Inti’b’ik qak’ux ruq’orariik chi pan 29 reh marzo reh 2022 xikimik wo’ chik wuquub’ chi testigo reh Jehová ar Mariúpol. Yu’naak 17 chi Testigo kamnaq chik taqeh ar Ucrania.

Re’ i ki’ilwik reh taqeh inkik’ul i ti’ k’axik ar Ucrania k’ahchi’ kikamanik chi kow eh inkiyeew pan yohb’aal i kik’achariik reh rusik’ariik taqeh hermano oon reh kitob’jik taqeh i k’ahchi’ kik’ulum i ti’ k’axik aha’ wii’ kow i q’aq’inik.

Jenaj ehtalil, re’ i ki’ilwik reh taqeh inkik’ul i ti’ k’axik xkib’an ruk’amariik i k’uxb’al, eq’oom eh re’ ajwal wach chupaam taqeh i ye’aab’ aha’ wii’ re’ q’aq’inik xusach wach chu’nchel, je’ rukab’ ar Járkov, Kramatorsk eh Mariúpol. Jenaj keh i ki’ilwik keh i inkik’ul i ti’ k’axik, inb’ehik xiik’ naah 500 kilómetros rajlal q’iij, atoob’ ta inik’ik chupaam taqeh ye’aab’ aha’ wii’ yohb’aal iruk’am i wi’k eh eq’oom keh i 2.700 chi Testigos.

Re’ i ki’ilwik reh taqeh inkik’ul i ti’ k’axik xkikorsaj wach nik’wach nakisam taqeh hermano chupaam taqeh ye’aab’ aha’ wii’ yohb’aal eh kow i q’aq’inik. Jenaj reh i ki’ilwik reh inkik’ul i ti’ k’axik ar Chernígov iruq’or: «Noq re’ taqeh aj q’aq’ineel xkitik’aa’ rukutariik taqeh bomba, xqakoj rehtaal chi yohb’aal naq chi ne qojkahnik chupaam i tinamit. Ruum chi ma’xta naq Internet ni xata luz, re’ taqeh aj k’amal b’eeh pan congregación xa re’ yu’ xi’elik, atoob’ ta yohb’aal, xi’elik reh rusik’ariik taqeh hermano wilkeeb’ naq ri’sil taqeh paat reh ruq’orariik keh chi wilik naq chik jenaj ch’ihch’ reh chi ne ki’elik chupaam i tinamit re’re’».

Jenaj winaq xukimeleej taqeh i ruch’ihch’ reh risjiik taqeh hermano, eh re’ reh xub’an rub’esjiik jenaj ch’ihch’ b’elejeeb’ pech reh risjiik 254 chi Testigo ar Chernígov. Jenaj pech xukorsaj i b’eeh, reh chi re’ i ruch’ihch’ ne naq inik’ik. Re’ taqeh hermano xkityoxej i otob’il xb’aan keh ruum i winaq wilih.

Q’e’ ti’ qak’ux ruum taqeh familia i xikimik awach keh ruum i q’aq’inik wilih, eh inquyeej chi ne inooj eloq wach i ruq’orom chaloq i Dios pan ruq’orb’al, pan Santo Laj Huuj: chi ma’ na ta chik rilariik wach i kimik, ni xata oq’ik, ni xata ti’kiil k’uxliis (Apocalipsis 21:3, 4).

Chuʼnchel i naqilom inchalik ruukʼ taqeh testigo reh Jehová i wilkeebʼ ar Ucrania. Xa reʼ laʼ, wilik i maʼ xqatzʼihbʼaaj taj, ruum chi kʼaxik qʼorik pan juʼjun taqeh yeʼaabʼ chupaam i tinamit. Pan 29 reh marzo reh 2022, reʼ i wilih kʼahchiʼ rukʼulariik ar Ucrania:

• 17 testigo reh Jehová xikimik.

• 35 chi Testigo tiʼ wilkeebʼ.

• 36.313 chi Testigo xkikanaaʼ i kipaat eh xiʼooj pan tokoom ye’aab’, ahaʼ wiiʼ ne inkikoʼleej kiibʼ.

• 114 i paat xisacharik wach.

• 144 i paat xiyojibʼik.

• 612 paat xiyojibʼik kʼisiin.

• Jenaj ye’aab’ reh moloj iib’ xsacharik wach.

• Wuqub’ yeʼaabʼ reh moloj iibʼ xiyojibʼik.

• 23 chi yeʼaabʼ reh moloj iibʼ xiyojibʼik kʼisiin.

• Wilik 27 tzuhbʼ chi hermano, reʼ kiʼilwik reh inkikʼul i tiʼ kʼaxik, kʼahchiʼ keeb’ chi kamanik ar Ucrania.

• Reʼ taqeh i kiʼilwik reh inkikʼul i tiʼ kʼaxik, xkitobʼeej 34.739 chi Testigo reh chi ne inkireq jenoʼ yeʼaabʼ ahaʼ wiiʼ ne inkikoʼleej kiibʼ.

• 16.175 chi testigo reh Jehová xkikanaaʼ i tinamit eh kʼahchiʼ kikʼulum kitobʼaal keh i tokoom chi Testigo.