Ne qojrutobʼeej. Reʼ i Dios irutobʼeej taqeh i rajkamanoom yowaabʼ, ruum ajreʼ reʼ Santo Laj Huuj iruqʼor: «Reʼ Jehová ne intobʼinik reh, noq yoklik pan yokaabʼ ruum i yabʼilaal» (Salmo 41:3, TNM). Reʼ ixibʼ chi naʼojbʼal wilih ne qojrutobʼeej mi wilik jenoʼ qayabʼilaal qʼeʼ kow wach:

1.   Qapahqaaj qakowiil reh i Dios. «Eh reʼ i tuqʼkilaal inchalik ruukʼ i Dios xiikʼ naah ruloqʼil, irujotʼisaj wach i qakʼux eh i qakapebʼal» reʼ wilih ne qojrutobʼeej rukuyariik i tiʼkiil eh ne ruyeew qakowiil reʼ koruman chi qeh (Filipenses 4:6, 7, TNM).

2.   Juneliik qakapaaj i holohik. Reʼ Santo Laj Huuj iruqʼor: «Noq suq suq i ránima jinoʼq, jeʼ naa jinaj iqʼoom chi reh. Eh noq tiʼ i ránima jinoʼq, ruum i reʼ inkʼisiimbʼik rukʼux» (Proverbios 17:22). Noq suq suq i qanima maʼ xa ta qojrutobʼeej ruukʼ i tiʼkiil kʼuxliis, irubʼan laʼ chi maʼ xareʼyuʼ ta qojyowabʼjiik.

3.   Naqakowem i kʼahchiʼ quyʼeem. Reʼ kʼahchiʼ quyʼeem qojrutobʼeej reh chi suq qakʼux atoobʼ ta wilkooj pan yabʼilaal (Romanos 12:12). Reʼ Santo Laj Huuj iruqʼor chi naruponik i qʼiij chi maʼ ajwach ta chik naruqʼorom: «Reʼ hin, hin yowaabʼ» (Isaías 33:24). Reʼ Dios narusacham kiwach chuʼnchel taqeh yabʼilaal, reʼ maʼ xichol ta risjiik taqeh científico. Narisam woʼ i rijbʼik jeʼ rukabʼ iruqʼor i Santo Laj Huuj: «Akʼunbʼoq woʼ chik i rutibʼkaal jeʼ rukabʼ pan rukʼijolaal, eh wihʼoq woʼ chik reh i ansil reh i rukʼijolaal» (Job 33:25).

 Chawil: Reʼ taqeh testigo reh Jehová inqakoj qakʼux ruukʼ i rutobʼaal i Dios, xa reʼ laʼ, qojʼooj woʼ ruukʼ taqeh doctor noq wilik jenoʼ qayabʼilaal (Marcos 2:17). Ruukʼ i wilih maʼ inqabʼehsaj ta jenoʼ eqʼoom, chi qajuʼjunaal laʼ, naqachihim chajarik chi eqʼoom inqaaj qakojom.