij awach naq narilom i nutuut. Re’ wilih xub’an chi ne kinokik chi kapeb’inik eh ma’ ne ta inukanaa’ rub’anariik nutiij. Xi’ik’ik taqeh q’iij eh ko majaa’ naq inub’an q’orik ruuk’ jeno’ hermano ar. Xa re’ la’ noq xinq’orik kuuk’, xkiq’or weh chi k’ahchi’ naq kicha’jeem i nutuut. Noq tz’apalkiin naq pan kiye’aab’ taqeh prexo, wutkeel eh ma’xta naq inub’an rub’aan, xa re’ la’ re’ Jehová rukojom naq chik taqeh hermano reh chi ne qojkitob’eej. Re’ wilih iruk’uhtaaj weh chi xti ajwal wach chi ne inqakoj qak’ux ruuk’ i Jehová.

Re’ Sergey ma’ irukanaa’ ta rukojariik ruk’ux ruuk’ i Jehová, eh je’ rukab’ i reh inqaq’or i inkan pan Salmo 31:14: «Re’ hin Jaaw, awuuk’ i hat i nuyeew i nuk’ux, ruum weht’al chi re’ hat, hat nuDios».

COMUNICADOS