Pan agosto reh 2022, xqʼorarik chi reʼ taqeh hermano ar Ucrania na woʼ naq chik kelik chi qʼoroj kʼuhbʼaal chiʼ taq paat, ahaʼ wiiʼ maʼ kow ta wach i qʼaqʼinik. Reʼ taqeh hermano xa inkaaj naq chik ojik chi qʼoroj kʼuhbʼaal eh xkireq kʼih taqeh i kʼachareel inkaaj naq kibʼiram chi riij i Santo Laj Huuj. Jenaj kʼachareel xutikʼaaʼ rukʼulum i rutijinik chi riij i Santo Laj Huuj, xuqʼor: «Noq xwilow i tiʼ kʼaxik xkʼularik ruum i qʼaqʼinik, xnukoj rehtaal chi xa reʼ woʼ i Dios ne irukorsaj wach taqeh kʼaxkilal». Reʼ i wilih xkʼularik pan qʼoroj kʼuhbʼaal chiʼ taq paat.

Reʼ Ruslan reh i molaabʼ Lanivtsi inyoʼjik naq, chi ojik woʼ chik chi qʼoroj kʼuhbʼaal chiʼ taq paat. Reʼ reh ruchʼihiil i rehkʼeen xkibʼan kitiij reh chi ne inwihʼik rukowiil kikʼux eh chi reʼ Jehová ne intoobʼinik keh chi rureqariik taqeh kʼachareel inkaaj kibʼiraam chi riij i kʼachariik chalik reh. Reʼ taqeh hermano wilih xsahchik kikʼux noq xa kiʼibʼ hora naq inkikʼam chi qʼoroj kʼuhbʼaal, xkireq waxaqiibʼ chi kʼachareel inkaaj naq tijinik chi riij i Santo Laj Huuj.

Reʼ Olha, reh i molaabʼ Kremenets, kʼahchiʼ naq kiqʼorom i kʼuhbʼaal ruukʼ i ruchʼihiil noq jenaj winaq xupahqaaj keh mi kʼahchiʼ naq keebʼ chi qʼorik chi riij i ruqʼorbʼal i Dios. Xuqʼor woʼ keh taqeh hermana: «Reʼ hin inubʼan i siikʼ eh i bʼanaj haʼ. Wehtʼal chi naruponiik i qʼiij chi reʼ Dios narupahqaam weh chajariik i kʼahchiʼ nubʼanam. Noq ne imponik i qʼiij reʼreʼ, maʼ inwaaj ta wihʼik jeʼ rukabʼ wilkiin yuʼnaak». Reʼ taqeh hermano reh i yeʼaabʼ reʼreʼ xkiqʼor chi nakiyeʼem rutijiniik.

Noq qʼoroj kʼuhbʼaal naq kʼahchiʼ, reʼ i Vasyl reh i molaabʼ Lviv-Riasne-Skhidnyi xunabʼeej wach jenaj ixoq reʼ ruqʼorom naq chik reh i kʼuhbʼaal najtir cho qʼiij. Reʼ reh xkʼulik pan rukʼux chi reʼ ixoq reʼreʼ qʼeʼ josqʼ naq eh maʼ iraaj ta naq qʼorik kuukʼ taqeh testigo reh Jehová. Reʼ reh xuqʼoj wach i rupuerta eh xubʼehsaj reh jenaj tijinik chi riij i Santo Laj Huuj. Xsahchik rukʼux noq reʼ ixoq xelik cho eh xuqʼor reh chi iraaj naq rureqem chi riij i Santo Laj Huuj. Reʼ ixoq xutikʼaaʼ tijinik chi riij i Santo Laj Huuj eh reʼ taqeh hermano xkitikʼaaʼ kikʼuhtaam reh.

Reʼ Serhii, wilik pan molaabʼ Illintsi xuqahsaj ruhaaʼ pan 2021, xa reʼ laʼ maʼ rubʼanam ta naq i qʼoroj kʼuhbʼaal chiʼ taq paat. Inyoʼjik naq, xa reʼ laʼ xuyejaaʼ riibʼ reh ojik chi qʼoroj kʼuhbʼaal chiʼ taq paat. Reʼ Serhii iruqʼor: «Kʼih pech xwilow taqeh video reh qʼoroj kʼuhbʼaal. Chi riij i reʼ xa kʼahchiʼ naq wuyʼeem chi ne inkiyeew rukowiil nukʼux». Eh xuqʼor woʼ chi maʼ inyoʼjik ta naq chik. Insuqbʼik laʼ rukʼux chi ruqʼorarik i akʼ kʼuhbʼaal keh taqeh kʼachareel.

Jeʼ woʼ reʼ xkʼularik ruukʼ i Nikol, reʼ i wilik pan molaabʼ Rozdil xponik chi ajqʼorol kʼuhbʼaal pan agosto reh 2022 chi ko majaaʼ iruqahsaj ruhaaʼ. Reʼ reh iruqʼor: «Qʼe naq kinyoʼjik chi ojik chi qʼoroj kʼuhbʼaal chiʼ taq paat. Xa reʼ laʼ noq xnubʼan i wilih, qʼeʼ xsuqbʼik nukʼux chi xinqʼorik kuukʼ i kʼachareel chi riij i Jehová».

Chuʼnchel i naqilom inchalik ruukʼ taqeh testigo reh Jehová reʼ wilkeebʼ Ucrania. Xa reʼ laʼ, wilik i maʼ xqatzʼihbʼaaj taj ruum chi kʼaxik runabʼjiik inkʼularik pan juʼjun taqeh yeʼaabʼ chupaam i tinamit reʼreʼ. Reʼ wilih kʼahchiʼ rukʼulariik ar Ucrania, 11 reh noviembre reh 2022.

• 46 testigo reh Jehová xikimik

• 97 chi Testigos tiʼ wilkeebʼ

• 12,569 chi Testigo xkikanaaʼ i kipaat eh xiʼooj pan tokoom yeʼaabʼ, ahaʼ wiiʼ ne inkikoʼleej kiibʼ

• 590 chi paat xyoj chi jun pech

• 645 chi paat xiyojibʼik

• 1,722 chi paat maʼ xti xiyojibʼik ta

• 6 chi yeʼaabʼ reh moloj iibʼ xyoj chi jun pech

• 19 yeʼaabʼ reh moloj iibʼ xiyojibʼik

• 63 yeʼaabʼ reh moloj iibʼ maʼ xti xiyojibʼik ta

• 27 tzʼuhbʼ chi hermano reʼ kiʼilwik reh inkikʼul i tiʼ kʼaxik, kʼahchiʼ keebʼ chi kamanik ar Ucrania

• Reʼ taqeh i kiʼilwik reh inkikʼul i tiʼ kʼaxik, xkitobʼeej i 53,948 chi Testigo, reh chi ne inkireq jenoʼ yeʼaabʼ ahaʼ wiiʼ ne inkikoʼleej kiibʼ

• 25,983 chi testigo reh Jehová xkikanaaʼ i kitinamiit eh kʼahchiʼ kitobʼjik ruum taqeh i kuchʼihiil chi nimanik