26 REH AGOSTO REH 2022 | REʼ KʼAHCHIʼ RUKʼULARIIK: 8 REH MARZO REH 2023
RUSIA

REʼ KʼAHCHIʼ RUKʼULARIIK-XKIJAL I TOJBʼAL MAHK KIYEʼEM NAQ CHI NAAH | Inkikuy ixowanik ruukʼ tuqkilal eh ruukʼ kowil kʼuxliis

REPRODUCIR EN

Reʼ 1 reh marzo reh 2023, reʼ taqeh aj qʼatal qʼorik ar Stavropol xkiqʼor chajariik narukʼulariik ruukʼ taqeh hermano Anatoliy Gezik eh i rehkʼeen Irina eh i hermano Viktor Kimovskiy. Xkijal i tojbʼal mahk kiyeʼem naq chi kinaah i Anatoliy eh i Viktor. Reʼ Anatoliy maʼ na ta chik rukamaniik pan kiyeʼaabʼ taqeh preexo. Xkehsaj i Viktor pan kiyeʼaabʼ taqeh preexo. Maʼ xkijal ta i tojbʼal mahk kiyeʼem naq chi naah i Irina, xa reʼ laʼ yuʼnaak ko majaaʼ inkitaqʼaaj preexo.

Reʼ 14 reh noviembre reh 2022,reʼ taqeh aj qʼatal qʼorik pan tinamit Georgievskiy, ar Stavropol, xkiqʼor chi reʼ Anatoliy eh i rehkʼeen, Irina, eh i Viktor wilik kimahk. Xkiqʼor chi reʼ Anatoliy narukamaniik pan kiyeʼaabʼ taqeh preexo chuwach kijibʼ haabʼ ruukʼ kiʼibʼ poh. Chi reʼ Irina narojiik preexo chuwach kijibʼ haabʼ ruukʼ kiʼibʼ poh, xa reʼ laʼ yuʼnaak ko majaaʼ inkitaqʼaaj preexo. Eh xkiqʼor chi reʼ Viktor narojiik preexo chuwach waqiibʼ haabʼ ruukʼ kiʼibʼ poh eh xkitzʼap chik.

Chajariik xkʼuljik ruukʼ

23 reh octubre reh 2019

Reʼ taqeh policía xkisikʼ pan i kipaat ixibʼ chi familia testigo reh Jehová taqeh ar Georgievsk. Reʼ taqeh policía, noq kʼahchiʼ naq kisik’im paam i kipaat taqeh hermano wilik xkikoj chupaam reh chi ne inreqarik kimahk. Reʼ Anatoliy, reʼ Irina, reʼ Victor eh 8 chik chi Testigo xichoparik eh xkibʼan kʼih taqeh pahqanik keh chuwach jenaj aqʼab.
30 reh diciembre reh 2019

Xkitikaa’ kitzʼirim riij i rukʼachariik i Anatoliy, Irina, eh Viktor
23 reh enero reh 2020

Xkiqʼo’reej woʼ chik i hermano Viktor eh xkibʼan kʼih i pahqanik reh. Chi riij i re’ xkiyeew prexo.
23 reh marzo reh 2020

Reʼ Viktor xkisaj cho prexo. Xkitzʼap pan rupaat eh maʼ xkiyeew ta qʼabʼ chi ne inelik.
6 reh mayo reh 2020

Xkiqʼor reh i Viktor chi ne chik irubʼan chi ne inelik pan rupaat. Xa reʼ laʼ, xkiqʼor reh chi maʼ ne ta irubʼan chi ne inooj pan tokoom tinamit.
6 reh octubre reh 2021

Xkiqʼor reh i Viktor chi ne chik irubʼan chi ne inelik xa ahaʼ paʼ yeʼaabʼ.
10 reh marzo reh 2022

Irutoqʼaa’ i qʼataj qʼorik.

Chi riij i keh

Anatoliy Gezik

Xasjik: pan 1967 (Nezlobnaya, ar Stavropol)

Chi riij i rukʼachariik: Noq kamanik naq irubʼan pan kiyeʼaabʼ taqeh prexo keh taqeh kʼijool, iraaj naq runabʼeem chi riij chaj woʼ reet wilkooj ayuʼ eh chajariik narukʼulariik kuukʼ taqeh kʼijool wilkeebʼ naq prexo. Xureq chi riij taqeh rupahqanik noq xutik’aa’ tijinik chi riij i Santo Laj Huuj kuukʼ taqeh testigo reh Jehová. Xubʼan kaxaro ruukʼ i Irina pan 1997. Xkiqahsaj ruhaaʼ pan 1998.

Reʼ iruqʼor i reh

¿Chajariik xuyeew rukowil akʼux noq xatikʼik chupaam taqeh kʼaxkilal wilih?

Rukapebʼjiik chi riij i akʼ akʼal. Xnureq chi riij chi wilik ruwiiʼ chaaj woʼ reet wilkooj ayuʼ, eh reʼ wilih qojrutobʼeej chi qunchelaal noq naqak’ulum i ti’ k’axik chupaam taqeh i qʼiij chalik reh. Reʼ taqeh pajarik naqak’ulum mareh maʼ jenaj ta wach taqeh. Reh chi ne inqakʼuy taqeh pajarik wilih, ko ruman chi ne inwihʼik pan qakʼux chuʼnchel i rubʼanam i Jehová eh i Rakʼuun chi qiij. Chupaam taqeh kʼaxkilal xinikʼik wiiʼ, xwikʼraaj chi reʼ Jehová kʼahchiʼ naq ruchopom i nuqʼabʼ. Noq inwaaj naq nutobʼaal inwikʼraaj naq chi kirik’saj johtoq.

Irina Gezik

Xasjik: Pan 1972 (Georgievsk).

Chi riij i rukʼachariik: Xutijej i b’ojoj wach itzʼih. Xubʼan kaxaro ruukʼ i Anatoliy pan 1997.

Xukoj rehtaal chi reʼ Anatoliy xujal wach i runaʼobʼal noq xkiqahsaj ruhaaʼ. Noq xureq chi riij chi reʼ Jehová aj kʼaxool, xutikʼaa’ tijinik chi riij i Santo Laj Huuj. Xkiqahsaj ruhaaʼ pan 2008.

Reʼ iruqʼor i reh

¿Nikʼwach xkʼihik awamigohiil ruukʼ i Jehová noq xatikʼik chupaam i kʼaxkilal wilih?

Kʼih pech inkʼulik pan nukʼux i iruqʼor pan Isaías 41:13. Reʼ i wilih irubʼan chi neʼ inkʼulik pan nukʼux chi reʼ Jehová wilik wuukʼ eh wilik ar reh nutobʼjiik. Noq xkitik’aa’ kitzʼirim riij i nukʼachariik eh ko yuʼnaak inwikʼraaj chi maʼ najt ta wilkin ruukʼ i Jehová. Pan nutiij inupahqaaj i tuqkilal, i qʼilarik iibʼ eh i kowiil kʼuxliis, eh inwikʼraaj chi re’ Jehová irubʼiraj i nutiij.

Viktor Zimovskiy

Xasjik: Pan 1969 (Georgievsk).

Chi riij i rukʼachariik: Reʼ rajaaw eh re’ rutuut xikimik noq reʼ reh wilik naq reh 13 haabʼ.

Xutoqʼaa’ tijinik chi riij i Santo Laj Huuj noq reʼ i rubʼaluk xqʼorik ruukʼ chi kiij taqeh testigo reh Jehová. Rubʼirjiik chi riij i kuktiik taqeh kamnaq xuyeew rukowiil rukʼux. Xkiqahsaj ruhaaʼ pan 2003.

Xubʼan kaxaro ruukʼ i Nadezhda pan 2006. Ixibʼ kihalakʼuun. Noq reʼ Viktor xkikʼam prexo, reʼ Nadezhda kʼahchiʼ ruy’eem chi ne inasjik i roox rakʼuun.

Reʼ iruqʼor i reh

¿Nikʼwach xatrutobʼeej i Jehová noq tzʼaplikaat naq pan apaat?

Noq tzʼapalkiin naq pan nupaat maʼ inkiyeew ta naq qʼabʼ chi ne inukoj i teléfono i internet eh chi ne kinelik rij paat. Reʼ wilih iraaj ruqʼorom chi maʼ inubʼan ta naq rukʼamariik i ko ruman naq reh i nufamilia. Reʼ wehk’een bʼelejeebʼ poh naq chik irukʼam wach kʼacharik, eh reʼ hin maʼ inubʼan ta naq elik chi rusikʼariik kiwaʼ eh rusik’ariik i ko ruman naq reh i wixqʼuun narasjiik. Reʼ wilih xubʼan chi maʼ suq ta ne inwikʼraaj wiibʼ. Xa reʼ laʼ, reʼ qafamilia eh reʼ taqeh hermano xojkitobʼeej. Reʼ Jehová xukoj taqeh hermano reh qatobʼjiik ruukʼ i ko ruman chi qeh, jeʼ rukabʼ i qawaʼ, i qasoʼ, eh xojkitobʼeej reh chi suq qakʼux.

Ruum chi inkikʼuy chuʼnchel ruukʼ suqkiil kʼuxliis eh uyʼinik, chikʼlik pan qakʼux chi reʼ Jehová «maʼ najt ta wilik kuukʼ i kipahqanik reh i rotobʼil» (Salmo 145:18).

COMUNICADOS