Reʼ i rusanto laj uxlabʼal i Dios reʼ i ransil irukoj chi kamanik (Miqueas 3:8; Lucas 1:35). Noq reʼ Dios irutaqʼaaj i santo laj uxlabʼal reh chi ne irubʼan ahaʼ wilik iraaj i reh (Salmo 104:30; 139:7).

 Pan Santo Laj Huuj reʼ qʼorik hebreo rúaj eh pnéuma pan griego iraaj ruqʼorom «uxlabʼal». Kʼih pech, reʼ taqeh qʼorik wilih iraaj ruqʼorom reʼ ansil irukoj Dios reh kamanik, reh i santo laj uxlabʼal (Génesis 1:2). Xa reʼ laʼ inkojarik woʼ noq inqʼorik chi riij i:

•   Uxlabʼal (Habacuc 2:19; Revelación [Apocalipsis] 13:15).

•   Teew (Génesis 8:1; Juan 3:8).

•   Reʼ ansil reʼ iruyeew kikʼachariik taqeh kʼachareel eh jeʼ woʼ taqeh chikop (Job 34:14, 15).

•   Reʼ irubʼanooj oon reʼ iraaj rubʼanam jenoʼ kʼachareel (Números 14:24).

•   Reʼ taqeh uxlabʼal jeʼ rukabʼ i Dios eh taqeh ángel (1 Reyes 22:21; Juan 4:24).

 Chuʼnchel taqeh qʼorik wilih inkikʼam kiibʼ. Iraaj ruqʼorom chi maʼ inilarik ta kiwach xa reʼ laʼ reʼ inkibʼan inkutinik. Reʼ i rusanto laj uxlabʼal i Dios «jeʼ rukabʼ i teew maʼ inilarik ta wach eh wilik ransil» (Diccionario expositivo de palabras del Antiguo y del Nuevo Testamento exhaustivo, de William E. Vine).

 Reʼ Santo Laj Huuj iruqʼor chi reʼ santo laj uxlabʼal jeʼ rukabʼ «taqeh ruqʼabʼ» oon «taqeh nah ruqʼabʼ» i Dios (Salmo 8:3; 19:1; chawil Lucas 11:20 ruukʼ i Mateo 12:28). Jeʼ rukabʼ i jenaj ajkorsen xuun irukoj i ransil taqeh ruqabʼ eh taqeh nah ruqʼabʼ reh rubʼanariik i rukamaj, reʼ Dios rukojom i santo laj uxlabʼal:

•   Reh rutzʼuhkrisjiik i taxaaj akʼal (Salmo 33:6; Isaías 66:1, 2).

•   Reh rutzʼihbʼjiik i Santo Laj Huuj (2 Pedro 1:20, 21).

•   Reh chi reʼ taqeh i rajkamanom reh najtir ne naq ikibʼan taqeh sachbʼal kʼuxliis eh qʼoroj kʼuhbʼal (Lucas 4:18; Hechos 1:8; 1 Corintios 12:4-11).

•   Reh chi reʼ taqeh kʼachareel inkinimaj ne inkikʼuhtaaj holohik naojbʼal (Gálatas 5:22, 23).

Reʼ santo laj uxlabʼal maʼ reʼ ta jenaj kʼachareel

 Noq inqʼorarik chi reʼ santo laj uxlabʼal jeʼ rukabʼ taqeh «ruqʼabʼ», taqeh «nah ruqʼabʼ» oon reʼ «ruxlabʼal» i Dios, reʼ Santo Laj Huuj irukʼuhtaaj chi reʼ santo laj uxlabʼal maʼ reʼ ta jenaj kʼachareel (Éxodo 15:8, 10). Reʼ taqeh ruqʼabʼ i ajkorsen xuun maʼ ne ta kikamanik chi kutkeel. Ko rumam laʼ i rutʼijolal eh i rusaʼluul. Je woʼ reʼ, reʼ i rusanto laj uxlabʼal i Dios. Reʼ wilih inkamanik noq reʼ Dios iruqʼor jaruuj eh nikʼwach narukamaniik (Lucas 11:13). Eh jeʼ woʼ reʼ i Santo Laj Huuj irujalwacheej i santo laj uxlabʼal ruuk i haʼ eh jeʼ woʼ ruukʼ i maʼ inilarik ta wach je rukabʼ i kojbʼal eh naʼojbʼal. Reʼ wilih iraaj ruqʼorom chi reʼ santo laj uxlabʼal maʼ reʼ ta jenaj kʼachareel (Isaías 44:3; Hechos 6:5; 2 Corintios 6:6).

 Atoobʼ ta reʼ i Santo Laj Huuj iruqʼor chi reʼ irubʼihnaal Dios Jehová eh reʼ Rakʼuun Jesucristo maʼ inkan ta jenoʼ irubʼihnaal i santo laj uxlabʼal (Isaías 42:8; Lucas 1:31). Pan jenaj pech noq reʼ i rajtahqaneel i Jesús, reʼ Esteban xilow pan taxaaj, xril kiʼibʼ chi kʼachareel, maʼ reʼ ta ixibʼ. Reʼ Santo Laj Huuj iruqʼor: «Eh reʼ Esteban reh xti wilik paránima i Santolaj Uxlabʼal chi manlik. Xtzʼehtanik johtoq pan taxaaj, xrilow johtoq wach i ruloqʼil i Dios. Eh xrilow woʼ johtoq wach i Jesús chi paʼlik cho parusakʼaaj qʼabʼ i Dios» (Hechos 7:55). Reʼ santo laj uxlabʼal xa jenaj ansil xukoj i Dios reh chi reʼ Esteban wilik naq ne iril pan taxaaj.

 Reʼ inkikoj wach i juʼjun: Reʼ i santo laj uxlabʼal jenaj kʼachareel eh irukʼam riibʼ ruukʼ Trinidad. Jeʼ reʼ iruqʼor pan 1 Juan 5:7, 8 chupaam taqeh i Santo Laj Huuj jeʼ rukabʼ i Santo Laj Huuj reh La Sociedad Bíblica de Guatemala.

 Reʼ korik: Reʼ Santo Laj Huuj reh La Sociedad Bíblica de Guatemala iruqʼor pan 1 Juan 5:7, 8: «Ixibʼ i wilkeebʼ pan taxaaj kiqʼorik rubʼehel i wili: Reʼ Ajaabʼees Dios, reʼ ruQʼoral i Dios, eh reʼ i Santolaj Uxlabʼal. Eh xa jinaj wach inkiqʼor taqe ixibʼ wili. Eh ixibʼ woʼ hoq i kiqʼorik rubʼehel ayuʼ wach akʼal». Xa reʼ laʼ reʼ taqeh ajtzʼirool riij reʼ ehtʼalimaj kiwach kireqem chi riij chi reʼ apostol Juan, maʼ xutzʼihbʼaaj ta taqeh qʼorik reʼ reʼ eh ruum aj reʼ maʼ ne ta irubʼan chi ne inwihʼik pan Santo Laj Huuj. Jeʼ rukabʼ i ajtzʼirool reh i Santo Laj Huuj Bruce M. Metzger xuqʼor: «Reʼ taqeh qʼorik wilih xa chukuj qʼorik eh ruum aj reʼ maʼxta qʼabʼ chi neʼ inwihʼik pan Akʼ Kʼuhbʼaal» (Jenaj qʼorik xubʼan chi riij akʼ kʼuhbʼaal pan griego).

 Reʼ inkikoj wach i juʼjun: Reʼ Santo Laj Huuj inqʼorik chi riij i santo laj uxlabʼal chi jeʼ rukabʼ jenaj kʼachareel, jeʼ reʼ noq maʼreh korik.

 Reʼ korik: Reʼ Santo Laj Huuj inqʼorik chi riij i santo laj uxlabʼal chi jeʼ rukabʼ jenaj kʼachareel xa reʼ laʼ reʼ wilih maʼ iraaj iruqʼorom chi jenaj kʼachareel. Jeʼ rukabʼ inqʼorarik chi riij i naʼojbʼal, i kimik eh i mahk (Proverbios 1:20; Romanos 5:17, 21). Inqʼorarik chi reʼ mahk xa jeʼ rukabʼ jenaj ajjotʼool, ajkʼaxool wach i maʼ atoobʼ ta eh ajkaansaneel (Mateo 11:19; Lucas 7:35; Romanos 7:8, 11).

 Pan ruʼevangelio i Juan, reʼ Jesús xuqʼor chi reʼ santo laj uxlabʼal jenaj ajtoʼool. Xuqʼor chi reʼ ajtobʼineel reʼ reʼ, reʼ ehtʼalimaj wach chi paráclito wilik naq naruyeʼem chi nabʼjik, narukʼamam naq bʼeeh, naruqʼoriik eh narubʼiriniik naq, eh na woʼ naq ruqʼorom i korik keh taqeh i ajtahqaneel, naruyeʼem naq ruloqʼiil i reh eh wilik woʼ naq nakikʼulum ruukʼ.

 Reʼ inkikoj wach i juʼjun: Reʼ qahsanik haʼ inbʼan pan rubʼihnaal i santo laj uxlabʼal. Ruum aj reʼ inkiqʼor chi reʼ santo laj uxlabʼal jenaj kʼachareel.

 Reʼ korik: Wilik pech reʼ i Santo Laj Huuj irukoj qʼorik «pan rubʼihnaal i reh» reh qʼorarik chi jenoʼ wilik pan qʼabʼ rubʼanariik xa chajariik iraaj ruum rajaawriik xyeʼarik (Deuteronomio 18:5, 19-22; Ester 8:10). Reʼ wilih iraaj ruqʼorom chi noq jenoʼ iruqahsaj ruhaaʼ pan rubʼihnaal i santo laj uxlabʼal iraaj ruqʼorom chi rehtʼal chi reʼ i santo laj uxlabʼal wilik rajaawriik reh rubʼanariik xa chajariik paʼ iraaj i Dios (Mateo 28:19).

 Reʼ inkikoj wach i juʼjun: Reʼ taqeh i rajtahqaneel i Jesús jeʼ woʼ taqeh i ruʼapostol inkikoj naq wach chi reʼ santo laj uxlabʼal jenaj naq kʼachareel.

 Reʼ korik: Reʼ wilih maʼ irukʼuhtaaj ta i Santo Laj Huuj ni xata reʼ xkʼuljiik cho. Reʼ Encyclopædia Britannica iruqʼor, «reʼ kʼuhtanik chi reʼ i santo laj uxlabʼal jenaj kʼachareel eh ahaʼ inchalik [...] kitoqʼaaʼ kikʼuhtaam pan Concilio reh Constantinopla pan haabʼ 381 pan qaqʼijil». Reʼ concilio wilih xkininqʼijeej wach noq ikʼinaq chik kiʼibʼ ciento haabʼ noq kamnaq chik taqeh i rajtahqaneel i Jesús.