Re’ Santo Laj Huuj qojrutob’eej reh chi ne inqayeew ruuk’ chunchel qak’ux i wilik qeh eh chi maʼxta ne inquyʼeej ruum i xqayeew. Noq inqab’an i wilih, reʼ taqeh k’achareel kikʼulwik reh i toobʼinik inqayeew, insuqb’ik kik’ux eh insuqb’ik woʼ qak’ux i hoj. Re’ Jesús xuq’or: «Ma’ k’isiin ta nimaal i suqkiil k’uxliis wilik ruuk’ i yeʼooj chiwach i k’uluuj» (Hechos 20:35, RLLH).

•  ¿Jaruuj ne irubʼan chi ne inqa’an i yeʼooj?

•  ¿Jaruuj maʼ na ta qabʼanam i yeʼooj?

•  Ju’jun taqeh i texto kiq’orik chi riij i yeʼooj

 Noq inqabʼan i yeʼooj ruukʼ chuʼnchel qakʼux, re’ wilih holohik taqeh irukʼam cho. Reʼ Santo Laj Huuj iruq’or: «Re’ ju’jun chiyeew nik’ nimaal i xaasjik pa rik’ux riyeʼariik, chi ma’ kiʼib’ ta rik’ux ma’ woʼ minooj chipaam, ruʼuum chi re’ Tʼyoos irik’ax i ha’wach insihinik chi suq rik’ux» (2 Corintios 9:7, RLLH).

 Re’ Dios iraaj chi re’ taqeh qojloq’inik reh, ne inqab’an i yeʼooj ruukʼ rusuq’kiil qak’ux (Santiago 1:27). Mi inqatob’eej taqeh i aajwaal wach chi keh, inqak’uhtaaj chi k’ahchi’ kooj chi kamanik ruuk’ i Dios eh re’ reh ne iruyeew jilow qeh i otob’il inqab’an (Proverbios 19:17). Re’ Santo Laj Huuj iruq’or chi re’ reh ne qojrukuxisaj. (Lucas 14:12-​14).

 Noq xa inqaaj qanimb’isam qiib’: Jeʼ rukabʼ noq:

•   Inqa’an i yeʼooj xa reh chi ne qojkil i tokoom (Mateo 6:2).

•   Inquyʼeej chi ne inkiyeew woʼ chik jilow qeh (Lucas 14:12-14).

•   Inqaaj qaloqʼom i qako’lembʼaal ruuk’ i Dios (Salmo 49:6, 7).

 Noq inqatob’eej jenoʼ reh chi ne irubʼan i ma imponik ta chuwach i Dios. Ma’ holohik ta chi ne inqayeew rutumiin jenoʼ kʼachareel reh k’oʼnik ruum tumiin, reh chi ne inxohk’rik oon reh chi ne irukoj taqeh droga (1 Corintios 6:9, 10; 2 Corintios 7:1). Eh ma’ holohik ta woʼ chi ne inqayeew rutumiin jenoʼ irub’an kamanik, xa re’ la’, ma’ iraaj ta kamanik (2 Tesalonicenses 3:10).

 Noq re’ yeʼooj irubʼan chi ma’ ne ta inqab’an i rukamaj i Dios. Re’ Santo Laj Huuj iruq’or chi re’ b’ahilbees ko ruman chi ne irukʼuxlaaj i rufamilia (1 Timoteo 5:8). Ma’ atoobʼ ta chi, ruum ruyeʼariik keh i tokoom ma’ ne ta iruyeew reh i rufamilia i ajwaal wach chi keh. Eh, re’ Jesús ma’ xponik ta chuwach inkibʼan taqeh i ma’ inkaaj ta naq kitobʼeem i kituut kajaaw ruum chi inkiq’or naq chi chuʼnchel i chib’ih keh kiq’ahsam chik chi mayiij chuwach i Dios (Marcos 7:9-13).