Reʼ Santo Laj Huuj ruum chi ruqʼorbʼal i Dios iruyeew rukowiil kikʼux taqeh tiʼ kikʼux (2 Corintios 7:6). Atoobʼ ta, maʼ reʼ ta jenaj huuj keh i wilik kiyabʼilaal pan kikapebʼaal, reʼ Santo Laj Huuj rutobʼeem kʼih taqeh kʼachareel reʼ inkaaj naq kikansan kiibʼ. Reʼ taqeh naʼojbʼal iruyeew ne woʼ tirutobʼeej i hat.

•  ¿Chajariik taqeh naʼojbʼal iruyeew i Santo Laj Huuj?

•  ¿Inqʼorik na i Santo Laj Huuj chi kiij taqeh kʼachareel i xkaaj kimik?

•  ¿Ahaʼ wilik juʼjun taqeh versículo reh i Santo Laj Huuj ne tirutoobʼeej reh chi maʼ ne ta chik inakapaaj rukansjiik awiibʼ?

•  ¿Chajariik ne inqabʼan mi jenoʼ qamigo ne iruqʼor qeh chi maʼ iraaj ta chik kʼacharik?

•  ¿Eh mi nunikʼeem chik rukanteesjiik wiibʼ?

• ● Chaqʼor chajariik inawikʼraaj.

   Reʼ iruqʼor i Santo Laj Huuj: «Reʼ jinoʼq amígo juneliik nee qohrutoobʼeej noq tiʼ qakʼux. Inkamanik qeh chi jeʼ qas, oon qachaaqʼ» (Proverbios 17:17).

   ¿Chajariik iraaj ruqʼorom? Noq wilik taqeh inqakapaaj reʼ irubʼan chi tiʼ qakʼux inqaaj qatoobʼjik.

   Mi maʼ ajwach aj eh inaqʼor chajariik inawikʼraaj, maʼ ne ta chik inakuy i ihq wilih. Xa reʼ laʼ, mi xatqʼorik chi riij inawikʼraaj reʼ i rutiʼkiil akʼux ne inqajik wach eh tokoom rilariik chik ne inabʼan taqeh akʼaxkilaal.

   Chaʼan i wilih: Tiqʼoroq ruukʼ jenoʼ awamigo oon jenoʼ afamilia. a Eh ne woʼ, irubʼan chi ne inatzʼihbʼaaj chajariik inawikʼraaj.

• ● Chasikʼ jenoʼ aj eqʼomaneel.

   Reʼ iruqʼor i Santo Laj Huuj: «Reʼ maʼ xta kiyabʼilaal maʼ xta kamaj keh i aj iqʼomaneel, reʼ taqe yowabʼ raʼj ajwaal wach chi keh reʼ aj iqʼomaneel» (Mateo 9:12).

   ¿Chajariik iraaj ruqʼorom? Noq hoj yowaabʼ ko ruman chi ne qojʼooj ruukʼ i aj eqʼomaneel.

   Mi jenoʼ iraaj rukansam riibʼ, iraaj ruqʼorom chi wilik jenaj ruyabʼilaal pan rukapebʼaal oon intzʼirik wach. Jeʼ rukabʼ noq maʼ qojkʼixik ta mi wilik jenaj qayabʼilaal pan qatiʼjolaal, maʼ na ta woʼ qakʼixik chi ruqʼorariik chi wilik jenaj qayabʼilaal pan qakapebʼaal oon chi intzʼirik qawach. Reʼ taqeh yabʼilaal wilih wilik reqʼomal.

   Chabʼan i wilih: Chasikʼ jenoʼ aj eqʼomaneel reh chi ne tirutobʼeej ruuk i wilih. Maʼ acham awiibʼ.

• ● Kʼoloq pan akʼux chi hat looqʼ chuwach i Dios.

   Reʼ iruqʼor i Santo laj huuj: «Chakoj taq rehtaal chi reʼ kokʼ tzʼikin, maʼ reʼ ta nkiwiiʼ chi hoʼoobʼ i kiibʼ sentabo kikʼayjik wiiʼ, reʼ Dios maʼ jinoʼq keh i kokʼ chikop reʼ reʼ insahchik parukʼux. [...] Ruum aj reʼ mat yoʼjik taq, ruum reʼ taq i hat kʼih taq atzʼaaq chikiwach i rukʼihaal chi kokʼ tzʼikin» (Lucas 12:6, 7).

   ¿Chajariik iraaj ruqʼorom? Hat looqʼ chuwach i Dios.

   Mareh inawikraaj awiibʼ chi awutkeel. Xa reʼ laʼ, maʼ jeʼ ta reʼ. Reʼ Dios rehtʼaal chajariik kʼahchiʼ awikʼik wiiʼ. Eh atoobʼ ta maʼ inawaaj ta chik kʼacharik, reʼ Dios iruyeew rukʼux chawiij. Pan Salmo 51:17 iruqʼor chi reʼ Dios maʼ iruqʼebʼ ta jenoʼ xti qʼeʼ woʼ chik tiʼ i ranima. Reʼ Dios iraaj awach eh iraaj chi ne tikʼacharik.

   Chabʼan i wilih: Chasikʼ pan Santo Laj Huuj chajariik irukʼuhtaaj aweh chi reʼ Dios iraaj awach. Jenaj ehtalil, pan capítulo 24 reh i huuj Acerquémonos a Jehová neʼ inareq juʼjun taqeh naʼojbʼal.

• ● Chabʼan atiij chuwach i Dios.

   Reʼ iruqʼor i Santo Laj Huuj: «Eh chuʼnchel i tiqajik taq wiiʼ kapeew cha kanaaʼ taq pan qʼabʼ i Dios, ruum reʼ reh intoobʼinik taq chaaweh» (1 Pedro 5:7).

   ¿Chajariik iraaj ruqʼorom? Reʼ Dios iraaj chi ne inaqʼor reh inawikʼraaj eh i tirukoj chi kapebʼinik.

   Reʼ Dios ne iruyeew atuqkilaal pan akapebʼaal eh awansil. (Filipenses 4:6, 7, 13). Jeʼ reʼ irutoobʼinik irubʼan i Dios keh inkijil kiibʼ ruukʼ (Salmo 55:22).

   Chabʼan i wilih: Chabʼan atiij chuwach i Dios. Chaqʼor i rubʼihnaal, Jehová, eh chaqʼor reh nikʼwach inawikʼraaj awiibʼ (Salmo 83:18). Chapahqaaj reh, chi ne tirutobʼeej.

• ● Chakapaaj chi riij i uyʼinik iruyeew i Santo Laj Huuj chi riij i chalik eloq reh.

   Reʼ iruqʼor i Santo Laj Huuj : «Reʼ quyʼinik, reʼreʼ jeʼ rikabʼ jinoʼq ankla chi reh i qánima, kow riibʼ eh maʼ inkʼuyuʼjik ta pa riyeʼaabʼ» (Hebreos 6:19, RLLH).

   ¿Chajariik iraaj ruqʼorom? Reʼ inawikʼraaj xa ahaʼ ne tirukʼam, jeʼ rukabʼ irukʼul jenaj barco ruum i teew. Xa reʼ laʼ, reʼ uyʼinik iruyeew i Santo Laj Huuj jeʼ rukabʼ i jenaj ankla, ne irubʼan chi maʼ ajwach ta ne inkʼuyuʼsanik aweh.

   Reʼ uyʼinik wilih narukʼulariik. Iruchʼikaaʼ riibʼ chi naah irubʼehsaj i Dios chi narusacham wach chuʼnchel i rutiʼbʼisaj qakʼux (Apocalipsis 21:4).

   Chabʼan i wilih: Chawil kʼisinoq chik chi riij i uyʼinik irubʼehsaj i Santo Laj Huuj pan lección 5 reh i folleto Buenas noticias de parte de Dios.

• ● Chabʼan i imponik chawach.

   Reʼ iruqʼor i Santo Laj Huuj: «Noq suq suq i ránima jinoʼq, jeʼ naa jinaj iqʼoom chi reh» (Proverbios 17:22).

   ¿Chajariik iraaj ruqʼorom? Rubʼanariik i imponik chi qawach ne qojrutobʼeej ruukʼ inqikʼraaj eh ruukʼ taqeh inqakapaaj.

   Chabʼan i wilih: Chabʼan i imponik chawach. Jenaj ehtalil, chabʼiraj taqeh tzʼuuy reʼ inkibʼan chi suq ne inawikʼraaj awiibʼ, chawil wach reʼ i neʼ iruyeew rukowiil akʼux oon chasikʼ jenoʼ chik ne inawikʼsaj wiiʼ aqʼiij. Ne woʼ i rusuqbʼisaj akʼux mi xatobʼeej taqeh tokoom atoobʼ ta ruukʼ jenoʼ bʼanooj maʼ nim ta wach (Hechos 20:35, RLLH).

• ● Chakʼax awiib reh chi maʼ ne ta tiyowabʼjiik.

   Reʼ iruqʼor i Santo Laj Huuj: «Reʼ rutijiik i xa chibʼih kʼoʼnikaal xa reh i tiʼjolal inkamanik» (1 Timoteo 4:8).

   ¿Chajariik iraaj ruqʼorom? Tikʼoʼnoq, tiworoq chi korik eh chachih wach i naʼakʼuxum. Rubʼanariik i wilih ne tirutobʼeej.

   Chabʼan i wilih: Tiʼeloq chi bʼehik oon ajaminik atoobʼ ta xa chuwach i 15 minuto.

• ● Kʼoloq pan akʼux chi reʼ inawikʼraaj injaljik wach jeʼ rukabʼ inkʼularik ruukʼ chuʼnchel inqakʼul pan qakʼachariik.

   Reʼ iruqʼor i Santo Laj Huuj: «Maʼ awehtʼal ta taq chibʼih jariik taq i naa akʼulum iqal kabʼiij» (Santiago 4:14).

   ¿Chajariik iraaj ruqʼorom? Reʼ taqeh kʼaxkilal reʼ inkiyeew rutiʼkiil qakʼux eh reʼ inqakapaaj chi maʼ na ta rikʼiik wach, imponik i qʼiij chi insahchik wach.

   Atoobʼ ta qʼeʼ kʼaxik i kʼahchiʼ awikʼik wiiʼ yuʼnaak, mareh ne injaljik iqal kabʼiij. Jeʼ reʼ noq maʼ inqʼuhtik akʼux (2 Corintios 4:8). Reʼ taqeh kʼaxkilal inkiyeew rutiʼkiil akʼux yuʼnaak, naruponiik i qʼiij chi narusahchik kiwach, xa reʼ la mi jenoʼ irukansaj riibʼ maʼ ne ta irubʼan chi ne inkʼulik woʼ chik i qʼiij reʼ reʼ.

   Chabʼan i wilih: Chawil pan i Santo Laj Huuj eh chatzʼiij i rehtalil taqeh kʼachareel xqajiik kikʼux eh xkaaj naq kimik. Chawil nikʼwach xjaljik wach i kikʼachariik noq maʼ kʼahchiʼ ta naq kuyʼeem. Chawil juʼjun taqeh ehtalil.

 Hooʼ. Reʼ Santo Laj Huuj inqʼorik chi riij i juʼjun taqeh kʼachareel xkaaj naq kimik. Reʼ Dios maʼ xkaqrik ta kuukʼ, xutobʼeej laʼ taqeh. Jeʼ woʼ reʼ ne irubʼan chawiij i hat.

Reʼ Elías

•  ● ¿Ajwach naq i Elías? Atoobʼ ta reʼ reh jenaj naq jalal ruqʼorbʼal i Dios maʼ inyoʼjik ta naq, wilik pech xqajik woʼ rukʼux. Pan Santiago 5:17 iruqʼor chi reʼ Elías «xa winaq woʼ hoq jeʼ rukabʼ i hoj».

•  ● ¿Chaaj woʼ reet xraaj naq kimik? Jun pech, reʼ Elías xrikʼraaj naq riibʼ chi rutkeel, xyoʼjik eh xukapaaj chi maʼxta naq kamaj. Jeʼ reʼ noq xuqʼor reh i Dios «QaJaaw Dios manlik i tiʼ xnukʼul chawesaj i nukʼachariik» (1 Reyes 19:4).

•  ● ¿Chajariik xtoobʼinik reh? Reʼ Elías xuteh i ranima reh i Dios eh xuqʼor reh chajariik irikʼraaj. ¿Nikʼwach xyeʼarik rukowil rukʼux ruum i Jehová? Xukʼuhtaaj reh chi iruyeew naq rukʼux chi riij eh xukʼuhtaaj woʼ reh i rajaariik. Xuqʼor woʼ reh chi qʼeʼ naq looqʼ eh xuyeew reh jenaj rajtoʼool reʼ ne inchol naq ruchaʼjaljiik.

•  ▸ Chawil chi riij i Elías: 1 Reyes 19:2-18.

Reʼ Job

•  ● ¿Ajwach naq i Job? Reʼ Job jenaj naq winaq bʼehoom eh kʼih naq taqeh i ruhalakʼuun eh korik woʼ naq wach rukʼux chi ruloqʼjiik i Dios.

•  ● ¿Chaaj woʼ reet xraaj naq kimik? Reʼ rukʼachariik i Job xareʼyuʼ xjaljik wach. Xuqʼebʼ chuʼnchel i wilik naq reh, xikimik chuʼnchel taqeh ruhalakʼuun eh xwihʼik jenaj ruyabʼilaal qʼeʼ kow naq wach eh tiʼ naq irubʼan reh. Eh xanaah xkiqʼor reh chi rumahk naq i kʼahchiʼ rukʼulum. Reʼ Job xqʼuhtik naq chik reh i kʼahchiʼ rukʼulum eh ruum aj reʼ xuqʼor: «Maʼ inwaaj ta chik wihik chinaah i wach akʼal wili» (Job 7:16).

•  ● ¿Chajariik xtoobʼinik reh? Reʼ Job xubʼan rutiij ruukʼ i Jehová eh xqʼorik woʼ ruukʼ juʼjun taqeh kʼachareel (Job 10:1-3). Xyeʼarik rukowiil rukʼux ruum jenaj ramigo rubʼihnaal Eliú, reʼ reh irureq naq chi riij irikʼraaj i Job. Xtoobʼjik reh chi tokoom naq ne irukapaaj chi riij taqeh rukʼaxkilaal. Xa reʼ laʼ, reʼ xti aajwaal wach reʼ chi reʼ Job xraaj chi ne intoobʼjik ruum i Jehová eh ne inkʼamarik rubʼeeh.

•  ▸ Chawil chi riij i Job: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Reʼ Moisés

•  ● ¿Ajwach naq i Moisés? Jenaj naq kʼamal bʼeeh reh i najtir tinamit Israel eh jenaj naq jalal ruqʼorbʼal i Dios korik wach rukʼux.

•  ● ¿Chaaj woʼ reet xraaj naq kimik? Reʼ Moisés kʼih naq i rukamaj, maʼ holohik ta naq kiqʼorik chi riij eh xponik i qʼiij chi xqʼuhtik. Ruum i reʼ xuqʼor reh i Dios: «Inwaaj i hin chi nee nawesaj i nukʼachariik» (Números 11:11, 15).

•  ● ¿Chajariik xtoobʼinik reh? Reʼ Moisés xuqʼor reh i Dios nikʼwach naq irikʼraaj riibʼ. Reʼ Dios xrehsaj reh juʼjun taqeh kamanik naq irubʼan, reh chi maʼ ne ta naq chik inqʼuhtik.

•  ▸ Chawiil chi riij i Moisés: Números 11:4-6, 10-17.