ENERO 31, 2022 | REʼ KʼAHCHIʼ RUKʼULARIIK: 27 REH MARZO REH 2023
RUSIA

REʼ KʼAHCHIʼ RUKʼULARIIK-XKIJAL I TOJBʼAL MAHK KIYEʼEM NAQ CHI NAAH | Reʼ hermana Lyudmila Salikova inyeʼarik ransil eh rukowiil rukʼux ruum i Jehová

REPRODUCIR EN

Reʼ 23 reh marzo reh 2023, reʼ tribunal reh i tinamit Snezhinsk ar Chelyabinsk xkitzʼir woʼ chik riij i tojbʼal mahk xkiyeew chi naah i hermana Lyudmila Salikova. Kiqʼorom naq chi narojiik preexo chuwach waqiibʼ haabʼ, xa reʼ laʼ yuʼnaak xkiqʼor chi xa kiʼibʼ haabʼ ruukʼ waqibʼ poh narojiik preexo. Xa reʼ laʼ, ko majaaʼ inkitaqʼaaj preexo.

Reʼ 17 reh marzo reh 2022, reʼ aj qʼatal qʼorik reh i tinamit Cheliábinsk maʼ xubʼiraj ta i xuqʼor i Liudmila.

Pan 20 reh enero reh 2022, reʼ tribunal reh i tinamit Snezhinsk ar Chelyabinsk xuqʼor reh i hermana Lyudmila Salikova chi narojiik prexo chuwach waqiibʼ haabʼ mi maʼ irukanaaʼ qʼorik chi riij i Jehová, xa reʼ laʼ yuʼnaak ko majaʼ inkitaqʼaaj prexo.

Linea de tiempo

noviembre 2020

Reʼ taqeh kichaʼjanik reh i tinamit Snezhinsk xkisikʼ paam i kipaat kijibʼ chi familia testigo reh Jehová, xkisikʼ woʼ paam i rupaat i Lyudmila. Xiʼokik woʼ pan yeʼaabʼ ahaʼ wiiʼ inkamanik. Ruum i wilih reʼ Lyudmila xukanaaʼ i rukamaj.
Agosto 26, 2021

Xkʼamarik kuukʼ taqeh ajqʼatal qʼorik ruum chi wilik pan jenaj nimanik maʼ imponik ta chi kiwach eh ruum chi kʼahchiʼ ruqʼahsam taqeh huuj maʼ yeʼooj ta qʼabʼ chi ne inqʼahsjik.
Diciembre 8, 2021

Kʼahchiʼ rutohqʼiik i qʼataj qʼorik

Perfil

Lyudmila Salikova

Xasjik: 1951 (Sysert)

Chi riij i rukʼachariik: Xubʼan kaxaro pan 1971. Xukʼihsaj taqeh ixibʼ chi ruhalakʼuun. Reʼ rubʼahiil xkimik pan 2009. Xkamanik chi ingeniera reh rilariik i energía pan tinamit Snezhinsk. Imponik chuwach ojik pan reh reh wach yeʼaabʼ.

Reʼ ras xutikʼaaʼ tijinik chi riij i Santo Laj Huuj pan 1999. Waqiibʼ poh xikʼik eh reʼ Lyudmila xutikʼaaʼ woʼ tijinik ruchʼihil i ras. Xureq chi riij taqeh i rupahqanik, jeʼ rukabʼ: Chajreet wilkooj ayuʼ, chajreet wilik yiibʼ wach bʼanooj eh kʼaxkilal, eh chaj woʼ reet wilik qʼaqʼinik. Xuqahsaj ruhaaʼ pan 2002.

Reʼ iruqʼor i reh

¿Nikʼwach xkowbʼik awamigohiil ruukʼ i Jehová noq xatikʼik chupaam taqeh pajarik wilih?

Noq ko majaʼ naq kinikʼik chupaam i wilih, maʼ kow ta naq i wamigohiil ruukʼ i Jehová eh inukapaaj naq chi maʼ hin ta naq looqʼ chuwach. . . Yuʼnaak tokoom chik inukapaaj, eh yuʼnaak wehtʼal chi reʼ inukapaaj naq najtir maʼ korik taj. Eh intyoox reh i Jehová xnuyeew chi nabʼjik i rubʼihnaal chi kiwach taqeh ajqʼatal qʼorik ayuʼ Snezhinsk. Chʼiklik nukʼux chi reʼ Jehová qʼeʼ kirukʼax eh irukoj rukʼux wuukʼ. Noq kinikʼik chupaam jenoʼ tiʼ kʼaxik, reʼ wilih kirutobʼeej reh chi ne inukʼuhtaaj chi looqʼ chi weh chi reʼ Jehová irukoj rukʼux wuukʼ.

¿Ruyeʼem na rukowiil akʼux jenoʼ hermano on jenoʼ hermana ruukʼ i ruqʼorbʼal reh chi ne inakuy taqeh pajarik wilih?

Noq xinooj chuwach i aj qʼatal qʼorik pan peet, xinkaaj kapeew. Xnubʼan nutiij: «Chakuy Jehová, chayeew weh asanto laj uxlabʼal». Chi riij i reʼ, jenaj hermana xutaqʼaaj rukowiil nukʼux. Xuqʼor weh: «Noq qojʼikʼik pan pajarik, xa jeʼ na kʼahchiʼ rutzʼajariik qawach. Jeʼ rukabʼ jenaj asoʼ, inatzʼaj wach chi korik eh inayitzʼ wach. Xa reʼ laʼ, noq inakohlaaj rutzʼajariik, saq chik wach inelik. Jeʼ woʼ reʼ inkʼularik quukʼ i hoj. Chuʼnchel i xakʼul, xa jeʼncho xatrutzʼaj chi korik. Reʼ taqeh pajarik eh tiʼ kʼaxik xatikʼik wiiʼ, xubʼan chi hat looqʼ chuwach i Jehová eh chi qawach woʼ i hoj. Qehtʼal chi eqal wahqʼeq maʼ xa ta chuwach i ajqʼatal qʼorik ne tiʼooj pahʼoq, na laʼ awikʼraam chi reʼ Jehová kʼahchiʼ kaat rutobʼeem». Reʼ Jehová rehtʼal naq nikʼwach inwikʼraaj wiibʼ, xukoj jenaj hermana reh chi ne iruqʼor weh chajarik irukapaaj chi wiij i hin.

Reʼ taqeh hermano eh hermana ar Rusia inkireq rukowiil kikʼux eh rusuqkiil kikʼux ruukʼ i Jehová. Reʼ qaDios aj kʼaxool iruqʼor chi narutobʼeem taqeh i maʼxta kituut kajaaw, jeʼ woʼ taqeh i kʼahchiʼ kikʼtesjiik chi tiʼ kʼaxik, reh chi reʼ yiibʼ wach runaʼojbʼal ne rukanaaʼ i jotʼooj (Salmo 10:18).

COMUNICADOS