Inti’b’ik qak’ux ruq’orariik chi k’ih taqeh testigo reh Jehová xikimik ruum i q’aq’inik ar Ucrania. 28 chi testigo xikimik chik.

Re’ inkiq’or rub’iral ink’ularik chi junsut i nah ak’al, inkiq’or chi chupaam ju’jun taqeh ye’aab’ ar Kiev, chuwach taqeh i peet xamano kow i q’aq’inik xb’aan ar. Chupaam i ye’aab’ re’re’, kipatinik naq 4.900 chi Testigo; xik’ik chi 3.500 i xkikanaa’ i kipaat eh xi’ooj pan tokoom ye’aab’.

Re’ taqeh hermano i wilkeeb’ aha’ wii’ kow i q’aq’inik, atoob’ ta k’ahchi’ kik’iik chupaam taqeh ti’ k’axik inkik’uhtaaj chi kow kik’ux ruuk’ i Jehová.

Re’ Olexánder , jenaj aj k’amal b’eeh pan congregación reh i tinamit Makáriv, xooj pan jenaj ye’aab’ aha’ wii’ ne’ iruko’leej riib’ ar Ucrania. Xa re’ la’, xti’b’ik ruk’ux ruum chi ma’ xub’an ta q’orik ruuk’ kijib’ aj q’orol k’uhb’aal, re’ i wilkeeb’ naq ruuk’ pan q’oroj k’uhb’aal, ruum ajre’ xooj rusik’ taqeh hermano wilih aha’ wii’ kipatinik, atoob’ ta k’ahchi’ naq i q’aq’inik. Re’ reh iruq’or: «Re’ hin weht’al naq chi reh i Jehová, looq’ naq chi reh taqeh rajkamanoom. Noq ximponik chi chii’ i rupaat jenaj keh taqeh hermano wilih, xwil chi yojinaq i rupaat ruum taqeh bomba. Re’ puerta wilik ri’sil i kipaat tz’aplik naq, eh ma’ awach ta naq inb’irinik weh. Q’e’ xinyo’jik». Re’ Olexánder xukut i puerta i wilik chi ri’sil i paat eh xureq juntzuhb’ chi k’achareel. Ar naq wilkeeb’ taqeh hermano eh ju’jun taqeh kika’jaaj i ma’ re’ ta naq testigo taqeh, k’ahchi’ naq kiko’leem kiib’ kuuk’.

Re’ Yaroslav, jenaj keh taqeh Testigo i wilik naq ri’sil i paat re’re’, xuq’or chi waxaqiib’ naq chik q’iij inkik’am ar chi kiko’ljik kiib’. Re’ reh iruq’or: «Xa ju’jun taqeh i galleta eh xa jenaj naq kulk chi ha’ wilik qeh chi qaju’junaal chuwachi i q’iij. Xa re’ la’, inqil naq wach i Santo Laj Huuj eh taqeh i qahuuj, inqab’an naq qatiij eh inqakowej naq qiib’ chi qawach. Noq’ xnub’iraj chi re’ Olexánder xuq’or i nub’ihnaal, xnukapaaj chi jenaj soldado k’ahchi’ kiin rusik’im. Xnukapaaj chi na naq nukimiik. Xa re’ la’, re’reh xojruko’leej chi qunchelaal. Inqatyoxej reh i Jehová, ruum chi wilik taqeh hermano inkaaj qawach, inkib’an kitiij chi qiij eh inkiyeew pan yohb’aal i kik’achariik reh qako’ljiik.

Re’ Pilip ruch’ihil jenaj chik hermano inkaaj naq kik’aman kiwa’ taqeh Testigo i xikahnik chupaam i tinamit Borodianka. Pan 17 reh i poh marzo, noq ojik naq inkib’an pan tinamit, ju’jun taqeh i soldado xkik’am i rukarro i Pilip eh xkik’am i k’uxb’al inkik’am. Chi riij i re’, re’ taqeh i soldado xkik’am taqeh prexo, xkitz’ap i naq’ kiwach eh xik’amarik chupaam jenaj k’isa ye’aab’, ri’sil jenaj paat aha’ wii’ wilkeeb ’wuquub’ chi winaq. Ki’ib’ q’iij xik’ik’ eh xik’amarik pan jenaj chik ye’aab’ aha’ wii’ wilkeeb’ taqeh prexo eh ar xiq’ojarik taqeh chu’chel i aq’ab’ kuum taqeh aj cha’jen prexo. Re’ Pilip xuq’or: «Ma’ weht’al ta naq mi na naq nuk’achariik. Xnupahqaaj reh i Jehová chi ne’ kirutob’eej reh chi korik wach nuk’ux».

Noq k’ahchi’ naq kiq’ojom i Pilip, xub’an rutiij reh chi ne’ inko’ljik i rufamilia eh xub’an rutiij kuum taqeh hermana nim chik i kihab’ul i maxta kiwa’, eh xutyoxej reh i Jehová ruum chi suq ruk’ux chi xkamanik chuwach chu’nchel taqeh haab’ xik’ik. Noq re’ aj cha’janeel keh taqeh prexo xukoj i hermano chi prexo, re’ hermano xub’an rutiij kuum taqeh soldado, reh chi ne’ inkireq chi riij chi re’ taqeh testigo reh Jehová ma’ yiib’ ta naq wach i kina’ojb’al. Re’ taqeh hermano wilih, chuwach ki’ib’ q’iij, xkitoq’aa’ kiq’orom i k’uhb’aal keh taqeh aj cha’jen taqeh prexo. Eh jenaj prexo iraaj naq runab’eem iruq’or i Santo Laj Huuj eh q’e’ xutyoxej keh taqeh hermano i xkib’an. Pan 27 reh marzo, re’ i ki’ib’ chi Testigo eh re’ winaq iraaj naq rutijem chi riij i Santo Laj Huuj xi’isjik cho prexo.

Re’ Svitlana, jenaj hermana ma’xta rub’ahil inpatinik naq ar Bucha, ma’ xub’an ta elik chuwach ki’ib’ xamano aha’ wii’ kow naq i q’aq’inik. Re’ reh iruq’or: «Xnureq chi riij chi q’e’ naq ajwal wach i suqkiil k’uxliis iruyeew i Jehová. Mi suq qak’ux, re’re’ ma’ iraaj ta ruq’orom chi xa qeht’al wo’ hoq chajarik naqab’anam, iraaj la’ ruq’orom chi, noq k’ahchi’ kooj chi ik’ik chupaam jeno’ ti’ k’axik, ko ruman chi ne’ inqakoj qak’ux ruuk’ i Jehová».

Noq re’ Svitlana ojik naq irub’an pan jenaj chik ye’aab’ reh ruko’ljik i ruk’achariik, xuq’or i k’uhb’aal reh jenaj ixoq ruch’ihil i rikaaq’. Chi kunchelaal xiponik chi suq kik’ux pan jenaj chik ye’aab’, eh jenaj familia chi Testigo xkiq’or keh chi ne’ kiwih’ik pan kipaat. Re’ familia wilih xuq’or reh i Svitlana eh reh i ixoq ruch’ihil i rikaaq’ chi ne’ kikahnik pan rupaat chupaam i chaq’ab’ re’re’. Chupaam i jenaj chik q’iij, re’ ixoq xupahqaaj mi ne naq irub’an chi ne’ inwih’ik pan moloj iib’ eh xupahqaaj jenaj Santo Laj Huuj eh ju’jun taqeh qahuuj. Re’ Svitlana ko k’ahchi’ ruq’oriik ruuk’ i ixoq wilih.

Chuʼnchel i naqilom inchalik ruukʼ taqeh testigo reh Jehová i wilkeebʼ ar Ucrania. Xa reʼ laʼ, wilik i maʼ xqatzʼihbʼaaj taj ruum chi kʼaxik qʼorik pan juʼjun taqeh yeʼaabʼ chupaam i tinamit. Pan 12 reh abril reh 2022, reʼ i wilih kʼahchiʼ rukʼulariik ar Ucrania:

• 28 testigo reh Jehová xikimik

• 48 chi Testigo tiʼ wilkeebʼ

• 40.778 chi Testigo xkikanaaʼ i kipaat eh xiʼooj pan tokoom ye’aab’, ahaʼ wiiʼ ne inkikoʼleej kiibʼ

• 278 i paat xisacharik wach

• 268 i paat xiyojibʼik

• 746 paat xiyojibʼik kʼisiin

• Jenaj ye’aab’ reh moloj iib’ xsacharik wach

• Belejeeb’ yeʼaabʼ reh moloj iibʼ xiyojibʼik

• 26 chi yeʼaabʼ reh moloj iibʼ xiyojibʼik kʼisiin

• Wilik 27 tzuhbʼ chi hermano, reʼ kiʼilwik reh inkikʼul i tiʼ kʼaxik, kʼahchiʼ keeb’ chi kamanik ar Ucrania.

• Reʼ taqeh i kiʼilwik reh inkikʼul i tiʼ kʼaxik, xkitobʼeej 41.974 chi Testigo reh chi ne inkireq jenoʼ yeʼaabʼ ahaʼ wiiʼ ne inkikoʼleej kiibʼ.

• 18.097 chi testigo reh Jehová xkikanaaʼ i tinamit eh kʼahchiʼ kikʼulum kitobʼaal keh i tokoom chi Testigo