Pan 24 reh febrero reh 2022, reʼ tinamit Rusia xponik chi qʼaqʼinik ruukʼ i tinamit Ucrania. Wilik na 129.000 chi testigo reh Jehová i kipatinik ar Ucrania ruchʼihil taqeh i kihalakʼuun. Reʼ sucursal xukorsaj wach 27 tzuhbʼ chi hermano i kiʼilwik reh taqeh hermano inkikʼul i kʼaxkilal, reh kitobʼjik taqeh i wilkeebʼ ar Ucrania. Eh chi kijuʼjunaal taqeh testigo reh Jehová inkikʼuhtaaj i kʼaxooj keh taqeh hermano eh keh taqeh i tokoom kʼachareel i kʼahchiʼ kikʼiik chupaam i kʼaxkilal wilih. Kʼahchiʼ kibʼanam chuʼnchel i wilik pan kiqʼabʼ reh ruyeʼariik kiwaʼ kihaaʼ taqeh hermano eh reh ruyeʼariik rukowiil kikʼux.

Kʼih taqeh hermano xikahnik chupaam i tinamit, xa reʼ laʼ, juʼjun xiʼooj pan tokoom tinamit. Wilik naq kʼih taqeh kʼachareel inkaaj woʼ naq elik; chuwach 30 kilómetro wilkeebʼ kʼih i kʼachareel i kʼahchiʼ keebʼ chi ojik. Juʼjun xkuyeej ixibʼ oon kijibʼ qʼiij reh chi ne inkibʼan i elik. Reʼ taqeh hermano wilkeebʼ cho ar xkisikʼ taqeh hermano i kʼahchiʼ keebʼ chi elik reh kitobʼjik eh xkiyeew cho kiwaʼ kihaaʼ, eh chuʼnchel i ajwal wach chi keh. Eh, noq kiʼelik naq chupaam i tinamit, wilik taqeh testigo reh Jehová i kʼahchiʼ naq kuyeem taqeh eh wilik naq kuukʼ juʼjun taqeh i huuj ahaʼ wiiʼ iruqʼor jw.org. Xa inkaaj naq chik kitobʼeem eh kiyeʼem rukowiil kikʼux taqeh hermano.

• Pan 1 reh marzo reh 2022, jenaj hermano impatinik ar Járkov xkimik ruum chi xkikut taqeh bomba ahaʼ wiiʼ wilkeebʼ i keh, eh reʼ rehkʼeen xkahnik chi tiʼ.

• Ixibʼ chi Testigos tiʼ wilkeebʼ.

• 5.000 chi Testigos xkikanaaʼ i kipaat.

• Kiʼibʼ i paat xiyojibʼik.

• Ixibʼ i paat xiyojibʼik chujumpech.

• 35 chi paat xiyojibʼik kʼisiin.

• Kʼiʼibʼ chi yeʼaabʼ reh moloj iibʼ xiyojibʼik kʼisiin.

• Kʼih taqeh Testigos xikahnik chi maʼxta kiluz, maʼxta chik kuukʼ nikʼwach ne inkiqʼixinbʼisaj kiibʼ eh reʼ i kiteléfono maʼ inkamanik ta chik. Eh maʼxta chik kihaaʼ.

• Wilik 27 tzuhbʼ chi hermano reʼ kiʼilwik reh inkikʼul i tiʼ kʼaxik ar Ucrania.

• Reʼ taqeh i kiʼilwik reh inkikʼul i tiʼ kʼaxik, xkitobʼeej 867 chi Testigos reh chi ne inkireq ahaʼ nakipatiniik.

• Reʼ taqeh tzuhbʼ wilih kikamanik reh ruyeʼariik kiwaʼ kihaaʼ taqeh hermano.

Reʼ taqeh wilih xkikʼul i kʼaxkilaal.

Inqapahqaaj reh i Jehová chi ne irutobʼeej taqeh hermano reh chi ne inwihʼik kinaʼojbʼal eh ne inkireq chi riij chajarik nakibʼanam chupaam taqeh i kʼaxkilal wilih. Eh chi maʼ ne ta inkikanaaʼ rukʼuhtjiik i kʼaxooj chi kiwach (Proverbios 9:10; 1 Tesalonicenses 4:9).