Pan 7 reh junio reh 2022, reʼ Tribunal Europeo reh Derechos Humanos a xuqʼat qʼorik chi naah i tinamit Rusia ruum chi maʼ irukanaaʼ ta chi reʼ taqeh testigo reh Jehová ne inkibʼan i kikamaj. Reʼ taqeh aj qʼatal qʼorik xkiqʼor chi reʼ xubʼan i tinamit Rusia pan 2017 maʼ holohik taj. Xuqʼor woʼ hoq chi maʼ holohik ta xubʼan i tinamit Rusia ruum chi xuqʼor keh taqeh testigo chi maʼ inkikoj chik taqeh i kihuuj eh chi maʼ inkikoj chik i kiyeʼaabʼ pan Internet jw.org. Xuqʼor reh i tinamit Rusia chi reʼ kʼahchiʼ naq rukapaam rubʼan kuukʼ taqeh testigo reh Jehová, maʼ irubʼan chik eh chi ne irisaj taqeh i wilkeebʼ prexo. Eh xqʼorarik woʼ keh chi ne inkiqʼahsaj chuʼnchel taqeh yeʼaabʼ keh taqeh testigo reh Jehová oon chi ne inkiyeew 59.617.458 euros (63.684.978 dólares) ruum taqeh yeʼaabʼ wilih. Eh na woʼ naq kiyeʼem 3.447.250 euros (3.682.445 dólares) keh taqeh i xiwihʼik prexo, ruum i tiʼ xbʼan keh.

Pan 2010 ko pan 2019, 1.400 chi kʼachareel xiponik 20 pech chuwach i aj qʼatal qʼorik reh chi ne inbʼaan i qʼataj qʼorik chi kinaah chi korik. Xa reʼ laʼ, reʼ xkiqʼor taqeh aj qʼataj qʼorik ar Europa maʼ xkahnik ta chi jeʼreʼ, xqʼorarik reh i tinamit Rusia chi «maʼ ne ta chik irubʼan i qʼataj qʼorik chi kinaah taqeh testigo reh Jehová […] eh chi ne irisaj taqeh i tzʼapalkeebʼ». Reʼ wilih irukʼuhtaaj chi reʼ taqeh hermano wilkeebʼ ar Rusia eh pan tokoom yeʼaabʼ maʼxta kimahk, eh chi inkinimaj i kʼuhbʼaal eh chi kʼahchiʼ rukojariik taqeh prexo chi maʼxta kimahk.

Chuwach i qʼataj qʼorik, reʼ tribunal kʼih pech xuqʼor chi reʼ tinamit Rusia kʼahchiʼ rubʼanam i chukuj qʼorik chi kinaah taqeh testigo reh Jehová, ruum chi xuqʼor chi reʼ inkibʼan, reʼ inkinimaj eh reʼ taqeh kihuuj, jeʼ woʼ i kiyeʼaabʼ pan Internet maʼ holohik ta taqeh. Chawil kʼisiin chi riij i xuqʼor i tribunal:

• Reʼ i qanaʼojbʼal: Reʼ Tribunal Europeo iruqʼor chi reʼ taqeh tribunal ar Rusia «maʼ xkikʼuhtaaj ta chajreet inkiqʼor chi reʼ taqeh Testigo inkixowaaj taqeh tokoom oon chi kʼahchiʼ keebʼ chi peleto» (párrafo 271).

• Reʼ inkiqʼor taqeh testigo reh Jehová, chi reʼ keh wilik kuukʼ i korik: «Inkiqʼor pan chaqʼlamiil keh taqeh tokoom chi reʼ inkikʼuhtaaj reʼ korik eh chi awach iraaj okik chupaam i korik koruman chi ne irukanaaʼ i maʼ manlik ta nimanik, reʼ taqeh kʼachareel ne irubʼan chi ne inkinimaj chajariik inkaaj eh ne irubʼan chi ne inkiqʼor xa chajariik» (párrafo 156).

• Reʼ rukojariik i kikʼ: «Reʼ iruqʼor i Derechos Humanos ar Europa eh reʼ taqeh kʼuhbʼaal ruyeʼem i tinamit Rusia inkiqʼor chi chi qajuʼjunaal naqachihim chajariik naqabʼanam ruukʼ i qatiʼjolal. Ruum ajreʼ, awach maʼ irukʼul taj i kikʼ maʼ reʼ ta jenaj mahk kʼahchiʼ» (párrafo 165).

• Reʼ maʼ ne ta inkibʼan rubʼaan: «Chi maʼ ne ta kiʼooj pan qʼaqʼinik maʼ reʼ ta jenaj mahk ruum chi reʼ rukʼuhbʼaal i tinamit Rusia maʼxta ruqʼorom chi riij i wilih» (párrafo 169).

• Reʼ taqeh i qahuuj: «Reʼ i kikamaj eh reʼ i tzʼihbʼamaj pan kihuuj taqeh i kʼahchiʼ ruqʼatariik qʼorik chi kinaah maʼ reh ta peletohinik, reh laʼ rusikʼariik i tuqkilal. Jeʼreʼ noq, inkikʼuhtaaj chi inkikʼam naah inkikʼuhtaaj» (párrafo 157).

• Reʼ i kiyeʼaabʼ pan internet jw.org: Reʼ tribunal xuqʼor chi reʼ kiyeʼaabʼ pan internet jw.org maʼxta ixowanik chupaam eh maʼ yiibʼ ta wach. Ta naq reʼ taqeh aj qʼataj qʼorik ar Rusia xkireq jenaj yiibʼ wach naʼojbʼal pan jw.org, xubʼan naq chi xkipahqaaj keh taqeh Testigo chi ne inkisaj i maʼ holohik taj pan kiyeʼaabʼ reh Internet, eh maʼ holohik ta chi xkiqʼor chi maʼ ne ta chik irubʼan chi ne inkikoj chuʼnchel i kiyeʼaabʼ pan Internet (párrafos 231 y 232).

Reʼ Tribunal Europeo xuqʼor chi reʼ taqeh aj qʼatal qʼorik ar Rusia tokoom rilariik xkibʼan taqeh Testigo eh maʼ holohik ta xkibʼan kuukʼ (párrafo 187). Yuʼnaak naqakʼuhtaam chajarik xureq i tribunal:

• «Reʼ xkʼamwik keh chi rukʼamariik taqeh testigo reh Jehová pan qʼatbʼal qʼorik maʼ reʼ ta chi inkaaj naq kikʼamam naah i rukʼuhbʼaal i tinamit Rusia. Reʼ taqeh aj qʼatal qʼorik ar Rusia xkikʼuhtaaj chi maʼ inkikʼax ta naq wach inkibʼan taqeh testigo reh Jehová. Inkaaj naq chi ne inkikanaaʼ i kinimaniik eh chi maʼ awach ta chik aj eh ne inkikʼuhtaaj inkinimaj» (párrafo 254).

• Reʼ taqeh aj qʼatal qʼorik ar Rusia maʼ xkitzʼir ta riij chi korik i kʼahchiʼ naq kibʼanam. Jenaj ehtalil, reʼ Tribunal Supremo ar Rusia xa xubʼiraj i xkiqʼor taqeh policía eh taqeh fiscal, eh maʼ xkitzʼir ta riij chi korik taqeh i kihuuj (párrafo 203).

• Reʼ kʼuhbʼaal chi riij i maʼ holohik taj korsamaj chi korik kuum taqeh aj qʼatal qʼorik reh chi ne inkikoj xa nikʼ paʼ wach inkaaj chi kinaah taqeh testigo reh Jehová (párrafo 272).

Atoobʼ ta maʼ qehtʼal ta chajariik narubʼanam i tinamit Rusia ruukʼ i xuqʼor i Tribunal Europeo de Derechos Humanos, xa reʼ laʼ maʼ inqachʼikaaʼ ta qakʼux kuukʼ taqeh i winaq, ruukʼ laʼ i Dios inqachʼikaaʼ qakʼux. «Reʼ hoj ruukʼ QaJaaw Dios qayeʼem qakʼux, ruum reʼ reh intoobʼinik qeh, eh i rukoʼleej i qánima» (Salmo 33:20).