Insuqb’ik qak’ux ruq’orarIik taq aweh chi, re’ taqeh hermano reh i tinamit Ucrania xkib’an wih’ik pan moloj iib’ reh i ruk’uliik pan qak’ux i rukimiik i Jesús chupaam chu’nchel i tinamit. Chupaam ju’jun taqeh ye’aab’ ar Ucrania xkikoj taqeh ye’aab’ reh moloj iib’ reh chi re’ taqeh hermano i k’ahchi’ kik’ulum i ti’ ruum i q’aq’inik ne’ naq kiwih’ik pan moloj iib’ reh i ruk’uliik pan qak’ux i rukimiik i Jesús. Wilik taqeh i xiwihik kuuk’ taqeh hermano aha’ wii’ xb’aan i moloj iib’, eh re’ i ma’ xkib’an ta elik pan kipaat xa xiwih’ik pan videoconferencia.

Chupaam ju’jun taqeh ye’aab, inb’irjik naq taqeh alarma. Re’ taqe alarma wilih inb’irjik naq chu’nchel i q’iij noq na naq rub’aan i moloj iib’ reh i ruk’ulik pan qak’ux i rukimiik i Jesús, xa re’ la’ noq xokik i aq’ab’, re’ taqe alarma wilih xichuhpik. Re’ Sherhiy aj Druzhkivka reh i tinamit Donetsk iruq’or: Xqapahqaaj reh i Jehová pan qatiij chi re’ i puhb’anik ma’ ne’ ta naq imponik noq wilkooj naq pan moloj iib’, eh noq na naq qatik’aa’m i moloj iib’, ma’ xqab’iraj ta chik i puhb’anik eh ma’ xqab’iraj ta chik taqeh alarma.

Juntzuhb’ chi testigo reh Jehová i nimaq chik i kihab’ul eh yowaab’ taqeh ar Nemishaeve ma’ naj ta ruuk’ i tinamit Kiev, ik’inaq naq chik jenaj poh eh ko majaa’ naq kiponik pan jenaj moloj iib’ eh inkib’an naq kitiij reh chi ne naq kiwih’ik pan moloj iib’ reh i ruk’uliik pan qak’ux i rukimiik i Jesús. Re’ Vitali, jenaj aj k’amal b’eeh pan congregación, xutoob’eej taqeh reh chi ne naq kiwih’ik pan moloj iib’ wilih. Re’ reh iruq’or: «Q’e’ naq k’uxik; ma’xta wo’ naq luz, je’re’ noq chupaam i moloj iib’ xqakoj taqeh i foco. Ruum chi ma’xta naq wilik qeh reh chi ne’ inqab’iraj taqeh tz’uuy, re’ wixq’uun xukoj i ruviolín reh chi ne’ inqatz’uyej wach i Jehová».

Re’ Olexánder, jenaj aj k’amal b’eeh pan congregación i wilik aha’ wii’ kow i q’aq’inik, inq’orik chi riij i yuq’inik xkib’an reh i ruk’uliik pan qak’ux i rukimiik i Jesús. «Ma’ inqab’an ta naq rutz’ihb’jIik taqeh cartas keh taqeh k’achareel aha’ wii’ wilkooj, ruum chi re’ taqeh paat xiyojib’ik ruum taqeh bomba, eh re’ taqeh k’achareel xi’ooj pan tokoom ye’aab’. Ruum ajre’ xqayuq’ej taqeh i qeht’aliim kiwach, re’ taqeh i k’ahchi’ kiko’leem kiib’ ri’sil paat eh re’ taqeh i xi’ooj chi qiij. Wilik i ma’ kib’iram ta naq taqeh testigo reh Jehová, xa re’ la’ k’ih taqeh xiwih’ik quuk’ pan moloj iib’».

Atoob’ ta ma’ k’ih ta qeht’al chi riij taqeh i congregación ar Ucrania, qeht’al chi 210.000 chi k’achareel xiwih’ik pan ruk’uliik pan qak’ux i rukimiik i Jesús.

Jenaj testigo reh Jehová ar Ucrania iruq’or nik’wach xrik’raaj riib’ noq xwih’ik pan moloj iib’ reh i ruk’uliik pan qak’ux i rukimiik i Jesús: «Noq jeno’ wilik pan ha’ eh irukoj rehtaal i rusaqumaal jenaj faro, re’re’ iruk’uhtaaj reh chi ma’ najt ta chik wilik ruuk’ ak’al. Je’re’ wo’ xk’ularik wuuk’, re’ i moloj iib’ reh i ruk’uliik pan qak’ux i rukimiik i Jesús iruk’uhtaaj weh chi ma’ najt ta chik wilik i ruq’ijil i Jehová. Eh re’ haab’ wilih je’re’ xnukoj rehtaal».

Chuʼnchel i naqilom inchalik ruukʼ taqeh testigo reh Jehová i wilkeebʼ ar Ucrania. Xa reʼ laʼ, wilik i maʼ xqatzʼihbʼaaj taj, ruum chi kʼaxik qʼorik pan juʼjun taqeh yeʼaabʼ chupaam i tinamit. Pan 21 reh abril reh 2022, reʼ i wilih kʼahchiʼ rukʼulariik ar Ucrania:

• 35 testigo reh Jehová xikimik.

• 60 chi Testigos tiʼ wilkeebʼ.

• 43,792 chi Testigos xkikanaaʼ i kipaat eh xiʼooj pan tokoom ye’aab’, ahaʼ wiiʼ ne inkikoʼleej kiibʼ.

• 374 i paat xisacharik wach.

• 347 i paat xiyojibʼik.

• 874 paat xiyojibʼik kʼisiin.

• Jenaj ye’aab’ reh moloj iib’ xsacharik wach.

• 10 yeʼaabʼ reh moloj iibʼ xiyojibʼik.

• 27 chi yeʼaabʼ reh moloj iibʼ xiyojibʼik kʼisiin.

• Wilik 27 tzuhbʼ chi hermano, reʼ kiʼilwik reh inkikʼul i tiʼ kʼaxik, kʼahchiʼ keeb’ chi kamanik ar Ucrania.

• Reʼ taqeh i kiʼilwik reh inkikʼul i tiʼ kʼaxik, xkitobʼeej 44.971 chi Testigos reh chi ne inkireq jenoʼ yeʼaabʼ ahaʼ wiiʼ ne inkikoʼleej kiibʼ.

• 19.961 chi testigo reh Jehová xkikanaaʼ i tinamit eh kʼahchiʼ kikʼulum kitobʼaal keh i tokoom chi Testigo.