¿Chajarik iruqʼor i Santo Laj Huuj chi riij i kʼacharik pan kabʼchel wilaʼ maʼ kaxaro ta taqeh?
Reʼ iruqʼor i Santo Laj Huuj
Reʼ Santo Laj Huuj iruqʼor chi reʼ i Dios maʼ iraaj ta chi neʼ inqabʼan i kʼoyomal (1 Tesalonicenses 4:3). Reʼ Santo Laj Huuj iruqʼor chi, chi xilak i kʼoyomal wilik taqeh bʼanooj ma’ atoob’ ta jeʼ rukabʼ i ruch’uwa’resjiik i kaxarohiil oon noq reʼ taqeh winaq kiyohkik ruukʼ i kuch winaq eh jeʼ woʼ mi jenaj winaq eh jenaj ixoq kiyohkik kikabʼcheel noq maʼ kaxaaro ta taqeh.
¿Chaaj woʼ reet ko ruman chi reh i Dios chi jenaj winaq eh jenaj ixoq ne inkibʼan kaxaaro?
Reʼ Dios xutzʼuhkrisaj i kaxarohiil. Xubʼan i wilih noq xuyeew taqeh pan kaxaaro i peet winaq eh i peet ixoq (Génesis 2:22-24). Reʼ reh maʼ iraaj ta naq chi jenaj winaq eh jenaj ixoq ne kikʼachariik pan kabʼchel wi la’ maʼ kibʼanam ta naq kaxaaro.
Reʼ Dios rehtʼal i holohik chi qeh. Reʼ reh xutzʼuhkrisaj i kaxarohiil reh chi jenaj winaq eh jenaj ixoq ne kikʼachariik kikabʼcheel chi juneliik. Reʼ Dios iraaj naq chi reʼ kaxarohiil ne irubʼan chi suq kikʼux taqeh i familia eh reh kikoʼljiik. Chakapaaj chi riij i wilih: reh chi ne inqalaqʼaaʼ wach jenaj kaxoon aajwal wach chi ne inqabʼan taqeh iruqʼor xkorsanik reh i kaxoon reʼreʼ. Jeʼ reʼ noq, mi inqaaj chi suq rukʼux i qafamilia naqakʼamam naah taqeh naʼojbʼal iruyeew qeh i Dios. Mi jeʼ reʼ xbʼanarik juneliik ne qojelik korik (Isaías 48:17, 18).
Reh chi ne inqalaqʼaaʼ wach jenaj kaxoon aajwal wach chi ne inqabʼan taqeh iruqʼor qeh xkorsanik reh i kaxoon reʼreʼ. Jeʼ reʼ noq, mi inqaaj chi suq rukʼux i qafamilia naqakʼamam naah taqeh naʼojbʼal iruyeew qeh i Dios.
Reʼ yohkik ruukʼ jenoʼ kʼachareel noq ma’ kaxaaro ta taqeh ne irukʼam cho kʼaxkilal. Je’ rukab’ noq jenoʼ ixoq ne inkahnik wach kʼacharik chi maʼ rukapaam ta naq, mareh ne irureq jeno’ ruyabʼilaal irunihej riibʼ eh yabʼilaal pan kapebʼaal.
Reʼ Dios xuyeew jenaj kikooch taqeh kʼachareel: re’ chi re’ ixoq eh i winaq ne inwihʼik kihalakʼuun noq kiyohkik chi kiwach. Reʼ kooch wilih qʼeʼ looqʼ. Je’ re’ noq, chi reh i Dios q’eʼ looqʼ i kʼacharik. Ruum aj reʼ, reʼ Dios iraaj chi ne inqakʼuhtaaj chi looqʼ chi qeh i kooch wilih eh iraaj chi ne qojyohkik xa ruukʼ wo’ i kʼachareel qabʼanam kaxaaro. Jeʼ reʼ ne inqayeew ruloqʼil i kaxarohiil (Hebreos 13:4).
¿Mi holohik chi jenaj winaq eh jenaj ixoq ne kikʼachariik pan kabʼchel wi la’ maʼ kaxaaro ta taqeh, xa reh rilariik mi ne kiʼelik korik?
Reh chi jenoʼ kaxarohiil suq rukʼux, maʼ ko ruman ta «chi xa ne inkinikʼeej» kʼacharik pan kabʼchel chi ma’ kaxaaro ta taqeh eh chi riij i re’ ne inkikanaa’ kiib’ noq ma’ ki’elik ta korik. Inkowjik laʼ i kikʼaxooj noq inkichop kik’ux eh inkiqʼor chi kiwach chi nakibʼanam kaxaaro eh inkikoj kikʼux rukorsjiik wach taqeh kʼaxkilal. a Xa reʼ woʼ i kaxarohiil irubʼan chi ne kiʼelik korik (Mateo 19:6).
¿Chajariik ne inbʼaan reh chi reʼ taqeh kaxaaro ne kiʼelik korik?
Maʼ jenoʼ kaxarohiil ne iruqʼor chi maʼ inwihik ta rukʼaxkilaal. Xa reʼ laʼ, ne irubʼan chi suq kikʼux mi laʼ inkikoj pan kikʼachariik taqeh naʼojbʼal iruyeew i Santo Laj Huuj. Naqilom juʼjun reh taqeh i naʼojbʼal wilih:
Ko ruman chi ne inasikʼ chi peet, reʼ aajwaal wach chi reh awuchʼihil (1 Corintios 7:3-5 eh Filipenses 2:3, 4).
Chakʼax taq awiibʼ eh chayew taq aloqʼil chawach (Efesios 5:25, 33).
Chatijej taq rukapeb’jiik riij chi peet i na taq aqʼorom (Proverbios 12:18).
Xa’elik wih’oq taq aq’unil eh xareʼyuʼ chakuy taq amahk chawach (Colosenses 3:13, 14).
a Chawil i naʼojbʼal «Reʼ inyeʼwik rukowiil i kaxarohiil».