Hooʼ, ko ruman. Ruum chi reʼ Dios iraaj chi reʼ taqeh kʼachareel ne inkimol kiibʼ reh ruloqʼjiik wach. Reʼ Santo Laj Huuj iruqʼor: «Inchol woʼ qasikʼim chi riij nikʼ wach rutoʼariik qiibʼ naa qaʼnam chi qawach, reh chi neenqakʼax qiibʼ, eh jeʼ woʼ rubʼanariik i otobʼil chi qawach. Eh manqakanaaʼ taq i rumolariik qiibʼ chulooqʼjiik i Dios» (Hebreos 10:24, 25).

 Reʼ Jesús xukʼuhtaaj chi reʼ taqeh rajtahqaneel na naq kiwihʼik pan jenaj molaabʼ tuslik wach noq xuqʼor: «Eh wilaʼ kʼul taq xakʼax awiibʼ chawach, chuʼnchel i tinamit naa kikojom rehtaal chi hat taq waj tahqaneel» (Juan 13:35). Reʼ taqeh rajtahqaneel i Jesús ne naq inkikʼuhtaaj i kʼaxooj wilih mi xiwihʼik naq kuukʼ i kuch nimaneel. Reh rubʼanariik i wilih ko ruman naq chi nakimolom kiibʼ reh ruloqʼjiik wach i Dios (1 Corintios 16:19). Reʼ wilih na naq rubʼanam chi ne kiwihʼik pan jenaj wach kʼuxliis chi jun suut i akʼal (1 Pedro 2:17).

Maʼ manlik ta xa ruukʼ rumolariik qiibʼ pan jenoʼ nimanik

 Reʼ Santo Laj Huuj iruqʼor chi reʼ taqeh kʼachareel nakimolom kiibʼ reh ruloqʼjiik wach i Dios. Xa reʼ laʼ, reʼ Santo Laj Huuj maʼ iruqʼor ta chi manlik xa ruukʼ rumolarik qiibʼ pan jenoʼ nimanik. Ko ruman laʼ chi ne inqakoj pan qakʼachariik. Jenaj ehtalil, reʼ Santo Laj Huuj iruqʼor: «Reʼ i xti korik laj nimanik i maʼ xta ruchʼuwaʼiil wach chuwach i Ajaabʼees Dios reʼ wili: Kitoobʼjiik i wilkeebʼ pantiʼ kʼaxik, chi jeʼ maʼ xta kituut kajaaw, chi jeʼ ixoq kamnaq kibʼahiil, eh reʼ chi maʼ nee ta inchʼuwaʼresjik iibʼ ruukʼ i yiibʼ wach naʼojbʼal imbʼaan wach akʼal» (Santiago 1:27).