Ar Ucrania reʼ taqeh testigo reh Jehová suq kikʼux ruum chi kʼahchiʼ woʼ chik keebʼ chi qʼoroj kʼuhbaal pan taq bʼeeh eh holohik kʼahchiʼ relik i kikamaj. Reʼ taqeh superintendente eh reʼ taqeh aj kʼamal bʼeeh pan congregación chupaam i tinamit reʼreʼ inkiqʼor chi reʼ taqeh kʼachareel suq kikʼux ruum chi inkil woʼ chik taqeh hermano chi qʼoroj kʼuhbaal pan taq bʼeeh. Eh wilik inkiqʼor chi intzʼirik naq kiwach ruum chi maʼ inkil ta naq chik taqeh Testigo pan qʼoroj kʼuhbaal.

Reʼ Tatiana, reʼ wilik pan congregación Serhiivka pan tinamit Odesa, xooj woʼ chik rilow taqeh kaʼchareel awach uukʼ xubʼan qʼorik noq ko majaaʼ naq intohqʼik i pandemia. Reʼ reh iruqʼor: «Noq xtohqʼik woʼ chik i qʼoroj kʼuhbʼaal xqil nikʼwach i Jehová xukuxisaj i wilih». Jenaj qʼiij, xpoon rilow jenaj ixoq i maʼ iraaj ta naq tijinik chi riij i Santo Laj Huuj noq ko majaaʼ intohqʼik i pandemia. Xa reʼ laʼ yuʼnaak xa iraaj naq chik qʼorik chi riij i Santo Laj Huuj, eh xutoqʼaaʼ tijinik. Reʼ Tatiana iruqʼor: «Na woʼ chik wojiik chi rilariik taqeh kaʼchareel kuukʼ i xinqʼorik cho najtir eh na woʼ chik nubʼehsam keh i tijinik chi riij i Santo Laj Huuj».

Reʼ Yevheniy eh reʼ Lilia, kiʼibʼ Testigo i wilkeebʼ naq ar Mariúpol xiʼelik pan kipaat eh yuʼnaak kipatinik pan jenaj chik yeʼaabʼ ahaʼ wiiʼ maʼxta qʼaqinik ar woʼ Ucrania. Kikabʼcheel inkibʼan i qʼoroj kʼuhbʼaal eh inkiqʼor chi reʼreʼ intobʼinik keh reh chi maʼ ne ta inkikapaaj taqeh kʼaxkilal kʼahchiʼ kikʼiik wiiʼ. Reʼ keh inkiqʼor: «Qehtʼal naq chi reʼ qakʼachariik na naq rujaljiik wach; reʼ wilih kʼaxik, xa reʼ laʼ qehtʼal chi reʼ Jehová xa irutobʼeej woʼ taqeh rajkamanoom. Qojrutobʼeej ruukʼ i rusanto laj uxlabʼal. Eh reʼ taqeh hermano xa wilkeebʼ woʼ ar reh qatobʼjiik eh reh chi ne woʼ chik inqatoqʼaaʼ kʼacharik pan tokoom yeʼaabʼ».

Chupaam juʼjun taqeh yeʼaabʼ ar Ucrania reʼ taqeh hermano inkibʼan i qʼoroj kʼuhbʼaal ruukʼ i kibʼanooj. Jenaj ehtalil, jenaj tzʼuhbʼ chi Testigo pan tinamit Mykolaiv xkitobʼeej jenaj molaabʼ chi rukorsjiik eh rutusariik wach chuʼnchel i wilik chupaam jenaj yeʼaabʼ inkojarik reh rumolariik taqeh i chajariik reh kitobʼjik taqeh kʼachareel. Reʼ taqeh hermano xkikorsaj taqeh tubo reh i haʼ, xkikorsaj woʼ taqeh yeʼaabʼ reh rutusariik wach xa chajariik eh xitobʼinik reh rutusariik wach i toobʼal na naq ruyeʼariik keh taqeh kʼachareel. Noq jenaj aj ilol reh i molaabʼ xpoon rilow i kamanik xbʼaan, xoqʼik ruum i rusuqkiil rukʼux. Reʼ reh xuqʼor: «Maʼ xnukapaaj ta chi xa holohik chik narukahniik».

Atoobʼ ta reʼ taqeh hermano aj Ucrania kʼahchiʼ kikʼiik chupaam taqeh i kʼaxkilal xa suq woʼ kikʼux ruum chi maʼ inkikanaaʼ ta qʼoroj kʼuhbaal eh maʼ inqʼuhtik ta kikʼux «chubʼanariik otobʼil» (Gálatas 6:9).

Chuʼnchel i naqilom inchalik ruukʼ taqeh testigo reh Jehová i wilkeebʼ ar Ucrania. Xa reʼ laʼ, wilik i maʼ xqatzʼihbʼaaj taj, ruum chi kʼaxik qʼorik pan juʼjun taqeh yeʼaabʼ chupaam i tinamit. Pan 13 reh julio reh 2022, reʼ i wilih kʼahchiʼ rukʼulariik ar Ucrania:

• 42 testigo reh Jehová xikimik.

• 97 chi Testigo tiʼ wilkeebʼ.

• 28,683 chi Testigo xkikanaaʼ i kipaat eh xiʼooj pan tokoom yeʼaabʼ, ahaʼ wiiʼ ne inkikoʼleej kiibʼ.

• 524 i paat xisacharik wach.

• 588 i paat xiyojibʼik.

• 1,554 i paat xiyojibʼik kʼisiin.

• Hoʼoobʼ yeʼaabʼ reh moloj iibʼ xisacharik wach.

• Lajeebʼ yeʼaabʼ reh moloj iibʼ xiyojibʼik.

• 36 yeʼaabʼ reh moloj iibʼ xiyojibʼik kʼisiin.

• Wilik 27 tzuhbʼ chi hermano, reʼ kiʼilwik reh inkikʼul i tiʼ kʼaxik, kʼahchiʼ keebʼ chi kamanik ar Ucrania.

• Reʼ taqeh i kiʼilwik reh inkikʼul i tiʼ kʼaxik, xkitobʼeej 52.947 chi Testigo reh chi ne inkireq jenoʼ yeʼaabʼ ahaʼ wiiʼ ne inkikoʼleej kiibʼ.

• 23.863 chi testigo reh Jehová xkikanaaʼ i tinamit eh kʼahchiʼ kikʼulum kitobʼaal keh i tokoom chi Testigo.