Pan ju’jun taqeh ye’aab’ aha’ wii’ kow i q’aq’inik, je’ rukab’ ar Mariúpol, ma’xta luz eh ma’xta ne inkitz’a’b’isaj wii’ kiib’, re’ taqeh teléfono eh Internet ma’ kikamanik ta chik . Re’ taqeh ventana reh taqeh paat xiyojib’ik, ma’xta chik wi’k eh ma’xta ha’. Wilik na 2.500 chi testigo reh Jehová ma’ inkib’an ta elik ar Mariúpol. Pan ju’jun taqeh ye’aab’, je’ rukab’ ar Bucha, Chernígov, Hostómel, Irpín, Kiev eh Sumi, xkiteh taqeh b’eeh reh chi re’ taqeh k’achareel ne inkib’an elik. Re’ wilih xub’an chi k’ih taqeh Testigo ne ki’ooj pan tokoom ye’aab’ reh chi ne inkiko’leej kiib’.

Jenaj Testigo i wilik reh 36 haab’, aj k’amal b’eej pan congregación eh precursor, impatinik ar Hostómel xi’elik rejeh ar ruch’ihil i rehk’een eh ruch’ihil taqeh rajaaw. Re’ reh iruq’or chajarik xkik’ul noq re’ q’aq’inik xku’loq chi naah i tinamit:

«Inqab’iraj naq noq k’ahchi’ kik’iik taqeh helicóptero chi naah i qapaat, eh re’ taqeh b’eeh nujenaq naq taqeh chi ch’ihch’ inkikoj taqeh aj q’aq’ineel. Chi riij i re’ ju’jun taqeh soldado xkiteh i paat noq k’ahchi’ naq qako’leem qiib’ ri’sil i paat, eh jenaj xutik’aa’ puhb’anik aha’ wilkooj wii’. Manlik xkiyeew reh i rumochila i nutuut, xa re’ la’ ma’ awach ta xb’aan reh.

Ma’ xojk’uyu’jik taj eh ma’ xojq’orik taj chuwach ixib’ oon kijib’ hora, xa inqab’iraj naq noq k’ahchi’ keeb’ chi kutuj bomba eh noq k’ahchi’ keeb’ chi q’aq’inik chi qanaah. Pan jenaj chik q’iij, noq k’ahchi’ naq kooj chi elik ar, k’ahchi’ naq keeb’ chi q’aq’inik chi qacheel. Pan b’eeh wilik naq taqeh chi’hch’ reh q’aq’inik. Yohb’aal naq, xa re’ la’ q’e’ naq chik yohb’aal mi xojkahnik ar.

Chu’nchel i wilih xujal wach i qak’achariik. Xqatijej rukojariik pan qak’achariik i iruq’or i Santo Laj Huuj. Jenaj ehtalil, ma’ na ta qayo’jiik chi riij i naruk’ulariik eqal, chi suq qak’ux ruuk’ i wilik qeh eh chi naqakojom qak’ux ruuk’ i Jehová noq k’ahchi’ qik’iik pan ti’ k’axik».

Qeht’al chi re’ Jehová, i qaDios, k’ahchi’ rilom taqeh k’axkilal k’ahchi’ kik’iik wii’ taqeh hermano ar Ucrania. Re’ reh ma’ jaruuj narukanaam taqeh (2 Pedro 2:9).

Pan 10 reh marzo reh 2022, reʼ i wilih kʼahchiʼ rukʼulariik ar Ucrania:

• Ki’ib’ testigo reh Jehová xikimik.

• Waxaqiib’ chi Testigo tiʼ wilkeebʼ.

• 25.407 chi Testigo xkikanaaʼ i kipaat eh xiʼooj pan tokoom ye’aab’, ahaʼ wiiʼ ne inkikoʼleej kiibʼ.

• 25 i paat xisacharik wach.

• 59 i paat xiyojibʼik.

• 222 paat xiyojibʼik kʼisiin.

• 7 chi yeʼaabʼ reh moloj iibʼ xiyojibʼik.

• Wilik 27 tzuhbʼ chi hermano, reʼ kiʼilwik reh inkikʼul i tiʼ kʼaxik, kʼahchiʼ keeb’ chi kamanik ar Ucrania.

• Reʼ taqeh i kiʼilwik reh inkikʼul i tiʼ kʼaxik, xkitobʼeej 20.981 chi Testigo reh chi ne inkireq jenoʼ yeʼaabʼ ahaʼ wiiʼ ne inkikoʼleej kiibʼ.

• 9.635 Testigo xkikanaaʼ i tinamit eh kʼahchiʼ kikʼulum kitobʼaal keh i tokoom chi Testigo.