Re’ taqeh hermano aj Ucrania ma’ inkikanaa’ ta rutob’jiik kiib’ chi kiwach, eh inkik’uhtaaj i k’axooj ruuk’ chu’nchel kik’ux.

Re’ Olena jenaj testigo reh Jehová 81 haab’ wilik reh. Re’ 6 reh Junio xq’ehb’ik jenaj bomba ma’ najt ta ruuk’ i rupaat. Re’ bomba xusach wach i rupaat i ruka’jaaj eh xub’an jenaj jul wuqub’ metro i ruchamiil. Kow xk’er i bomba eh xusach wach i rupaat i Olena.

Re’ reh iruq’or: «Noq wirik naq inub’an, xq’ehb’ik jenaj tz’aq ma’ najt ta wuuk’, eh xa aha’ naq ink’utinik taqeh ab’aj. Xnutyoxej reh i Jehová chi hin naq k’achalkiin». Re’ taqeh hermano kipatinik ar, xa re yu’ xpoon kilow i Olena noq xkib’iraj chi k’ahchi’ kik’erib’iik taqeh bomba, atoob’ ta jenaj keh xpoon rilow i Olena xyojib’ik wo’ i rupaat. Re’ Olena iruq’or: «Noq xiponik taqeh hermano ma’ keht’al ta naq chik chajariik nakiq’orom. Xa re’ la’, xuyeew rukowiil nuk’ux chi wilkeeb’ ar. Xa suq chik xwik’raaj wiib’ chi wilkeeb’ wuuk’…».

Re’ Serguí, jenaj aj k’amal b’eeh pan congregación imponik naq chi rilariik i Olena ruch’ihil ju’jun taqeh k’ijool iruq’or: «Noq xnub’iraj chi xk’er jenaj bomba chi cheel i rupaat i Olena, xchalik nuyo’jiik eh xinqaaj kapeew. Xa re’ la’, xsuqb’ik nuk’ux chi xwil wach i Olena. Xuk’ul i ti’, xa re’ la’, ma’ q’e’ ta naq kow i ruti’kiil. Eh xusach qak’ux chi noq xyojib’ik i rupaat, re’ xupahqaaj i Olena re’ taqeh i ruhuuj chi riij i Santo Laj Huuj».

Insuqb’ik qak’ux runab’jiik chi re’ taqeh i rufamiliar xkiyew jenaj rupaat. Re’ congregación k’ahchi’ ruye’em reh i ajwaal wach chi reh, eh re’ taqeh aj k’amal b’eeh chu’nchel q’iij kiq’orik ruuk’. Eh ruum chi ma’ inb’irinik ta chi korik, re’ taqeh hermano xkisik’ nik’wach ne irub’iraj taqeh moloj iib’. Re’ reh iruq’or: «Wilik pech inwik’raj chi ma’xta chik wansil, xa re’ la’, re’ taqeh moloj iib’ inkiyeew weh i ansil i ajwaal wach chi weh. Re’ taqeh hermano xa chi kok’ xilak kinkiq’o’reej pan teléfono, eh inutyoxej keh i wilih».

Jenaj kaxaro inkiq’or chajariik xkik’ul noq xkiko’leej kiib’ ri’sil jenaj ye’aab’ reh moloj iib’ ruch’ihil 200 chik chi Testigo. Re’ ehk’enb’ees iruq’or: «Xusach nuk’ux rilariik chi re’ taqeh aj k’amal b’eeh xojkicha’jeej ruuk’ k’axooj . Ink’ulik pan nuk’ux i rehtalil i David, re’ reh xukoj pan yohb’aal i ruk’achariik, eh xukansaj jenaj león eh jenaj oso reh ruko’ljiik taqeh i rutentzuun. Re’ taqeh aj k’amal b’eeh wilkeeb’ quuk’ xkiyew pan yohb’aal i kik’achariik reh rusik’ariik qawa’ qahaa’, eh reh rusik’ariik gasolina reh chi ne inqasaqumeej qiib’. Intyoox reh i wilih xojwih’ik pan moloj iib’ eh pan q’oroj k’uhb’aal. Atoob’ ta kow naq i q’aq’inik, re’ taqeh aj k’amal b’eeh pan congregación ki’ooj naq chi rilariik taqeh hermano pan kipaat. Inkik’am naq kiwa’ kihaa’, eh inkiyeew wo’ naq rukowiil kik’ux. Q’e’ looq’ chi weh taqeh winaq wilih. Najtir inukapaaj naq chi aj k’uhtoom chi riij i Santo Laj Huuj eh aj q’orol k’uhb’aal taqeh; Xa re’ la’, yu’naak inukoj rehtaal chi qojkicha’jeej chi korik, eh ne irub’an chi ne inqakoj qak’ux kuuk’. ¡Q’e’ inutyoxej i ehtalil inkikanaa’ qeh! Kow kik’ux eh ne irub’an chi ne inqakoj qak’ux kuuk’, eh qojkicha’jeej ruuk’ k’axooj».

Re’ taqeh testigo reh Jehová reh jenaj congregación ar Ucrania xkitz’ihb’aaj reh i sucursal. Re’ keh xkiq’or i wilih chi riij i kik’amwik b’eeh keh i ki’ilwik reh inkik’ul i ti’ k’axik: «Inqatyoxej ruuk’ chu’nchel qak’ux i inkib’an quum. Irusach qak’ux rilariik chi re’ Jehová irukoj taqeh hermano reh qatob’jiik. Xqil pan qak’achariik i xuq’or i Jesús. Re’ reh xuq’or: Eh wila’ k’ul taq xak’ax awiib’ chawach, chu’nchel i tinamit naa kikojom rehtaal chi hat taq waj tahqaneel» (Juan 13:35).

Chuʼnchel i naqilom inchalik ruukʼ taqeh testigo reh Jehová i wilkeebʼ ar Ucrania. Xa reʼ laʼ, wilik i maʼ xqatzʼihbʼaaj taj, ruum chi kʼaxik qʼorik pan juʼjun taqeh yeʼaabʼ chupaam i tinamit. Pan 21 reh junio reh 2022, reʼ i wilih kʼahchiʼ rukʼulariik ar Ucrania:

• 42 testigo reh Jehová xikimik.

• 83 chi Testigos tiʼ wilkeebʼ.

• 31.185 chi Testigo xkikanaaʼ i kipaat eh xiʼooj pan tokoom yeʼaabʼ, ahaʼ wiiʼ ne inkikoʼleej kiibʼ.

• 495 i paat xisacharik wach.

• 557 i paat xiyojibʼik.

• 1.429 i paat xiyojibʼik kʼisiin.

• Ho’oob’ yeʼaabʼ reh moloj iibʼ xisacharik wach.

• Waxaqiib’ yeʼaabʼ reh moloj iibʼ xiyojibʼik.

• 34 yeʼaabʼ reh moloj iibʼ xiyojibʼik kʼisiin.

• Wilik 27 tzuhbʼ chi hermano, reʼ kiʼilwik reh inkikʼul i tiʼ kʼaxik, kʼahchiʼ keebʼ chi kamanik ar Ucrania.

• Reʼ taqeh i kiʼilwik reh inkikʼul i tiʼ kʼaxik, xkitobʼeej 52.348 chi Testigo reh chi ne inkireq jenoʼ yeʼaabʼ ahaʼ wiiʼ ne inkikoʼleej kiibʼ.

• 23.433 chi testigo reh Jehová xkikanaaʼ i tinamit eh kʼahchiʼ kikʼulum kitobʼaal keh i tokoom chi Testigo.