Re’ Dennis Christensen xponik chi suq ruk’ux ar Dinamarca pan 25 reh mayo reh 2022. Jenaj naq chik q’iij ik’inaq chi xkisaj prexo ar Rusia, eh xa re’ yu’ xkitaq’aaj jeh pan rutinamiit. Xik’ik ho’ob’ haab’ pan ju’jun taqeh ye’aab’ keh taqeh prexo.

Re’ reh iruq’or: «Q’e’ suq nuk’ux chi xinelik cho prexo eh chi wilkiin wo’ chik ruuk’ i wehk’een Irina. Re’ tob’inik eh re’ kowiil k’uxliis xnuk’ul kuuk’ taqeh hermano chi junsut i naah ak’al jenaj kooch inchalik ruuk’ i Jehová. Inupahqaaj reh i Jehová chi ne irutob’eej taqeh hermano, re’ k’ahchi’ roxowjiik kiwach eh prexo taqeh ruum chi korik wach kik’ux chuwach i Jehová. Q’e’ kow kik’ux».

Re’ Dennis eh re’ Irina k’ahchi’ ruye’ariik i ajwaal wach chi keh kuum i kifamiliar eh kuum taqeh kamigo. K’ahchi’ ruye’ariik keh i ajwaal wach pan kik’achariik eh pan uxlab’al. Re’ Dennis eh re’ Irina inkiq’or: «Xa inqaaj chik wih’ik kuuk’ taqeh hermano ar Dinamarca reh ruye’ariik ruloq’il i Jehová pan suqkiil k’uxliis».

Pan 25 reh mayo reh 2017, wilik taqeh policía i kitz’apam i kiwach eh kik’amam i kipuhb’ xi’okik pan jenaj ye’aab’ reh moloj iib’ ar Oreol noq re’ taqeh hermano wilkeeb’ pan moloj iib’. Re’ hermano Dennis wilik naq ar, je’re’ noq xkichop eh xkik’am prexo. Chi riij i re’, re’ hermano Dennis xkikoj rumahk eh xkiq’or chi k’ahchi’ rukorsam wach taqeh moloj iib’ reh jenaj molaab’, i kiq’orom naq chi yiib’ wach i rukapeb’aal, eh re’ taqeh Aj Q’atal Q’orik ar Rusia kiq’orom naq chi ma’ na ta naq chik ruwih’iik taqeh moloj iib’ je’ rukab’ i re’.

Re’ taqeh aj q’atal q’orik ar Rusia xkiq’or chi re’ xq’orarik pan 2017, iraaj naq ruq’orom chi re’ taqeh Testigo ma’ na ta naq chik kib’anam i kikamaj, xa re’ la’ xkiq’or chi ma’ k’ahchi’ ta naq kib’anam chi ma’ ne ta chik inkiloq’ej wach i Dios. Xa re’ la’, xkichop i hermano Dennis eh chi riij i re’ k’ih taqeh hermano xkitik’aa’ ojik prexo ar Rusia eh Crimea.

Yu’naak 91 chi hermano eh hermana prexo taqeh. Inqapahqaaj reh i Jehová chi ne irutob’eej taqeh rajkamanoom korik wach kik’ux, eh chi ne irusik’ cho kiwach (Salmo 4:3).