8 REH AGOSTO REH 2022 | REʼ KʼAHCHIʼ RUKʼULARIIK 29 REH DICIEMBRE REH 2022
RUSIA

REʼ KʼAHCHIʼ RUKʼULARIIK—XKEHSAJ I MAHK CHI NAAH | Reʼ Aleksandr Kabanov rukorsam naq chik riibʼ eh reʼ wilih xutobʼeej reh chi maʼ ne ta inyoʼjik

REPRODUCIR EN

Pan 5 reh agosto reh 2022 reʼ taqeh ajqʼatal qʼorik reh i tinamit Zelenogorsk xkikoj rumahk i hermano Aleksandr Kabanov, eh xkiqʼor chi nakitzʼapam chuwach kiʼibʼ haabʼ ruukʼ waqiibʼ poh. Xa reʼ laʼ, pan 27 reh diciembre reh 2022 reʼ ajqʼatal qʼorik reh i tinamit Krasnoyarsk xuqʼor chi nakehsam i tojbʼal mahk wilih chi naah, eh chi ko ruman chi ne woʼ chik inqʼatarik qʼorik chi naah.

Reʼ aj qʼatal qʼorik reh i tinamit Krasnoyarsk, ar Zelenogorsk, maʼ najt ta chik iraaj chi ne irubʼan i qʼataj qʼorik chi naah i hermano Aleksandr Kabanov. Reʼ taqeh abogado xkipahqaaj chi ne inyeʼarik prexo kiʼibʼ haabʼ ruukʼ waqiibʼ poh.

Chajariik xkʼuljik ruukʼ

26 reh diciembre reh 2019

Xchoparik eh xqʼorarik chi wilik rumahk, ruum chi kʼahchiʼ rubʼanam i xqʼorarik reh chi maʼ ne ta irubʼan, ruum chi kʼahchiʼ naq rilom paam i Santo Laj Huuj eh kʼahchiʼ naq ruqʼoriik kuukʼ taqeh tokoom chi riij i Jehová. Xtzʼaparik juʼjun taqeh qʼiij.
27 reh diciembre reh 2019

Xkisaj prexo noq reʼ aj qʼatal qʼorik xuqʼor chi ne inbʼaan i wilih.
6 reh diciembre reh 2021

Reʼ Aleksandr xuyeew i ruqʼorbʼal pan yeʼaabʼ reh qʼataj qʼorik. Reʼ aj qʼatal qʼorik maʼ xuqʼor taj chajariik naq narubʼanariik ruukʼ, xukanaaʼ laʼ chi ko ne intzʼirarik riij i rukʼachariik chi korik.
25 reh marzo reh 2022

Intohqʼik woʼ chik i qʼataj qʼorik.

Chi riij i reh

Aleksandr Kabanov

Xasjik: 1960 (ar Kansk, pan tinamit Krasnoyarsk)

Chi riij i rukʼachariik: Inkamanik chi aj ilol uhtzʼubʼ.

Noq xkimik i rutuut, reʼ Aleksandr kʼih naq i rupahqanik. ¿Chajariik inqakʼul noq qojkimik? ¿Kikʼatarik na pan qʼaaqʼ taqeh kʼachareel? ¿Chaj woʼ reet irukanaaʼ i Dios chi ne qojikʼik pan kʼaxkilal? Xureq chi riij taqeh pahqanik wilih pan Santo Laj Huuj eh reʼ wilih xuyeew rusuqkiil rukʼux. Xuqahsaj ruhaaʼ pan 2004, testigo reh Jehová chik yuʼnaak.

Reʼ iruqʼor i reh

¿Chajariik xtobʼinik aweh reh chi ne inakuy ruukʼ suqkiil kʼuxliis i tiʼ kʼaxik xatikʼik wiiʼ?

Noq xinikʼik chupaam i kʼaxkilal wilih, reʼ wamigohiil ruukʼ i Jehová eh rilariik paam i Santo Laj Huuj xti qʼeʼ koruman pan nukʼachariik, reʼ wilih kirutobʼeej reh chi suq nukʼux eh maʼ ne ta kinʼook chi kapebʼinik.

Noq ko majaaʼ intohqʼik i ixowanik, xnukapaaj woʼ chi riij i iruqʼor i Santo Laj Huuj: «Jeʼ reʼ noq, wilaʼ kianam kʼaxik wee hin, naa woʼ kianam kʼaxik taq aweh i hat» (Juan 15:20). Jeʼreʼ noq, wehtʼal naq chik chi jeʼ wilih nanukʼulum.

¿Chaj woʼ reet inabʼan atiij yuʼnaak noq ko majaaʼ imponik i qʼiij reh i qʼataj qʼorik?

Inwaaj nukanaam jenaj holohik ehtalil keh taqeh hermano. Inubʼan nutiij reh chi chi qunchelaal suq oq qakʼux eh maʼ ne ta qojyoʼjik noq inchalik i ixowanik chi qanaah eh chi maʼ ne ta inqakanaaʼ kamanik chuwach i Jehová. Inubʼan woʼ nutiij reh chi chi qunchelaal ne qojwihʼik pan jenaj wach kʼuxliis eh pan tuqkilal, reh chi korik oq wach qakʼux eh ne inqakuy ko pan rukuxiik.

Reʼ taqeh hermano eh hermana aj Rusia inkikanaaʼ jenaj holohik ehtalil chi riij i nimanik, ruum chi inkibʼan i iruqʼor pan Isaías 12:2 «Ruum reʼ hat i qaDios ti koʼlinik qeh, maʼ qohyoʼjik taj, awuukʼ i hat chʼiklik qakʼux. Eh reʼ hat ti yeʼwik rukowiil qakʼux, reʼ hat inqatzʼuyej awach, hat qaj koʼloom».

COMUNICADOS