¿Chajariik iraaj ruqʼorom chi reʼ Jesús xuyeew i rukʼachariik chi mayiij chi «kikoʼlbʼaal chuʼnchel i tinamit»?

REPRODUCIR EN

Reʼ iruqʼor i Santo Laj Huuj

Reʼ Jehová irukoj i rukimiik i Jesús reh rukoʼljiik taqeh kʼachareel chi riij i mahk eh i kimik. Reʼ Santo Laj Huuj iruqʼor chi reʼ i rukikʼeel i Jesús xojrukoʼleej (Efesios 1:7; 1 Pedro 1:18, 19). Ruum aj reʼ, reʼ Jesús xuqʼor chi xuqahsaj i rukʼachariik «chi koʼlembʼal kiibʼ i chuʼnchel» (Mateo 20:28).

Chaaj woʼ reet ko ruman naq i «koʼlembʼal keh chuʼnchel»

Reʼ peet winaq xutzʼuhkrisaj i Dios, Adán i rubʼihnaal maʼxta naq rumahk. Ne naq irubʼan chi ne inkʼacharik chi juneliik, xa reʼ laʼ xuqʼebʼ i wilih ruum chi maʼ xunimaj ta i Dios (Génesis 3:17-19). Reʼ taqeh rakʼuun rixqʼuun i Adán xkehchaaj i mahk (Romanos 5:12). Ruum aj reʼ, reʼ Santo Laj Huuj iruqʼor chi reʼ Adán xukʼayej riibʼ eh xukʼayej taqeh rakʼuun rixqʼuun reh i mahk eh i kimik (Romanos 7:14). Maʼ ajwach ta naq ne irutoj riij i xuqʼebʼ i reh ruum chi, chi qunchelaal hoj ajmahk (Salmo 49:7, 8).

Reʼ Dios xuketelaaj kiwach taqeh i rakʼuun rixqʼuun i Adán, reʼ i maʼxta naq kichol rubʼanariik ruukʼ i wilih (Juan 3:16). Xa reʼ laʼ reʼ Dios korik wach i rubʼanooj, eh ruum aj reʼ maʼ ne ta naq irubʼan chi ne irukuy kimahk xa chi jeʼ reʼ (Salmo 89:14; Romanos 3:23-26). Ruum chi irukʼax naq taqeh kʼachareel xusikʼ nikʼwach naq rutojariik riij i kimahk eh rusachariik wach chi jumpech narubʼanam (Romanos 5:6-8). Xuyeew i koʼlembʼal iibʼ.

¿Chajariik i koʼlembʼal iibʼ?

Pan Santo Laj Huuj, reʼ qʼorik koʼlembʼal reʼ ixibʼ wilih iraaj ruqʼorom:

Reʼ rukʼihaal intojarik (Números 3:46, 47).
Ruukʼ i wilih, inchej oon inkoʼljiik riij i rukʼachariik jenoʼ eh inreqarik woʼ chik i sahchinaq naq (Éxodo 21:30).
Jenaj wach i rukʼihal tzʼaaqʼ ruukʼ i kʼahchiʼ rutojariik riij. a

Qilow nikʼwach irukʼam riibʼ i wilih ruukʼ i rukimiik i Jesús.

Reʼ rukʼihaal intojarik. Reʼ Santo Laj Huuj iruqʼor chi reʼ taqeh ajnimaneel xikʼ naah kʼihaal xiloqʼarik wiiʼ (1 Corintios 6:20 eh 7:23). Reʼ xiloqʼarik wiiʼ ruukʼ i rukikʼeel i Jesús, ruukʼ i reʼ xiloqʼarik taqeh kʼachareel reh i «aj panimaq tinamit, i aj pankokʼ tinamit, xa reh reh wach kiqʼorik wiiʼ» (Apocalipsis 5:8, 9).
Chejooj, rukʼoljik i rukʼachariik jenoʼ. Reʼ i rukimiik i Jesús qojruchej chuwach i mahk (1 Corintios 1:30; Colosenses 1:14; Hebreos 9:15).
Jenaj wach i rukʼihaal tzʼaaqʼ. Reʼ rukʼachariik i Jesús reʼ xuqʼahsaj chi qiij jenaj wach ruukʼ i kʼacharik xuqʼebʼ i Adán, jenaj kʼacharik manlik wach chi maʼxta naq rumahk (1 Corintios 15:21, 22, 45, 46). Reʼ Santo Laj Huuj iruqʼor: «Eh xa ruum i jinaj chi winaq maʼ xnimanik taj, maʼ kʼisiin i xi kahnik chi ajmahk taqe. Eh reʼ chik i winaq jinaj reh, reʼ i Jesucristo, ruum chi xnimanik, maʼ kʼisiin i naa rukoʼleem chuwach i kimahk» (Romanos 5:19). Reʼ wilih irukʼuhtaaj chaaj woʼ reet reʼ i rukimiik i xa jenaj chi winaq irukoʼleej kʼih taqeh ajmahk. Reʼ rukimiik i Jesús xkamanik chi «kikoʼlbʼaal chuʼnchel i tinamit» inkaaj kikʼulum i kooch wilih (1 Timoteo 2:5, 6).

a Chupaam taqeh qʼorbal xtzʼihbʼjik cho i Santo Laj Huuj pan peet, reʼ qʼorik «koʼlembʼal iibʼ» iraaj ruqʼorom reʼ rukʼihaal tzʼaaqʼ intojarik oon xa chajariik i qʼeʼ looqʼ inyeʼarik reh rukʼulariik xa chajariik. Jenaj ehtalil, pan hebreo reʼ qʼorik kafár iraaj ruqʼorom «rutzʼapariik naah» (Génesis 6:14). Inkojarik reh ruqʼorariik rutzʼapariik wach taqeh mahk (Salmo 65:3). Eh reʼ qʼorik kófer iraaj ruqʼorom reʼ inyeʼarik reh rukʼoljiik xa chajariik (Éxodo 21:30). Eh reʼ qʼorik lýtron, pan qʼorbal griego reʼ iraaj ruqʼorom «koʼlembʼal iibʼ», iraaj woʼ ruqʼorom «reʼ rukʼihaal intojarik reh rukʼoljik xa chajariik» (Mateo 20:28). Reʼ taqeh ajtzʼihb pan griego inkikoj naq i qʼorik wilih noq kiqʼorik naq chi riij i rukʼoljik jenoʼ soldado xkʼamarik jeʼ pan qʼaqʼinik oon reh rehsjiik jenoʼ moso i kikʼamam jeʼ pan kowlaj kamanik.