Reʼ i Santo Laj Huuj maʼ irukʼuhtaaj ta chi naqabʼanam qatiij chuwach taqeh korsamaj tyoox. Naqabʼanam la’ qatiij xa chuwach i Dios eh naqabʼanam pan rubʼihnaal i Jesús. Reʼ i Jesús xuqʼor keh taqeh rajtahqaneel: «Ruum aj reʼ, reʼ taq i hat, jeʼ wili rubʼaan taq atiij naa aʼnam: QaJaaw Dios wilkaat cho pan taxaaj: Loqʼimaj ta naq abʼihnaal» (Mateo 6:9). Reʼ Jesús maʼ jaruuj xukʼuhtaaj chi naqabʼanam qatiij chi kiwach taqeh i tyoox, chuwach jenoʼ ángel oon jenoʼ maʼ reʼ ta i Dios.

 Reʼ Jesús xuqʼor woʼ: «Reʼ hin i bʼeeh, reʼ hin i korik, reʼ hin i kʼacharik, xa wuum i hin naa rubʼaan ponik ruukʼ i waJaaw wilik pan taxaaj» (Juan 14:6). Naqabʼanam qatiij xa pan rubʼihnaal i Jesús (Hebreos 7:25).

¿Mi ne irubʼan chi ne inqabʼan qatiij chuwach i Dios eh chuwach woʼ taqeh korsamaj tyoox?

 Chupaam i lajeebʼ chi kʼuhbʼaal xyeʼarik reh i Moses, reʼ i Dios xuqʼor: «Xa reʼ woʼ hin, hin taq aaDios, eh inwaaj chi xa reʼ woʼ hin naa nulooqʼjiik (Éxodo 20:5). Jenaj nota chi riij i versículo wilih pan Biblia de América iruqʼor: «Xa reʼ woʼ reh i Dios, maʼ jenoʼ tyoox, ne iruqʼuch oon ne irumaq i ruyeʼaabʼ i Dios». Reʼ i Dios iraaj chi xa reʼ woʼ reh ne inloqʼjik wach eh noq inqabʼan qatiij kʼahchiʼ qaye’em ruloqʼil i Dios (Isaías 48:11).

 Mi inqabʼan qatiij chuwach jenoʼ angel oon chuwach jenoʼ korsamaj tyoox, reʼ i Jehová maʼ ne ta imponik chuwach. Chupaam i huuj Apocalipsis (Revelación) iruqʼor noq reʼ apóstol Juan xuxukʼa riibʼ chi loqʼjik jenaj ángel, reʼ ángel xuqʼor reh: «Maa aʼn i jeʼ reʼ, reʼ laʼ Dios chaloqʼej, reʼ hin xa hin woʼ raj kamanoom i Dios jeʼ rukabʼ i hat, jeʼ rukabʼ taqe aahermano i kiyeʼem kikʼux chunimjiik i korik i ruqʼorom i Jesucristo» (Revelación 19:10).