Ko k’ahchi’ rilariik i peletohinik pan b’eeh eh re’ taqeh bomba ar Mariúpol. Inti’b’ik qak’ux ruq’orariik chi waqiib’ chi testigo reh Jehová xikimik ruum taqeh bomba. Je’re’ noq, xikimik chik lajeeb’ chi hermano ar Ucrania. Eh re’ taqeh noticia inkiq’or chi re’ xamano xik’ik xkikut taqeh bomba chi naah jenaj ye’aab’ aha’ wii’ kimolom naq kiib’ jenaj mil chi k’achareel. Ma’ jeno’ hermano xkimik, xa re’ la’, wilik ju’jun i ti’ wilkeeb’. Ruum ajre’ inqab’an qatiij chuwach i Jehová ruuk’ chu’nchel qak’ux reh chi ne irucha’jej taqeh hermano ar Mariúpol.

Wilkeeb’ na 750 chi hermano i xi’elik ar Mariúpol, xa re’ la’, ko wilkeeb’ na 1600 ar. K’ih wilkeeb’ pan ju’jun taqeh ye’aab’ i wilkeeb’ ri’sil i rutaq’aniik i tinamit Rusia.

Je’ rukab’ xqaq’or chupaam i noticia xik’ik chaloq, 200 chi hermano k’ahchi’ kiko’leem kiib’ ri’sil jenaj paat aha’ wii’ wilik jenaj ye’aab’ reh moloj iib’ eh jenaj ye’aab’ reh nimlaj moloj iib’. Noq xqab’an q’orik kuuk’ taqeh hermano, re’ keh xkiq’or i wilih:

«Noq k’ahchi’ naq kikutum taqeh bomba, k’ih xiyo’jik eh ju’jun xkitik’a’ oq’ik. Noq xqab’iraj chajarik k’ahchi’ ruk’ulariik xqakapaaj chi naqakimiik ruum i q’aaq’ on ruum taqeh bomba. Jenaj aj k’amal b’eeh pan congregación xuq’or chi ne inqab’an i tz’uuy. Xqatz’uyej lajeeb’ oon 15 chi tz’uuy. Noq re’ i ye’aab’ aha’ wii’ wilkooj k’ahchi’ naq ruk’uyu’jiik eh kow naq inq’orik taqeh bomba, q’e’ kow naq qojtz’uyinik. Xqil wo’ wach i Salmo 27, eh chi riij i re’, xojq’orik chi riij. Chi riij i re’ chu’nchel xkitik’a’ kiq’orom aha’ wilik i versículo reh i Santo Laj Huuj q’e’ imponik chi kiwach. Eh chi qaju’junaal inqaq’or naq chajreet re’ taqeh versículo wilih irukowej qak’ux. Xqik’raaj chi re’ Jehová jenaj Ajaab’ees aj keteloom wachiis aj k’axool, eh qojrutob’eej chi junelik, re’ reh iruyeew rusuqkiil qak’ux noq k’ahchi’ kooj chi ik’ik pan ti’ k’axik» (2 Corintios 1:3, 4).

Re’ taqeh aj k’amal b’eeh pan congregación eh re’ ki’ilwik reh inkik’ul i ti’ k’axik inkaaj ojik chi rusik’ariik tokoom hermano reh ruk’amariik kiwa’ kiha’ eh keq’oom, atoob’ ta rub’anariik i wilih irukoj pan yohb’aal i kik’achariik. Wilik pech, noq inkib’iraj chi k’ahchi’ keeb’ chi q’aq’inik, inkisik’ nik’wach ne inkiko’leej kiib’. ¡Q’e’ insuqb’ik qak’ux kuuk’, ruum chi inkiyeew i kik’achariik kuum taqeh hermano! (Romanos 16:4).

Ruum chi ma’xta gas eh ma’xta luz, wilik taqeh hermana chupaam i tinamit inkikowej kik’ux eh inkib’an i q’aaq’ ruuk’ sii’ eh inkikorsaj i kik’uxb’al riij paat. Chi riij i re’, inkik’am i k’uxb’al re’re’ keh i yowaab’ eh keh i nim chik i kihab’ul. K’ih taqeh hermano ma’xta chik kipaat, ma’xta chik kicarro eh ma’xta chik wilik keh, xa re’ la’ inkityoxeej i k’axooj eh i tob’inik inye’arik keh.

Re’ i wilkeeb’ ar inkib’an chu’nchel i wilik pan kiq’ab’ reh rilariik paam i Santo Laj Huuj eh inkib’an chu’nchel i wilik pan kiq’ab’ reh q’orik kuuk’ taqeh tokoom chi riij i Santo Laj Huuj.

Chuʼnchel i naqilom inchalik ruukʼ taqeh testigo reh Jehová i wilkeebʼ ar Ucrania. Xa reʼ laʼ, wilik i maʼ xqatzʼihbʼaaj taj, ruum chi kʼaxik qʼorik pan juʼjun taqeh yeʼaabʼ chupaam i tinamit. Pan 22 reh marzo reh 2022, reʼ i wilih kʼahchiʼ rukʼulariik ar Ucrania:

• Lajeeb’ testigo reh Jehová xikimik.

• 27 chi Testigo tiʼ wilkeebʼ.

• 33.180 chi Testigo xkikanaaʼ i kipaat eh xiʼooj pan tokoom ye’aab’, ahaʼ wiiʼ ne inkikoʼleej kiibʼ.

• 78 i paat xisacharik wach.

• 102 i paat xiyojibʼik.

• 484 paat xiyojibʼik kʼisiin.

• Jenaj ye’aab’ reh moloj iib’ xsacharik wach.

• Kijib’ yeʼaabʼ reh moloj iibʼ xiyojibʼik.

• 18 chi yeʼaabʼ reh moloj iibʼ xiyojibʼik kʼisiin.

• Wilik 27 tzuhbʼ chi hermano, reʼ kiʼilwik reh inkikʼul i tiʼ kʼaxik, kʼahchiʼ keeb’ chi kamanik ar Ucrania.

• Reʼ taqeh i kiʼilwik reh inkikʼul i tiʼ kʼaxik, xkitobʼeej 25.069 chi Testigo reh chi ne inkireq jenoʼ yeʼaabʼ ahaʼ wiiʼ ne inkikoʼleej kiibʼ.

• 14.308 chi testigo reh Jehová xkikanaaʼ i tinamit eh kʼahchiʼ kikʼulum kitobʼaal keh i tokoom chi Testigo.