Reʼ mahk reʼ chuʼnchel inqabʼan, inqikʼraaj eh inqakapaaj, reʼ i maʼ irukaam ta riibʼ ruukʼ i runaʼojbʼal i Dios (1 Juan 3:4; 5:17). Reʼ Santo Laj Huuj iruqʼor chi reʼ mahk reʼ noq jenoʼ irubʼan i yiibʼ wach chuwach i Dios oon maʼ irubʼan ta i holohik (Santiago 4:17).

 Chupaam taqeh qʼorbal xtzʼihbʼjik cho pan peet i Santo Laj Huuj, reʼ qʼorik mahk iraaj ruqʼorom «rukutariik eh maʼ imponik ta ahaʼ naq inqaaj qakutum». Jenaj ehtalil, reʼ Santo Laj Huuj inqʼorik chi riij jun tzuhbʼ chi soldado aj Israel naq taqeh xti tzʼeht naq i kiqʼabʼ noq inkibʼan i kutuj abʼaj pan hule «inkibʼan naq reh chi abʼaj i inkaaj naq kiyeʼem reh». Mi xkijal naq taqeh qʼorik wilih chi manlik wach ne naq iruqʼor: «maʼ kimahkunik ta naq» (Jueces 20:16). Jeʼ reʼ noq reʼ mahk, reʼ noq maʼ inqakʼaam ta nah iruqʼor i rukʼuhbʼaal i Dios.

 Ruum chi reʼ Dios i ajtzʼuhkrisaneel, wilik qʼabʼ reh chi ne iruyeew i kʼuhbʼaal chi kinaah taqeh kʼachareel (Apocalipsis 4:11). Eh reʼ hoj naqaqʼahsam chuwach i Dios chibʼih jariik taqeh inqabʼan (Romanos 14:12).

¿Ne na irubʼan chi maʼ jaruuj ne qojmahkunik?

 Maʼchih ta, ruum chi reʼ Santo Laj Huuj iruqʼor: «chuʼnchel i tinamit ximahkunik, maʼ inkireq taj i ruloqʼil i Dios» (Romanos 3:23; 1 Reyes 8:46; Eclesiastés 7:20; 1 Juan 1:8). ¿Chaaj woʼ reet inkʼularik i wilih?

 Pan rutohqʼiik, reʼ Adán eh i Eva maʼ ajmahk ta naq taqeh, korik naq wach i kikʼachariik ruum chi reʼ Dios xukorsaj taqeh chi jeʼ ruwiiʼ i reh (Génesis 1:27). Xa reʼ la, noq maʼ xkinimaj ta i Dios xkiyeew kiibʼ pan mahk (Génesis 3:5, 6, 17-19). Noq xwihʼik kihalakʼuun xkikʼsaj keh i mahk (Romanos 5:12). Jeʼ rukabʼ xuqʼor i reey David: «Xa pamahk woʼ hin cho aasjinaq ruukʼ i nutuut» (Salmo 51:5).

¿Wilik na taqeh mahk qʼeʼ nim kiwach?

 Hooʼ. Jenaj ehtalil, reʼ Santo Laj Huuj iruqʼor chi reʼ taqeh winaq reh i najtir tinamit Sodoma «xiikʼ naah yibʼkiil wach i kinaʼojbʼal, eh yohbʼaal wach yibʼkiil wach i mahk inki aʼn chuwach i QaJaaw Dios» (Génesis 13:13; 18:20). Qilow ixibʼ naʼojbʼal irubʼan chi jenoʼ mahk xti qʼeʼ woʼ chik nim wach.

1.   Nikʼ nimal i mahk. Reʼ Santo Laj Huuj iruqʼor chi reʼ kʼoyomal, reʼ ruloqʼjiik taqeh tyoox, reʼ ileqʼ, reʼ xohkrʼik, reʼ qʼuchul i chibʼih jariik i keh i kas kichaaqʼ, reʼ kansanik eh reʼ qʼijinik juʼjun chi nimlaj mahk reʼ maʼ ne ta irubʼan chi ne inqabʼan (1 Corintios 6:9-11; Apocalipsis 21:8). Xa reʼ la, reʼ Santo Laj Huuj iruqʼor chi reʼ taqeh mahk wilih tokoom chi kiwach taqeh mahk inbʼaan chi maʼ inkapebʼjik ta. Jeʼ rukabʼ rubʼanariik oon ruqʼorariik reʼ i ne rutibʼisaj kikʼux taqeh tokoom (Proverbios 12:18; Efesios 4:31, 32). Xa reʼ la, reʼ Santo Laj Huuj iruqʼor chi maʼ ne ta inqakapaaj chi reʼ taqeh wilih maʼ mahk ta taqeh, ruum chi mi inqabʼan i wilih reʼ wilih ne qojrukʼam chi rubʼanariik jenoʼ nimlaj mahk (Mateo 5:27, 28).

2.   Chaaj woʼ reet inbʼaan i mahk. Juʼjun taqeh mahk inbʼaan ruum chi maʼ ehtʼalimaj ta naq chajariik iruqʼor i rukʼuhbʼaal i Dios (Hechos 17:30; 1 Timoteo 1:13). Atoobʼ ta reʼ Santo Laj Huuj maʼ irukʼulaaʼ ta taqeh i mahk wilih, iruqʼor chi maʼ jenaj ta wach ruukʼ taqeh i mahk inbʼaan noq jenoʼ rehtʼaliim i rukʼuhbʼaal i Dios (Números 15:30, 31). Reʼ Santo Laj Huuj iruqʼor chi reʼ kʼachareel inmahkunik chi xa iraaj, irubʼan i maʼ holohik ta inelik cho pan ranima (Jeremías 16:12).

3.   Jaruubʼ pech inbʼaan. Reʼ Santo Laj Huuj iruqʼor chi maʼ jenaj ta wach i mahkunik jenoʼ pech ruukʼ i rubʼanariik i mahk wilih kʼih pech (1 Juan 3:4-8). Reʼ Dios naruqʼatam qʼorik chi kinaah taqeh i maʼ inkikanaaʼ ta i kimahk atoobʼ ta kehtʼal chik chajariik i holohik (Hebreos 10:26, 27).

 Reʼ taqeh kʼachareel inkibʼan taqeh i nimlaj mahk mareh intiʼbʼik kikʼux ruum i wilih. Jenaj ehtalil, reʼ reey David xutzʼihbʼaaj: «Reʼ taqe nuyiibʼ wach naʼojbʼal xumol riibʼ chi nunaah, xa jeʼ chik rukabʼ ahl laj ihq xamaʼ nukuy ta chik» (Salmo 38:4). Xa reʼ laʼ, reʼ Santo Laj Huuj iruyeew quyʼinik noq iruqʼor qeh: «Reʼ yiibʼ wach runaʼojbʼal chukanaaʼ i rubʼeeh. Reʼ i maʼ holohik ta i rukapaaj chukanaaʼ rubʼaan. Chasikʼ woʼ taq chik i QaJaaw Dios, nee woʼ chik i ruketelaaj taq awach, eh neerukuy taq amahk, ruum reʼ reh xti wilik i kuyuuj ruukʼ» (Isaías 55:7).