Maʼchih ta. Reʼ taqeh i nimanik maʼ jenaj ta kiwach. Pan Santo Laj Huuj inqareq taqeh ehtalil chi riij i loqʼinik maʼ imponik ta chuwach i Dios. Kiʼibʼ wach ruwiiʼ i loqʼinik maʼ imponik ta chuwach i Dios.

Reʼ peet: Reʼ inkiloqʼej taqeh i maʼ manlik ta wach tyoox

 Reʼ Santo Laj Huuj iruqʼor chi reʼ ruloqʼjiik wach taqeh i tyoox maʼxta kamaj (Jeremías 10:3-5; 16:19, 20). Najtir, reʼ i Jehová xuqʼor reh i tinamit Israel: «Maʼ naa ta ruwihʼiik taq jinoʼq atokoom dios chi nuwach i hin» (Éxodo 20:3, 23; 23:24). a Noq reʼ taqeh israelita kiloqʼej tokoom dios, «reʼ QaJaaw [Jehová] maʼ kʼisiin ta xchalik rujosqʼil chikinaah» (Números 25:3; Levítico 20:2; Jueces 2:13, 14).

 Reʼ Dios ko jeʼ woʼ reʼ irukapaaj chi riij i ruloqʼjik taqeh i «tyoox» (1 Corintios 8:5, 6; Gálatas 4:8). Ajwach inkaaj kinimam i Jehová ko ruman chi ne inkikanaaʼ wih’ik kuukʼ i maʼ inkiloqʼej ta wach i reh. Reʼ Santo Laj Huuj iruqʼor: «Eleen taq chi kixilak i maʼ reʼ ta taqe ajnimaneel, maa aʼan taq jinaj awach kuukʼ» (2 Corintios 6:14 ko pan 17). Mi chuʼnchel ta naq i nimanik jenaj kiwach eh qojkijil ruukʼ i Dios, ¿chaaj reet xuyeew i Dios i kʼuhbʼaal wilih?

Reʼ rukabʼ: Reʼ inkiloqʼej i Dios jeʼ rukabʼ inkaaj i keh

 Reʼ Jehová maʼ xponik ta chuwach noq reʼ taqeh aj Israel kixilakeej iruloqʼjik wach i reh ruukʼ i ruloqʼjik wach taqeh i tyoox (Éxodo 32:8; Deuteronomio 12:2-4). Reʼ Jesús maʼ xponik ta chuwach i loqʼinik inkibʼan naq taqeh kʼamal bʼeeh aj tiij pan ruqʼijil. Reʼ keh inkiqʼor naq chi inkiloqʼej wach i Dios, xa reʼ laʼ xakʼul naq chik inkibʼan kiwach eh reʼ i qʼeʼ aajwaal wach iruqʼor i kʼuhbʼaal maʼ inkibʼan ta naq reʼ taqeh i wilih: reʼ i korik laj naʼojbʼal, ketelenek wachiis, chopoj kʼuxliis (Mateo 23:23).

 Reʼ nimanik reʼ qojrujil ruukʼ i Dios, reʼ iruqʼor i korik reʼ inreqarik pan Santo Laj Huuj (Juan 4:24; 17:17; 2 Timoteo 3:16, 17). Reʼ taqeh i nimanik chi inkikʼuhtaaj i chukuj qʼorik chi riij i Dios inkibʼan chi reʼ taqeh i kʼachareel maʼ ne ta inkijil kiibʼ ruukʼ i Dios. Kʼih inkinimaj chi reʼ Dios ixibʼ wach, chi noq qojkimik wilik inkahnik chi kʼachlik eh chi reʼ Dios irukʼat taqeh kʼachareel pan qʼaaqʼ. Reʼ keh inkikapaaj chi reʼ i wilih inelik cho pan Santo Laj Huuj. Xa reʼ laʼ, reʼ wilih inchalik ruukʼ i loqʼinik keh taqeh i tyoox. Reʼ taqeh i nimanik inkikʼuhtaaj i wilih ma’xta kamaj taqeh, ruum chi inkijal wach i rukʼuhbʼaal i Dios ruukʼ inkikʼuhtaaj taqeh i maʼ manlik ta wach nimanik (Marcos 7:7, 8).

 Reʼ Dios irixowaaj kiwach taqeh nimanik reʼ xa inkibʼan chi inkiloqʼej wach (Tito 1:16). Reh chi jenoʼ nimanik ne qojrujil ruukʼ i Dios, ko ruman chi reʼ wilih ne qojrutobʼeej pan qakʼachariik. Xa maʼ manlik ta rubʼanariik taqeh loqʼinik eh taqeh ninqʼiij reʼ okrinaq taqeh i kʼachareel chi rubʼanarik. Jenaj ehtalil, reʼ Santo Laj Huuj iruqʼor: «Awach i rukoj riibʼ chi aj nimaneel, eh moʼ-oq i ruqʼil riibʼ ruukʼ juʼ raaqʼ, reʼ reh xakʼahchiʼ rujotʼom riibʼ, eh reʼ nimanik i rubʼan xamaʼ xta kʼisinoq inokik wiiʼ. Reʼ i xti korik laj nimanik i ma’ xta ruchʼuwaʼiil wach chuwach i Ajabʼees Dios reʼ wili: kitoobʼjik i wilkeebʼ pan tiʼ kʼaxik, chi jeʼ maʼ xta kituut kajaaw, chi jeʼ ixoq kamnaq kibʼahiil, eh reʼ chi maʼ nee ta inchʼuwaʼresjik iibʼ ruukʼ i yiibʼ wach naʼojbʼal imbʼaan wach akʼal» (Santiago 1:26, 27). Reʼ Santo Laj Huuj noq inqʼorik chi riij i saq wach loqʼinik pan versículo wilih irukoj «korik laj nimanik».