Reʼ Jesús xukoʼleej taqeh kʼachareel korik wach kikʼux noq xuyeew i rukʼachariik chi mayiij (Mateo 20:28). Ruum aj reʼ, reʼ Santo Laj Huuj iruqʼor chi xtaqʼbʼjik chi «kikoʼljik i tinamit wach akʼal» (1 Juan 4:14). Eh iruqʼor woʼ hoq chi «maʼ awach ta chik jinoʼq ajʼ uukʼ neenkan i koʼlembʼal iibʼ, ruum maʼ xta ta chik jinoʼq i bʼihnaal ayuʼ wach akʼal chi reʼ tee reh neen koʼlinik qeh» (Hechos 4:12).

 Reʼ Jesús xkimik chi kiij chuʼnchel inkikoj kikʼux ruukʼ (Hebreos 2:9; Juan 3:16). Chi riij i reʼ, reʼ Dios «xruksaj woʼ chik chaloq chi kʼachlik wach» eh reʼ Jesús xooj woʼ chik pan taxaaj chi jenaj uxlabʼal (Hechos 3:15). Pan taxaaj, reʼ Jesús «neerubʼan kikoʼljik chi jumpech awach taqe i kʼahchiʼ kisikʼim i Dios parubʼihnaal i reh. Reʼ reh neerubʼan rupahqaljiik i kokʼ i rotobʼil i Dios chikiij taqe aj nimaneel, ruum wilik rukʼachariik chi juneliik» (Hebreos 7:25).

¿Chaaj woʼ reet ko ruman chi reʼ Jesús ne irupahqaaj i ratobʼil i Dios chi qiij?

 Chi qunchelaal hoj ajmahk (Romanos 3:23). Reʼ mahk qojrukʼam pan kimik ruum maʼ inqabʼan ta naq rujilariik qiibʼ ruukʼ i Dios (Romanos 6:23). Xa reʼ laʼ, reʼ Jesús «nqʼorik i kokʼ chiqiij» chuwach i Dios mi inqakoj qakʼux chi riij i rukimiik (1 Juan 2:1). Ruum chi reʼ Jesús xuqʼahsaj i rukʼachariik chi qiij ne irubʼan chi ne inqʼorik chuwach i Dios chi qiij reh chi ne irubʼiraj i qatiij eh ne irukuy qamahk (Mateo 1:21; Romanos 8:34). Reʼ Dios irubʼiraj irupahqaaj i Jesús ruum chi irukʼam riibʼ ruukʼ iraaj i reh. Reʼ Dios xutaqʼaaj i Jesús wach akʼal «reh chi nakikoʼljik i wach akʼal pan rubʼihnaal i reh» (Juan 3:17, RLLH).

¿Xa manlik na runimjik chi wilik i Jesús reh chi ne qojkoʼljik?

 Maʼchih ta. Atoobʼ ta ko ruman chi ne inqanimaj chi wilik i Jesús reh chi ne qojkoʼljik, ko wilik chik naqabʼanam (Hechos 16:30, 31). Reʼ Santo Laj Huuj iruqʼor: «Reʼ tiʼjolal noq maʼ xtaj i uxlabʼal ruukʼ, kamnaq inkahnik wiiʼ. Jeʼ woʼ reʼ i nimanik imbʼaan xa chi rutkeel wilaʼ maʼ ruchʼihil otobʼil, inkahnik chi kamnaq» (Santiago 2:26). Reh chi ne inqakoʼleej qiibʼ:

•   Ko ruman chi ne inqatijej chi riij i Jesús eh jeʼ woʼ chi riij i Rajaaw, Jehová (Juan 17:3).

•   Chi ne inqakoj qakʼux chi kiij (Juan 12:44; 14:1).

•   Chi ne inqakʼuhtaaj chi wilik qakojbʼaal ruukʼ runimjiik taqeh i rukʼuhbʼaal (Lucas 6:46; 1 Juan 2:17). Reʼ Jesús xuqʼor chi maʼ chuʼnchel ta taqeh i nakiqʼorik reh «Jaaw, Jaaw» narukoʼljiik reʼ laʼ i nakikoʼljiik reʼ taqeh i kibʼanik reh irmponik chuwach i Rajaaw (Mateo 7:21).

•   Chi ne inqakʼuhtaaj chi wilik qakojbʼaal atoobʼ ta wilik taqeh kʼaxkilal. Reʼ Jesús xuqʼor: «Awach i maʼ xyoj ta rukʼux chi nimanik korehtaal i rukimiik, reʼ reʼ naa rukoʼljiik» (Mateo 24:13).