Pan 22 reh febrero reh i 2022, reʼ Tribunal reh Derechos Humanos ar Europa xuyeew qʼabʼ chi 15 chi testigo reh Jehová ne inkibʼan i kikamaj. Xkilow chi noq reʼ taqeh ajchaʼjen tinamit kiponik pan kipaat taqeh hermano, inkibʼaj eh inkiqʼoj naq taqeh hermano, reʼ wilih xkʼularik pan 2010 eh 2012. Chuʼnchel i wilih xukʼuhtaaj chi reʼ tinamit Rusia maʼ irukanaaʼ ta naq chi reʼ taqeh hermano ne inkibʼan jarik inkaaj i keh, eh maʼ inkiyeew ta woʼ qʼabʼ chi ne inkibʼan i kiloqʼinik taqeh hermano. Xqʼorarik reh i tinamit Rusia chi ne irutoj 99,000 euros ($112,323 U.S.) reh rutojariik keh taqeh hermano chuʼnchel i xkibʼan keh. Reʼ wilih xqʼorarik eh maʼ awach ta chik ne irujal wach.

Xkiqʼor i wilih ruum i waqiibʼ chi bʼanooj xubʼan i tinamit Rusia. a Xitaqʼabʼjik taqeh ajchaʼjen tinamit chi ne inkisikʼ paam i kipaat taqeh hermano eh chi ne inkisikʼ paam jenaj paat reh moloj iibʼ, xkitʼusaaʼ kiʼibʼ taqeh hermana reh rusikʼariik chajarik wilik kuukʼ eh reh rukʼamariik i wilik keh, eh xikojarik prexo ruum chi xkibʼan i qʼoroj kʼuhbʼaal. Wilik pech, reʼ taqeh xkibʼan i sikʼooj wilih, reʼ taqeh agentes del Servicio Federal de Seguridad (FSB, jeʼ wilih i kibʼihnaal pan ruso), tzʼaplik naq i kiwach eh kikʼamam naq i kipuhbʼ. Xkikoj kiibʼ chi kiwach taqeh hermano ruukʼ chuʼnchel i kansil.

Reʼ abogado reh derechos humanos André Carbonneau, xuqʼor «chi reʼ taqeh i kichaʼjanik reh i tinamit kʼahchiʼ kisikʼim paam i kipaat taqeh testigo reh Jehová, eh reʼ bʼanooj wilih maʼ holohik taj. Wilik na jenoʼ 1.700 i xsikʼarik paam i kipaat. Reʼ wilih xutikʼaaʼ pan 2017, noq maʼ xkiyeew ta chik qʼabʼ chi reʼ taqeh testigo reh Jehová ne kikamanik chuwach i Jehová. Yuʼnaak noq insikʼarik paam i rupaat jenoʼ testigo reh Jehová, inqʼorarik chi reʼ wilih jenaj bʼanooj yiibʼ wach eh maʼ iruchop ta riibʼ ruukʼ i xkiqʼor taqeh Europeo». Xuqʼor woʼ i wilih: «Reʼ Tribunal xukoj i mahk chi kinaah taqeh ajchaʼjen tinamit ar Rusia, ruum chi maʼ inkikanaaʼ ta naq chi ne inbʼaan i qʼoroj kʼuhbʼaal chiʼ taq paat. Reʼ wilih iraaj ruqʼorom chi reʼ Tribunal xuqʼor chi reʼ taqeh ajchaʼjen tinamit nakikanaam chi reʼ taqeh testigo reh Jehová ne inkibʼan i qʼoroj kʼuhbʼaal».

Reʼ i xqʼorarik maʼ irukʼam ta riibʼ ruukʼ i kʼahchiʼ kikʼulum taqeh testigo reh Jehová ar Rusia. Chuwach taqeh qʼiij inkʼul iloq chi qawach, noq ne inkibʼan jenoʼ qʼorik nakikojom rehtaal chaj woʼ reet noq paʼlik i kikamaj taqeh testigo reh Jehová. Wilik na 60 chi testigo reh Jehová ar Rusia i kʼahchiʼ rukojariik kimahk, eh reʼ Tribunal reh Derechos Humanos ar Europa ko narilom i wilih. Inquyeej chi reʼ wilih ne irubʼan chi reʼ taqeh hermano ne kiʼelik korik chuwach i Tribunal.

Chi qunchelaal insuqbʼik qakʼux chi reʼ taqeh ajkʼamal bʼeeh reh i Derechos Humanos kʼahchiʼ kikojom rehtaal chi reʼ taqeh hermano eh hermana ar Rusia korik wach kikʼux chuwach i Jehová. Chuʼnchel i wilih irukʼuhtaaj chi reʼ Jehová kʼahchiʼ rukuxisam taqeh hermano ruum chi kʼahchiʼ kikoʼleem i rubʼihnaal i Jehová eh jeʼ woʼ i runimaal Rajaawriik (Salmo 26:11).