Kʼih taqeh pahqanik inbʼaan chi riij i naʼojbʼal wilih. Mareh wilik inkikapaaj: «¿Chaaj woʼ reet wilkooj ayuʼ?» oon «¿Wilik na ruwiiʼ i qakʼachariik?». Reʼ Santo Laj Huuj iruqʼor chi reʼ ruwiiʼ i qakʼachariik reʼ chi ne qojponik chi ramigo i Dios. Reh chi ne inqareq chi riij i wilih, naqilom juʼjun taqeh i korik irukʼuhtaaj i Santo Laj Huuj.

•   Reʼ Dios xtzʼuhkrisanik qeh. Reʼ Santo Laj Huuj iruqʼor: «Reʼ reh xtzʼuhkrisanik qeh. Maʼ reʼ tee hoj xqatzʼuhkrisaj qiibʼ chi qibʼil qiibʼ» (Salmo 100:3; Apocalipsis 4:11).

•   Reʼ ajtzʼuhkrisaneel wilik i rajwaam noq xojrutzʼuhkrisaj i hoj eh jeʼ woʼ noq xutzʼuhkirsaj chuʼnchel inqil chi naah i wach akʼal (Isaías 45:18).

•   Reʼ Dios xojrutzʼuhkrisaj chi aajwal wach chi qeh runabʼjiik wach eh chi ne inqareq rukorkiil i qakʼachariik (Mateo 5:3). Reʼ reh iraaj chi ne inqareq taqeh i aajwanik wilih (Salmo 145:16).

•   Inqakʼuhtaaj chi inqareq chi riij chi ko wilik i aajwaal wach chi qeh noq inqasikʼ i Dios eh qojponik chi ramigo. Chi qunchelaal ne inqabʼan rubʼaan i wilih. Jeʼ woʼ reʼ Santo Laj Huuj iruqʼor qeh chi jeʼ wilih: «Chajil taq i koq awiibʼ ruukʼ i Dios reʼ reh nee taq inwihʼik taq awuukʼ» (Santiago 4:8; 2:23).

•   Mi inqaaj wihʼik chi ramigo i Dios, naqabʼanam ahaʼ wilik iraaj i reh. Reʼ Santo Laj Huuj irukʼuhtaaj chajariik iraaj noq iruqʼor: «Reʼ naa aʼnam i hat, reʼ chi naa ayohleem wach i Dios chi naa animan taqe i rukʼuhbʼaal ruum reʼ reʼ rukʼul chi naa aʼnam» (Eclesiastés 12:13).

•   Chupaam taqeh qʼiij chalik reh, noq reʼ Dios narusacham wach i tiʼ kʼaxik eh noq naruyeʼem i juneliik kʼacharik keh taqeh ramigo —reʼ korik wach kikʼux—, narojiik eloq wach chi manlik chajariik iraaj i Dios keh taqeh kʼachareel (Salmo 37:10, 11).