Ma’chih taj. Reʼ Santo Laj Huuj iruqʼor chi manlik chi reʼ Dios xutzʼuhkrisaj taqeh kʼachareel eh jeʼ woʼ i jarb’uhr chi kʼacharik wilik, a jeʼ rukabʼ taqeh chikop oon chʼahn (Génesis 1:12, 21, 25, 27; Apocalipsis 4:11). Reʼ Santo Laj Huuj iruqʼor chi qojchalik kuukʼ taqeh peet kʼachareel, Adán eh Eva (Génesis 3:20; 4:1). Eh maʼ irukʼam ta riibʼ chi xa xkʼoʼloq ruukʼ i evolución teística, reʼ inkiqʼor chi reʼ Dios xukoj i evolución reh rutzʼuhkrisjiik taqeh reh reh wach kʼacharik. Xa reʼ laʼ, reʼ Santo Laj Huuj irukʼam riibʼ ruukʼ irukʼuhtaaj i ciencia chi riij i reh reh wach kʼacharik reʼ wilik reh i jarbʼuhr chi kʼacharik. b

•  ¿Irukoj na i Dios i evolución?

•  ¿Irukʼam na riibʼ i evolución ruukʼ iruqʼor i Santo Laj Huuj?

•  ¿Iraaj na ruqʼorom chi noq kiʼokrik pan jenoʼ yeʼaabʼ taqeh chʼahn oon chikop jenaj evolución?

 Reʼ qʼorik evolución teística kʼih iraaj ruqʼorom. Reʼ Encyclopædia Britannica, iruqʼor chi «reʼ i selección natural jenaj kamambʼal irukoj i Dios reh rutzʼuhkrisjiik taqeh wilik».

 Reʼ evolución teística irukʼam woʼ taqeh naʼojbʼal wilih:

•   Chuʼnchel taqeh kʼachalkeebʼ wilik kimaam katʼit re’ xiwihʼik reh najtir qʼiij.

•   Eh chi reʼ taqeh kʼacharik inkijal kiibʼ ko kiponik tokoom chi kʼacharik. Eh wilik pech inabʼjik i wilih chi macroevolución.

•   Xa nikʼwach paʼ, reʼ Dios wilik rajaawriik chi naah taqeh wilih.

 Wila’ reʼ evolución teística korik naq, reʼ iruqʼor i Génesis chi riij i tzʼuhkrisamaj maʼ korik ta naq. Xa reʼ laʼ reʼ Jesús xqʼorik chi riij chi reʼ xkuljik wilih korik (Génesis 1:26, 27; 2:18-24; Mateo 19:4-6). Reʼ Santo Laj Huuj iruqʼor chi reʼ Jesús, noq ko majaa’ inkʼulik naq wach akʼal, impatinik naq ruukʼ i Rajaaw pan taxaaj eh xutobʼeej rutzʼuhkrisjiik chuʼnchel i chibʼih jarik wilik (Juan 1:3). Ruum aj reʼ reʼ naʼojbʼal chi reʼ Dios xukoj i evolución reh rutzʼuhkrisjiik i jarbʼuhr chi kʼacharik maʼ rukʼam ta riibʼ ruukʼ irukʼuhtaaj i Santo Laj Huuj.

 Reʼ Santo Laj Huuj maʼ iruqʼor ta rubʼehel ko ahaʼ inkijal kiibʼ taqeh jarbʼuhr chi kʼacharik, ni xata jarubʼ i ruwiiʼ injalik. Ni xata irukʼuhtaaj chi reʼ taqeh chikop eh i chʼahn reh i xutzʼuhkrisaj i Dios inkijal kiibʼ noq kikʼihbʼik oon noq kiʼokrik pan akʼ yeʼaabʼ. Juʼjun taqeh inkil i jaloj wilih jeʼ ruwiiʼ evolución, xa reʼ laʼ reʼ i korik, reʼ i jaloj wilih maʼ iruyeew ta jenaj akʼ kʼacharik.