Ruuk’ i kitob’inik i 27 tzuhb’ chi hermano ki’ilwik reh inkik’ul i ti’ k’axik, re’ sucursal keh taqeh testigo reh Jehová ar Ucrania, k’ahchi’ rutob’eem taqeh hermano k’ahchi’ kikanaam i kitinamiit ruum i q’aq’inik. Noq xutoq’aa’ i q’aq’inik, re’ taqeh hermano aj Polonia kitaq’aam ik’inaq 250 tonelada chi tob’inik, xkitaq’aaj k’uxb’al, kiso’ eh kixab’oon. Eh ma’ xa re’ taj i re’: Re’ taqeh Testigo wilkeeb’ ar Ucrania aha’ wii’ ma’ kow taj i q’aq’inik, xkitaq’aaj 80 tonelada chi k’uxb’al.

Re’ Valentina, impatinik naq ar Kiev, xtob’jik kuum taqeh hermano ki’ilwik reh inkik’ul i ti’ k’axik. Re’ reh xutz’ihb’aaj i wilih: «Noq xtohq’ik i q’aq’inik, k’axik naq kahnik pan tinamit. Ruum ajre’ xinooj pan jenaj k’isa ye’aab’ Cherkassi i rub’ihnaal, eh ki’ib’ poh chik inuk’am ayu’. Re’ taqeh hermano kipatinik inkiyeew kik’ux chi wiij. K’ih k’uxb’al xkik’am weh eh je’ wo’ nuxab’oon. Noq inukapaaj chi riij i tob’inik xkiyeew weh, re’ wilih irutz’a’aj i wanima. Chi xilak i tob’inik wilih wilik naq jenaj huuj xutz’ihb’aaj jenaj k’isa xq’un kijib’ haab’ wilik reh, Blanca i rub’ihnaal, eh ar inchalik wo’ naq jenaj huuj korsamaj ruuk’ acuarela. Nanumolom (nanukolom) taqeh i wilih reh chi ma’ ne ta insahchik pan nuk’ux taqeh i kooch xnuk’ul. Inutyoxej keh taqeh hermano eh, xti q’e’ wo’ chik inutyoxej reh i Jehová».

Jenaj chik Testigo Valentina i rub’ihnaal aj Sieverodonetsk, 83 haab’ wilik reh eh ma’ irub’an ta b’ehik, xutz’ihb’aaj i wilih: «Noq xutoq’aa’ i q’aq’inik, wutkeel naq. Xa jenaj naq i wak’uun, xa re’ la’ xkimik noq ko majaa’ intohq’ik i q’aq’inik. Q’e’ naq kinyo’jik ruum chi kow naq i q’aq’inik chupaam i tinamit. Ma’xta naq ha’, ma’xta naq luz eh ma’xta naq gas, eh re’ internet ma’ q’e’ ta naq inkamanik. Q’e’ inutyoxej keh taqeh hermano i xinkitob’eej, atoob’ ta xkiyeew pan k’axkilaal i kik’achariik».

Re’ reh iruq’or wo’ hoq: «Chi riij i re’, re’ taqeh hermano xojkik’am i hin eh ki’ib’ chik chi hermana i yowaab’ wo’ taqeh, xojkik’am ar Dnipro, jenaj ye’aab’ aha’ wii’ ma’xta yohb’aal. Re’ taqeh hermano xkisik’ aha’ ne kinkahnik, eh yu’naak kimpatinik ruuk’ jenaj familia incha’jinik weh. Je’ wak’uun wixq’uun taqeh. Eh xkisik’ jenaj nuteléfono reh chi ne kinwih’ik pan taq moloj iib’. Ma’ jaruuj narusahchiik pan nuk’ux i xkib’an taqeh hermano».

Xti q’e’ suq qak’ux, eh inqatyoxej i ruk’axooj i Qajaaw Jehová, ruum chi k’ahchi’ rucha’jeem taqeh hermano ar Ucrania, ruuk’ ruye’ariik keh chu’nchel i ajwal wach chi keh (Salmo 34:10).

Chuʼnchel i naqilom inchalik ruukʼ taqeh testigo reh Jehová i wilkeebʼ ar Ucrania. Xa reʼ laʼ, wilik i maʼ xqatzʼihbʼaaj taj, ruum chi kʼaxik qʼorik pan juʼjun taqeh yeʼaabʼ chupaam i tinamit. Pan 7 reh junio reh 2022, reʼ i wilih kʼahchiʼ rukʼulariik ar Ucrania:

• 42 testigo reh Jehová xikimik.

• 82 chi Testigos tiʼ wilkeebʼ.

• 46.145 chi Testigo xkikanaaʼ i kipaat eh xiʼooj pan tokoom yeʼaabʼ, ahaʼ wiiʼ ne inkikoʼleej kiibʼ.

• 469 i paat xisacharik wach.

• 540 i paat xiyojibʼik.

• 1.405 i paat xiyojibʼik kʼisiin.

• Ho’oob’ yeʼaabʼ reh moloj iibʼ xisacharik wach.

• Waxaqiib’ yeʼaabʼ reh moloj iibʼ xiyojibʼik.

• 33 yeʼaabʼ reh moloj iibʼ xiyojibʼik kʼisiin.

• Wilik 27 tzuhbʼ chi hermano, reʼ kiʼilwik reh inkikʼul i tiʼ kʼaxik, kʼahchiʼ keebʼ chi kamanik ar Ucrania.

• Reʼ taqeh i kiʼilwik reh inkikʼul i tiʼ kʼaxik, xkitobʼeej 50.663 chi Testigo reh chi ne inkireq jenoʼ yeʼaabʼ ahaʼ wiiʼ ne inkikoʼleej kiibʼ.

• 22.995 chi testigo reh Jehová xkikanaaʼ i tinamit eh kʼahchiʼ kikʼulum kitobʼaal keh i tokoom chi Testigo.