Hooʼ, irukʼuhtaaj. Noq xwihʼik ayuʼ wach akʼal, kʼih taqeh q’orooj cho rubʼiral chi riij i Sikʼooj wach reʼ «loq laj kʼamal bʼeeh» xiʼooj eloq wach ruukʼ i Jesús, reʼ i na naq ruponiik chi «kikoʼljik i tinamit wach akʼal» (Daniel 9:25 eh 1 Juan 4:14). Eh atoobʼ ta kamnaq naq chik, ko wilik naq taqeh qʼorooj cho rubʼiral chi riij i Sikʼooj wach xooj eloq wach ruukʼ (Salmo 110:1; Hechos 2:34-36).

•  ¿Chajariik iraaj ruqʼorom i qʼorik Mesías pan kaxlan qʼorik?

•  ¿Mi ne naq irubʼan chi reʼ i qʼorooj cho rubʼiral chi riij i Sikʼooj wach ne naq inooj eloq wach ruukʼ kʼih taqeh kʼachareel?

•  ¿Ne na irukʼuhtaaj riibʼ i Sikʼooj wach chupaam taqeh qʼiij chalik reh?

•  ¿Nik’ kʼihaal i qʼorooj cho rubʼiral chi riij i Sikʼooj wach wilik pan Santo Laj Huuj?

•  Juʼjun taqeh qorooj cho rubʼiral chi riij i Sikʼooj wach xiʼooj eloq wach ruukʼ i Jesús

 Pan hebreo reʼ qʼorik Maschíaj (Mesías) eh pan griego reʼ qʼorik Kjristós (Cristo) iraaj ruqʼorom Sikʼooj oon Chihooj wach. Jeʼ re’ noq, reʼ qʼorik Jesucristo iraaj ruqʼorom «Jesús reʼ i Sikʼooj wach» oon «Jesús reʼ Mesías».

 Najtir cho qʼiij reh rusikʼariik oon ruchihariik jeno’ kʼachareel reh chi ne inwih’ik rajaawrik inkijalkʼeej naq i aseite wach naah (Levítico 8:12; 1 Samuel 16:13). Reʼ i Dios xusikʼ cho wach i Jesús reh chi ne inwih’ik rajaawrik (Hechos 2:36). Reʼ i Jesús maʼ xkijalkʼeej ta i aseite wach naah, reʼ i Dios xuyeew laʼ i santo laj uxlabʼal chi naah (Mateo 3:16).

 Maʼchih ta. Jeʼ rukabʼ noq reʼ i rehtalil i rujuʼ aqʼabʼ xa awehtalil i hat, reʼ taqeh qorooj cho rubʼiral pan Santo Laj Huuj irukʼuhtaaj chi xa jenaj woʼ i Mesías oon Cristo. Xa re’ la’ i Santo Laj Huuj iruqʼor: «Ruum wilik i naa kikʼuliik iloqʼ naa kikojom kiibʼ chi Cristo, wilik naa kikojom chi jalal ruqʼoral i Dios. Maʼ kʼisiin i maʼ ilooj taj naa kiaʼnam jotʼbʼal keh i tinamit, eh wilik woʼ i rusikʼim kiwach i Dios naakijotʼom» (Mateo 24:24).

 Maʼchih ta. Re’ Santo Laj Huuj ruqʼorom naq chik chi reʼ Sikʼooj wach riih rumaam i David, reʼ xwih’ik chi taq’anik chi naah i tinamit Israel (Salmo 89:3, 4). Xa reʼ la’, reʼ i tzʼihbʼamaj naq chi riij i rufamilia i David xsacharik wach. Jeʼncho xsacharik wach noq xkichop naah i tinamit Jerusalén pan haabʼ 70 pan qaqʼijil. a Chi riij i wilih, maʼ ajwach ta chik xubʼan ruqʼorariik chi riih rumaam i David. Xa reʼ la’, paruqʼijil i Jesús ehtʼalimaj naq ajwach kichalik pan rufamilia i David eh reʼ taqeh inkixowaaj wach maʼ xkiqʼor ta chi reʼ i Jesús maʼ reʼ ta riih rumaam i David (Mateo 22:41-46).

 Maʼ ne ta inqabʼan ruqʼorariik chi manlik jarubʼ i qʼorooj cho rubʼiral wilik chi riij i Sikʼooj wach. Mareh ne injaljik i ruwiiʼ i rajlanjiik taqeh. Jenaj ehtalil, pan Isaías 53:2 ko pan 7 iruqʼor reh reh wach na’ojbʼal na naq rukʼulariik ruukʼ i Sikʼooj wach. Wilik inkiqʼor chi reʼ taqeh versículo wilih xa jenaj i qʼorooj cho rubʼiral wilik chupaam. Xa reʼ la’ wilik inkikapaaj chi chupaam taqeh versículo wilih, kʼih i qʼorooj cho rubʼiral chi riij i Sikʼooj wach wilik chupaam.