Re’ Santo Laj Huuj xa jenaj wo’ pech inq’orik chi riij ehtalil wach ti’jolal. Pan Levitico 19:28 iruq’or: «Ma’ naa ta kikojom kehtalil chuwach i kiti’jolal». Re’ Dios xuyeew i k’uhb’aal wilih keh taqeh Israelita ruum chi ma’ iraaj ta naq chi re’ keh ne inkibʼan je’ rukab’ taqeh i tokoom tinamit, re’ inkikoj naq wach kiti’jolal i rehtalil oon i rub’ihnaal i kityoox (Deuteronomio 14:2). Atoob’ ta re’ taqeh ajnimaneel ma’ wilkooj ta chik ri’sil i kʼuhb’aal xuyeew i Dios keh taqeh aj Israel, ko ruman chi ne inqakapaaj riij i na’ojb’al inqatijej chupam.

¿Mi ne irubʼan chi jeno’ ajnimanel ne irukoj ehtalil chuwach i ruti’jolal?

 Qatz’ir riij ju’jun taqeh versículo, reʼ ne intoobʼinik qeh ruuk’ i wilih.

•   «Re’ taqeh ixoq parub’ehel naakitiq’aam kiib’, maaniik’ naah inki a’n» (1 Timoteo 2:9). Re’ na’ojb’al wilih inkamanik woʼ keh taqeh winaq. Re’ ajnimaneel ma’ ne ta irubʼan chi ruum i rusoʼ maʼ holohik ta ne inilarik kuum taqeh tokoom, ni xata ne irub’an chi ma’ suq ta ne inkikʼraaj kiib’ i tokoom ruum nik’wach irutiq’aaʼ riib’.

•   Wilik taqeh inkikoj ehtalil wach kiti’jolal reh rukʼuhtjiik ajwach taqeh, eh reh rukʼuhtjiik chi wilik kajaawriik chi naah i kiti’jolal. Xa re’ la’, re’ Santo Laj Huuj iruq’or keh taqeh ajnimaneel: «Chaqʼahsaj taq chi kʼachlik mayiij taq atiʼjolal, chi saq wach eh chi ne imponik chuwach i Dios, jeʼ reʼ santohimaj taq akamaj ruum chi inareq taq chi riij ahaʼ wilik i holohik eh i maʼ holohik ta» (Romanos 12:1, TNM). Ruum chi mi inqareq chi riij «ahaʼ wilik i holohik eh i maʼ holohik ta», re’ wilih ne qojrutobʼeej reh rukapebʼjiik chi korik chaaj woʼ reet inqaaj qakojom jenaj ehtalil wach qati’jolal. Mareh xa inqaaj qab’anam ruum chi jeʼ reʼ inkiʼan i tokoom, oon ruum chi inqaaj qak’uhtaam chi wilkooj chi kixilak i jun tzuhbʼ chi k’achareel. Xa reʼ laʼ, mi jeʼreʼ, ko ruman chi ne inqakapaaj: «¿Chajariik ne inub’an mi reʼ ehtalil xnukoj wach nuti’jolal ma’ ajwach ta chik iraaj rukojom oon maʼ imponik ta chik chi nuwach?». Mi jenoʼ irukapaaj chi korik chaaj wo’ reet iraaj rukojom jenoʼ ehtalil wach rutiʼjolal, ne iruchih rub’anariik i holohik (Proverbios 4:7).

•   «Re’ taqe inkorjik wach chi kapeb’imaj riij chi korik, wilik i ruk’am chaloq. Eh re’ taqe i xa pan ajiim b’eeh imb’aan, xa nooj sahchoq wach» (Proverbios 21:5). K’ih pech, re’ taqeh k’achareel inkikoj jenoʼ ehtalil wach kiti’jolal ruum chi ma’ inkikapaaj ta chi korik i k’ahchi’ kib’anam. Xa re’ la’, re’ inkichih rukojariik jenoʼ ehtalil wach kitiʼjolal mareh ne inkik’ul i k’axkilal ruum i wilih. Mareh ma’ holohik ta ne ki’ilarik kuum taqeh tokoom, oon ne ne inwih’ik kik’axkilal pan kikamaj. Eh risjiik jenoʼ ehtalil wach ti’jolal k’ih tzʼaaq eh ti’ irub’an. Kikojom chik rehtaal chi k’ih taqeh k’achareel ma’ suq ta kik’ux noq kikojom chik jenoʼ ehtalil wach kiti’jolal. Reʼ wilih ixkiq’or i kikamanik ruuk’ i wilih.