Maʼchih taj. Reʼ Santo Laj Huuj maʼ iruqʼor ta chi mahk i tumiin, ni xata iruqʼor chi chuʼnchel taqeh kʼaxkilal kichalik ruum i tumiin. Wilik jenaj qʼorik iruqʼor: «Ruum i tumiin inchalik chuʼnchel taqeh tiʼ kʼaxik», eh reʼ taqeh kʼachareel inkikapaaj chi reʼ taqeh qʼorik wilih ehsamaj taqeh pan Santo Laj Huuj. ¿Xa reʼ laʼ, mi korik i wilih? Maʼ jeʼ ta reʼ. Reʼ Santo Laj Huuj iruqʼor: «Reʼ rukʼaxariik wach i tumiin raaʼ risil chuʼnchel i yiibʼ wach naʼojbʼal» (1 Timoteo 6:10, qeh taqeh qʼeq). a

•  ¿Chajariik iruqʼor i Santo Laj Huuj chi riij i tumiin?

•  ¿Chaaj woʼ reet yohbʼaal chi ne inqakʼax wach i tumiin

•  Chaaj woʼ reet holohik chi ne inqabʼan iruqʼor i Santo Laj Huuj

•  Reʼ taqeh naʼojbʼal iruyeew i Santo Laj Huuj chi riij i tumiin

 Reʼ Santo Laj Huuj iruqʼor chi mi inqakoj chi korik i qatumiin ne qojrutobʼeej eh ne inkamanik pan qakʼachariik (Eclesiastés 7:12). Reʼ Santo Laj Huuj holohik wo’ inqʼorik chi riij taqeh kʼachareel reʼ inkibʼan i yeʼooj eh inkitobʼeej i tokoom ruukʼ i kitumiin (Proverbios 11:25).

 Xa reʼ laʼ, iruqʼor woʼ qeh chi maʼ na ta rojiik i qakʼux chi riij i tumiin. Pan Hebreos 13:5 iruqʼor: «Maakʼax taq wach i tumiin. Chʼiklik-oq la taq akʼux ruukʼ chibʼih jariik i wilik taq aweh». ¿Chajariik ne inqatijej ruukʼ taqeh qʼorik wilih? Reʼ tumiin inkamanik xa reʼ laʼ, maʼ na ta qayeʼem chi peet pan qakʼachariik. Reʼ ko ruman reʼ chi suq oq qakʼux ruukʼ taqeh aajwaal wach pan qakʼachariik: je rukabʼ i qawaʼ qahaaʼ, qasooʼ eh qapaat (1 Timoteo 6:8).

 Reʼ ajkʼaxal wach bʼehomal maʼ na ta rukʼulum i juneliik kʼacharik (Efesios 5:5). Peet, ruum chi reʼ rukʼaxariik wach i bʼehomal jenaj wach ruukʼ i loqʼinik tyoox (Colosenses 3:5). Eh rukabʼ, ruum chi reʼ inkikʼax wach i tumiin wilik pech inkibʼan i yiibʼ wach reʼ maʼ imponik ta chuwach i Dios reh rureqariik i tumiin. Jeʼ woʼ, pan Proverbios 28:20 iruqʼor chi, «awach i xa reʼ bʼehomal i rukʼax wach naa ruyeʼariik chutojariik i ru mahk». Mareh reʼ inkikʼax wach i tumiin ne inkichuk qʼorik, ne inkiʼan ileqʼ, ne inkelqʼaaj jenoʼ kʼachareel oon ne inkibʼan kansanik xa ruum i tumiin.

 Eh atoobʼ ta maʼ inqabʼan jenoʼ mahk, reʼ rukʼaxariik wach i tumiin ne irukʼam cho tokoom chik qakʼaxkilal. Reʼ Santo Laj Huuj iruqʼor: «Awach taqe inkaaj bʼehomrik maʼ inkikuy taj i pajarik, inkiqʼebʼ kiibʼ ruum rukʼaxariik wach iraaj maʼ raaj bʼanarik, reʼ injotʼwik keh i tinamit» (1 Timoteo 6:9).

 Mi juneliik inqayeew ruloqʼil irukapaaj i Dios eh maʼ inqabʼan taj i yiibʼ wach reh rureqariik tumiin, hoj looqʼ chuwach eh ne insuqbʼik rukʼux quukʼ. Miʼ inqayeew laʼ qakʼux chi rubʼanariik iraaj i Dios, reʼ reh jeʼ wilih iruqʼor qeh: «Reʼ hin maʼ jaruuj naa nukanaam atoobʼjiik. Eh maʼ naa ta woʼ kaat nuqʼebʼem cha wutkeel». (Hebreos 13:5, 6). Eh iruqʼor qeh chi «awach i korik wach rukʼux naa ruyeʼariik runimaal wach» (Proverbios 28:20).