Pan qʼorbʼal griego reʼ qʼorik «uksanik» iraaj ruqʼorom anástasis. Reʼ qʼorik wilih iraaj ruqʼorom «pahʼik oon wuktik woʼ chik cho». Noq inyeʼarik woʼ chik rukʼachariik jenoʼ kʼachareel noq inwuktik, reʼ runaʼojbʼal xa jeʼ woʼ rukabʼ noq xkimik (1 Corintios 15:12, 13).

 Reʼ qʼorik uksanik maʼ inkan ta chupaam i Najtir Kʼuhbʼaal oon i tzʼihbʼamaj pan hebreo. Xa reʼ laʼ, atoobʼ ta jeʼreʼ, reʼ taqeh huuj wilih kiqʼorik chi riij i uyʼinik wilih. Jenaj ehtalil, reʼ Dios xuqʼor reh i profeta Oseas: «Mi neribʼan chi nenikoʼleej taqeh chiwach i kiyeʼaabʼ i kamnaq? Mi neribʼan reʼ chi nenwesaj taqeh pan qʼabʼ i kimik? Reʼ hat kimik, haʼj wilik awajawriik? Reʼ hat muqʼunbʼal, haʼj wilik atoqʼbʼaal?» (Oseas 13:14, RLLH; Job 14:13-15; Isaías 26:19; Daniel 12:2, 13).

 ¿Ahaʼ nakuktiik taqeh kamnaq? Wilik taqeh kʼachareel kiwuktik pan taxaaj reh taqʼanik ruchʼihil i Jesús (2 Corintios 5:1; Apocalipsis 5:9, 10). Reʼ Santo Laj Huuj iruqʼor chi reʼ wilih reʼ«peet wuktik» oon «reʼ kiwuktik taqeh kamnaq chi noq» (Revelación 20:6; Filipenses 3:11, TNM). Reʼ taqeh qʼorik wilih inkikʼuhtaaj chi wilik jenaj chik i uksanik. Pan rukabʼ uksanik, reʼ taqeh rukʼihaal chi kʼachareel nakisuqkileem i kʼacharik ayuʼ wach akʼal (Salmo 37:29).

 ¿Chajariik inkʼularik noq reʼ taqeh kamnaq kiwuktik woʼ chik chi kʼachlik kiwach? Reʼ Dios xuyeew rajaawriik i Jesús reh chi ne irukʼsaj taqeh kamnaq (Juan 11:25). Reʼ Jesús narukojom i ajaawriik wilih reh ruksjiik «chuʼnchel taqeh wilkebʼ pan taq muqʼunbʼaal kamnaq». Noq nakuktiik, jenaj woʼ wach i kikaybʼal, i kinaʼojbʼal eh i kikapebʼaal, jeʼ rukabʼ noq ko majaaʼ naq kikimik (Juan 5:28,  eh 29). Reʼ nakuktiik reh kʼacharik ayuʼ wach akʼal, reʼ kitiʼjolal manlik chik wach eh nakisuqkileem i kʼacharik ayuʼ wach akʼal (Isaías 33:24; 35:5, 6). Xa reʼ laʼ, reʼ i nakuktiik cho ar pan taxaaj, naruyeʼariik jenaj i «kitiʼjolaal pan uxlabʼal». Iraaj ruqʼorom chi kiwuktik chi uxlabʼal chik taqeh (1 Corintios 15:42-44, 50).

 ¿Ajwach i na woʼ chik ruyeʼariik kikʼachariik? Reʼ Santo Laj Huuj iruqʼor chi ayuʼ wach akʼal «reʼ taqeh kamnaq na woʼ chik kiwuktik chaloq chi kʼachlik kiwach atoobʼ ta holohik atoobʼ ta maʼ holohik ta i kinaʼojbʼal xkibʼan» (Hechos 24:15). Chi kixilak taqeh i holohik kinaʼojbʼal, wilik i Noé, i Abrahán eh i Sara (Génesis 6:9; Hebreos 11:11; Santiago 2:21). Eh chi kixilak taqeh i maʼ holohik ta i kinaʼojbʼal, wilkeebʼ taqeh i maʼ xkinabʼeej ta wach i Jehová eh ruum ajreʼ maʼ xkinimaj ta i rukʼuhbʼaal.

 Xa reʼ laʼ, reʼ taqeh maʼ xkaaj ta runimjik taqeh rukʼuhbʼaal i Jehová maʼ na ta chik ruyeʼariik kikʼachariik. Noq reʼ taqeh wilih kikimik, kikimik chi junelik (Mateo 23:33; Hebreos 10:26, 27).

 ¿Jaruuj naq narutihkʼik i uksanik wilih? Reʼ Santo Laj Huuj ruqʼorom naq chik chi reʼ kuktiik taqeh kamnaq ar pan taxaaj na naq rutihkʼiik noq wilik woʼ chik ayuʼ i Cristo. Reʼ wilih xtihkʼik pan haabʼ 1914 (1 Corintios 15:21-23). Reʼ kuktiik taqeh kamnaq ayuʼ wach akʼal narojiik eloq wach noq reʼ Jesús narubʼanam i taqʼanik chuwach jenaj mil chi haabʼ. Chuwach taqeh qʼiij reʼ reʼ, reʼ akʼal narukorjiik chi xa holohik chik (Lucas 23:43; Revelación 20:6, 12, 13).

 ¿Chaaj woʼ reet ne irubʼan chi ne inqakoj qakʼux ruukʼ iruqʼor i Santo Laj Huuj chi riij i kuktiik taqeh kamnaq? Reʼ Santo Laj Huuj inqʼorik chi riij i bʼelejeebʼ chi kʼachareel i xiʼuksjik woʼ chik cho, eh wilik i xiʼilwik reh i wilih (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Jenaj i wuktik i xbʼaan cho, reʼ i reh i Lázaro: Reʼ winaq wilih kijibʼ naq chik qʼiij irukʼam chi xkimik, eh reʼ Jesús xruksaj chuwach kʼih taqeh kʼachareel (Juan 11:39, 42). Ni xa ta reʼ taqeh kiʼixowanik reh i Jesús xkiqʼor chi reʼ wilih maʼ xkʼularik ta. Ruum inkaaj naq kikansam i Jesús eh i Lázaro (Juan 11:47, 53; 12:9-11).

 Jeʼ rukabʼ iruqʼor i Santo Laj Huuj, reʼ Dios iraaj ruyeʼariik woʼ chik kikʼachariik taqeh kamnaq eh wilik rajaawriik reh rubʼanariik i wilih. Ruum chi manlik wach i rukapebʼaal, inkʼulik pan rukʼux nikʼwach naq i kʼachareel chi manlik. Eh ruum chi wilik rajaawriik maʼ ajwach ta ne inqʼatwik reh ruksjiik taqeh kamnaq (Job 37:23; Mateo 10:30; Lucas 20:37, 38). Reʼ reh wilik rajaawriik reh rubʼanariik i wilih, eh iraaj woʼ rubʼanam. «Nee naq insuuqbʼik akʼux wuukʼ, ruum reʼ woʼ hat xatzʼuhkrisanik cho weh» (Job 14:15). Reʼ Santo Laj Huuj iruqʼor chi jeʼreʼ narikʼraam riibʼ i Dios noq naruksam taqeh kamnaq ayuʼ wach akʼal.

Reʼ inkikapaaj juʼjun taqeh kʼachareel chi riij i uksanik

 Juʼjun inkikapaaj: Noq jenoʼ naruktiik woʼ chik cho, reʼ ránima narokiik woʼ chik pan rutiʼjolal.

 Reʼ korik: Pan Santo Laj Huuj, reʼ qʼorik ánima, iraaj ruqʼorom:«kʼachareel». Noq jenoʼ inkimik,reʼ anima maʼ inkahnik ta chi kʼachlik (Génesis 2:7; Ezequiel 18:4). Reh chi jenoʼ kʼachareel ne inwuktik cho, maʼ iraaj taʼ ruqʼorom chi reʼ i ránima narokik woʼ chik pan rutiʼjolal. Reʼ laʼ iraaj ruqʼorom reh chi reʼ Dios narukorsam woʼ chik i kʼachareel reʼreʼ.

 Juʼjun inkikapaaj: Juʼjun i nakuktIik woʼ chik chaloq, xa reʼ yuʼ narusachariik kiwach.

 Reʼ korik: Reʼ Santo Laj Huuj iruqʼor chi «reʼ xkibʼan i maʼ holohik ta, nakuktiik reh chi ne inqʼatarik qʼorik chi kinaah» (Juan 5:29, TNM). Jeʼreʼ noq, reʼ taqeh kʼachareel wilih naruqʼatariik qʼorik chi kinaah maʼ ruum ta i xkibʼan noq ko majaaʼ kikimik, ruum laʼ i nakibʼanam noq wuktinak chik taqeh. Reʼ Jesús xuqʼor: «Reʼ taqeh kamnaq nakibʼiram i riqʼorb’al i Rakʼuun i T’yoos, eh reʼ taqeh xibʼirinik reh, nariwih’iik kikʼachariik» (Juan 5:25, RLLH). Mi reʼ i nakuktiik inkibʼiraj i ruqʼorb’al i Cristo oon inkinimaj i rukuhbʼaal, reʼ i kibʼihnaal narutzʼihbʼjiik pan «ruhujil i juneliik kʼacharik» (Revelación 20:12, 13).

 Reʼ inkikapaaj juʼjun: Reʼ taqeh kiwuktik woʼ chik cho, inkikʼul i tiʼjolal i xwihʼik keh noq ko majaaʼ naq kikimik.

 Reʼ korik: Noq jenoʼ inkimik, reʼ rutiʼjolal inqʼahik eh pooq chik inkahnik (Eclesiastés 3:19, 20).