Pan 23 ko pan 31 reh Julio ju’jun taqeh aj q’orol k’uhb’aal ar Ucrania eh chupaam tokoom ye’aab’ aha’ wii’ xi’ooj i xi’elik ar Ucrania, xkiqahsaj kihaa’ chupaam i nimlaj moloj iib’ reh ixib’ q’iij «Chasik’ taq i tuqkilal». Pan 2 reh agosto, 1.123 chi k’achareel kiqahsam naq chik kihaa’ ar Ucrania. Jenaj hermano aj Ucrania iruq’or: «Atoob’ ta ko wilik q’aq’inik, ko k’ahchi’ rusik’ariik taqeh k’achareel inkaaj wih’ik chi rajtahqaneel i Jesús, ruum chi re’ Jesús xuq’or: Re’ hin naa nuwihiik taq awuuk’ chi juneliik» (Mateo 28:20).

Insuqb’ik qak’ux chi ruq’orariik chajariik xk’ularik.

Re’ Natalia, aj Kreminna, reh i tinamit Lugansk, wilik 63 haab’ reh. Re’ reh ruch’ihil i ki’ib’ chi rixq’uun xkitik’aa’ tijinik chi riij i Santo Laj Huuj kuuk’ taqeh testigo reh Jehová pan 1990. Re’ rixq’uun xk’ihik pan uxlab’al eh xuqahsaj ruhaa’, xa re’ la’, re’ reh ma’chih. Noq xtohq’ik i q’aq’inik, jenaj familia testigo reh Jehová taqeh, xkiq’o’reej i Natalia ruch’ihil taqeh i rixq’uun reh rusik’ariik jenaj ye’aab’ keh aha’ wii’ ma’xta ne inkik’ul. Xik’ularik pan jenaj ye’aab’ reh moloj iib’ ar Ivano-Frankivsk.

Re’ Natalia iruq’or: «Noq xik’erib’ik taqeh bomba xsahchik pan nuk’ux nik’wach se’lanik. Re’ taqeh hermano xkik’uhtaaj qeh i manlik wach k’axooj. Ma’ inwuyeej ta naq chi je’re’ nakib’anam. Chupaam i junk’aam re’re’ xnutik’aa’ nuk’axam i Jehová. Inwil naq wach i Santo Laj Huuj rajlal q’iij, eh jenaj hermana xub’ehsaj weh i tijinik chi riij i Santo Laj Huuj ruuk’ i huuj Chasuqkileej ak’achariik chi junelik. Re’ reh jenaj kooch i xuyeew weh i Jehová». Re’ Natalia iruq’or woh’oq: «Q’e’ insuqb’ik nuk’ux chi xnuqahsaj nuhaa’ eh chi hin chik testigo reh Jehová. Inwaaj nukojom pan nuk’achariik i peet k’uhb’aal: Naa ak’axam aaWajaaw aaDios chu’nchel ak’ux, chu’nchel awánima, chu’nchel akapeb’aal» (Mateo 22:37).

Re’ Olia, aj Cherkasy, ma’ ruqahsam ta naq ruhaa’ noq xutik’aa’ i q’aq’inik. Pan 6 reh marzo xooj Polonia ruch’ihil i rixq’uun eh ruch’ihil i riih. Re’ reh iruq’or: «Xa re’ wo’ i koruman naq chi qeh inqak’am, xa re’ la’, re’ taqeh hermano xojkitob’eej eh xojkicha’jeej. Chu’nchel i wilih xuk’uhtaaj weh chi re’ rutinamiit i Jehová wilik pan jenaj wach k’uxliis eh re’ rusanto laj uxlab’al iruk’am kib’eeh. Noq xinik’ik chupaam i wilih, xnuq’or chi nanuq’ahsam i nuk’achariik reh i Jehová. Noq k’ahchi’ naq wik’iik chupaam taqeh ti’ k’axik, re’ Jehová xirutob’eej eh yu’naak inwaaj kamanik chuwach eh nanuk’uhtaam chi inutyoxeej i xub’an wuum».

Re’ Yulia aj Donetsk, 18 haab’ wilik reh. Xk’ihik ruuk’ jenaj familia aha’ wii’ chu’nchel testigo reh Jehová taqeh, xa re’ la’, re’ reh ma’ jaruuj xuqahsaj ruhaa’. Re’ reh iruq’or chajariik xk’ularik noq rutoq’aam naq chik i q’aq’inik. Re’ reh iruq’or: «Naq kutulkiin naq wach ak’al xnukapaaj chi na naq nukimiik. Re’ taqeh b’eeh aha’ naq wii’ qojpatinik ruuk’ i nufamilia xiyojib’ik, xa re’ la’ ma’ xojkimik taj. Noq xqak’ul i wilih, xqab’an qatiij, eh xqakapaaj chi riij i runa’ojb’al i Jehová. Xnujil i koq wiib’ ruuk’ i Jehová eh ma’ xub’an ta chik ki’ib’ nuk’ux: Inwaaj naq nuq’ahsam i nuk’achariik reh i Jehová. Noq re’ Jehová xub’iraj i nutiij, xuk’uhtaaj weh chi ma’ najt ta wilik wuuk’. Najtir weht’al naq wach i Jehová, xa re’ la’ yu’naak inuk’ax i Jehová». Re’ Yulia xuqahsaj ruhaa’ pan 23 reh Julio.

Re’ David 11 haab’ wilik reh. Noq xtohq’ik i q’aq’inik xooj ruch’ihil i rufamilia ar Alemania. Re’ reh jenaj naq aj q’orol k’uhb’aal noq wilik naq 9 haab’ reh. Eh yu’naak re’ reh iraaj rusik’im ruman i rukamaj pan rutinamiit i Jehová. Re’ reh iruq’or: «Re’ hin xnuqahsaj nuhaa’ ruum chi inuk’ax i Jehová eh inwaaj wih’ik chi ramigo. Noq xnuqahsaj nuhaa’, xinoq’ik ruum i rusuqkiil nuk’ux eh ruum chi wilkiin pan rutinamiit i Jehová. Imponik chi nuwach q’orik chi riij i Jehová kuuk’ taqeh k’achareel eh ruq’orariik keh chajariik irub’ehsaj qeh. Inwaaj wih’ik chi aj k’amal b’eeh pan q’oroj k’uhb’aal. Inwaaj kamanik pan congregación eh jeno’ q’iij inwaaj wih’ik chi aj tob’ineel keh taqeh aj k’amal b’eeh pan congregación. Xa re’ la’, re’ xti ne naq imponik chi nuwach, re’ ojik pan Betel; noq ximponik pan sucursal reh Lviv pan 2018, xnukapaaj chi inwaaj kamanik ar».

Re’ Olena, aj Kiev, xutik’aa’ i q’oroj k’uhb’aal pan 2011, xa re’ la’, lajeeb’ haab’ xik’ik chi re’ reh ma’ xponik ta pan moloj iib’. Pan 2020, re’ taqeh aj k’amal b’eeh pan congregación xiq’orik ruuk’ eh xkiyeew reh i huuj Jehová desea que vuelva. Re’ reh iruq’or: «Xnutoq’aa’ wo’ chik nuk’ulum tijinik chi riij i Santo Laj Huuj eh xnutik’aa’ wo’ chik ojik pan taq moloj iib’, xa re’ la’, xponik i q’iij chi xnukanaa’ wo’ chik. Noq k’ahchi’ naq i q’aq’inik, re’ Jehová xub’iraj i nutiij, eh xnukoj rehtaal chi re’ Jehová xko’linik weh, xuk’uhtaaj weh i ruk’axooj eh xuyeew rusuqkiil nuk’ux. Xinooj Rumania eh ar xnureq taqeh Testigo. Re’ taqeh hermano xinkicha’jeej eh xkik’uhtaaj weh i kik’axooj. Re’ k’axooj eh re’ tob’inik xkiyeew weh taqeh hermano, je’ rukab’ jenaj itz’ih xa q’ixin chik paam i xukoj i Jehová chi nunaah». Re’ Olena xuqahsaj ruhaa’ pan 24 reh julio. Re’ reh iruq’or: «Inutyoxeej reh i Jehová chi wilik ruq’uniil wuuk’. Je’ re’ noq, chu’nchel inub’an rub’aan ruuk’ i rukowiil nuk’ux iruyeew i Dios» (Filipenses 4:13).

Chuʼnchel i naqilom inchalik ruukʼ taqeh testigo reh Jehová i wilkeebʼ ar Ucrania. Xa reʼ laʼ, wilik i maʼ xqatzʼihbʼaaj taj, ruum chi kʼaxik qʼorik pan juʼjun taqeh yeʼaabʼ chupaam i tinamit. Pan 2 reh agosto reh 2022, reʼ i wilih kʼahchiʼ rukʼulariik ar Ucrania:

• 43 testigo reh Jehová xikimik.

• 97 chi Testigo tiʼ wilkeebʼ.

• 22.568 chi Testigo xkikanaaʼ i kipaat eh xiʼooj pan tokoom yeʼaabʼ, ahaʼ wiiʼ ne inkikoʼleej kiibʼ.

• 586 i paat xisacharik wach.

• 613 i paat xiyojibʼik.

• 1.632 i paat xiyojibʼik kʼisiin.

• Hoʼoobʼ yeʼaabʼ reh moloj iibʼ xisacharik wach.

• Lajeebʼ yeʼaabʼ reh moloj iibʼ xiyojibʼik.

• 37 yeʼaabʼ reh moloj iibʼ xiyojibʼik kʼisiin.

• Wilik 27 tzuhbʼ chi hermano, reʼ kiʼilwik reh inkikʼul i tiʼ kʼaxik, kʼahchiʼ keebʼ chi kamanik ar Ucrania.

• Reʼ taqeh i kiʼilwik reh inkikʼul i tiʼ kʼaxik, xkitobʼeej 53.836 chi Testigo reh chi ne inkireq jenoʼ yeʼaabʼ ahaʼ wiiʼ ne inkikoʼleej kiibʼ.

• 24.867 chi testigo reh Jehová xkikanaaʼ i tinamit eh kʼahchiʼ kikʼulum kitobʼaal keh i tokoom chi Testigo.