Maʼ chih. Noq xkil xtzʼihbʼjik cho najtir ruukʼ i tzʼihbʼamaj pan Santo Laj Huuj yuʼnaak xkʼutinik chi jenaj wach. Atoobʼ ta ikʼinaq chik kʼih taqeh haabʼ, xtzʼihbʼjik woʼ chik i tzʼihbʼamaj naq chik chuwach taqeh kamambʼal reʼ maʼ najt ta inkikuy.

 Kireqem kʼih taqeh tzʼihbʼ reh najtir reh i Santo Laj Huuj. Wilik juʼjun maʼ jenaj ta wach iruqʼor eh reʼreʼ irukʼuhtaaj chi reʼ taqeh ajtzʼihbʼ xkijotʼ kiibʼ. Ahaʼ wiiʼ xkijotʼ kiibʼ taqeh ajtzʼihbʼ maʼ nim ta wach eh maʼ rujal ta woʼ wach i aajwaal wach chi nabʼjik. Xa reʼ laʼ, xreqarik woʼ juʼjun qʼorik ahaʼ wiiʼ inkʼutinik chi xa xkaaj kijalam wach eh reʼ juʼjun xjaljik, kʼih haabʼ naq chik irukʼam noq kitzʼihbʼaam. Naqilom kiʼibʼ ehtalil.

1.   Pan juʼjun taqeh Santo Laj Huuj reh najtir inqareq taqeh qʼorik wilih inkan pan 1 Juan 5:7: «Ixibʼ i wilkeebʼ pan taxaaj kiqʼorik rubʼehel i wili: Reʼ Ajaabʼees Dios, reʼ ruQʼoral i Dios, eh reʼ i Santolaj Uxlabʼal. Eh xa jinaj wach inkiqʼor taqe ixibʼ wili». Xa reʼ laʼ, chupaam taqeh najtir tzʼihbʼ reh i ruqʼorbʼal i Dios maʼ inkan ta ar taqeh qʼorik reʼreʼ. Ko xkikoj chik ar. a Ruum aj reʼ, reʼ taqeh Santo Laj Huuj reh i qaqʼijil ne rubʼan chi ne inqakoj qakʼux kuukʼ ruum chi maʼxta woʼ chupaam.

2.   Reʼ rubʼihnaal i Dios inkan kʼih pech chupaam taqeh tzʼihbʼ reh najtir reh i Santo Laj Huuj, xa reʼ laʼ kʼih taqeh Santo Laj Huuj kijalam wach eh kikojom «Jaaw» oon «Dios».

 Ruukʼ i rukʼihaal chi tzʼihbʼ wilik quukʼ yuʼnaak maʼ kʼaxik ta runabʼjiik ahaʼ xkijotʼ kiibʼ taqeh ajtzʼihbʼ. b Noq inkitzʼir riij taqeh huuj wilih, ¿chajariik i kireqem? ¿Mi ne inqakoj qakʼux ruukʼ i tzʼihbʼimaj pan Santo Laj Huuj reʼ wilik quukʼ yuʼnaak?

•   Chi riij taqeh tzʼihbʼ pan hebreo (reʼ rubʼihnaleej Najtir Kʼuhbʼaal), reʼ ajkʼuhtaneel William Henry Green xuqʼor: «Chʼiklik qakʼux chi maʼxta chik jenoʼ huuj reh najtir ikʼsamaj pan tokoom qʼorbʼal chi manlik wach».

•   Reʼ ajtzʼirool riij Santo Laj Huuj Frederick Bruce xutzʼihbʼaaj i wilih chi riij taqeh xtzʼihbʼjik pan griego oon Akʼ Kʼuhbʼaal: «Reʼ taqeh ehtalil wilik reh xtzʼihbʼjik reh i Akʼ Kʼuhbʼaal [...] xti kʼih chuwach taqeh ehtalil wilik reh taqeh ajtzʼihbʼ reh najtir, reʼ maʼ ajwach ta ne iruqʼor chi chukuj qʼorik xkitzʼihbʼaaj».

•   Reʼ Sir Frederic Kenyon, jenaj ajtzʼirool riij taqeh tzʼihbʼ reh i Santo Laj Huuj xuqʼor chi jenoʼ kʼachareel «ne ruchop i Santo Laj Huuj pan qʼabʼ eh maʼ ne ta inyoʼjik ruqʼorariik chi reʼ i wilik pan ruqʼabʼ reʼ ruqʼorbʼal i Dios, ikʼsamaj pan tokoom qʼorbʼal chi manlik wach, atoobʼ ta ikʼinaq chik kʼih haabʼ».

•   Reʼ taqeh ajtzʼihbʼ judío eh reʼ taqeh xitzʼihbʼanik reh i Santo Laj Huuj xkikanaaʼ pan ruqʼorbʼal i Dios noq reʼ rutinamiit ximahkunik (Números 20:12; 2 Samuel 11:2-4; Gálatas 2:11-14). c Eh xkitzʼihbʼaaj woʼ chi reʼ Dios maʼ xponik ta chuwach noq reʼ rutinamiit maʼ xinimanik ta, eh maʼ xkitzʼap ta wach juʼjun taqeh naʼojbʼal reʼ inkinimaj taqeh winaq (Oseas 4:2; Malaquías 2:8, 9; Mateo 23:8, 9; 1 Juan 5:21). Noq xkitzʼihbʼaaj chi korik i ruqʼorbʼal i Dios, reʼ taqeh ajtzʼihbʼ xkikʼuhtaaj chi korik wach kikʼux eh chi looqʼ naq chi keh i ruqʼorbʼal i Dios.

•   ¿Maj ne inqaqʼor chi reʼ Dios xubʼan, chi reʼ ruqʼorbʼal maʼ xsahchik ta wach? (Isaías 40:8; 1 Pedro 1:24, 25). d Reʼ reh maʼ xuqʼor ta chi xa keh taqeh kʼachareel reh najtir ne inkamanik i ruqʼorbʼal. Xraaj laʼ woʼ chi ne inkamanik qeh i hoj yuʼnaak (1 Corintios 10:11). «Eh chuʼnchel i qʼorik xtzʼihbʼjik cho pan santo laj huuj najtir tiijbʼal qeh noq xkanabʼjik. Eh yuʼnaak ar chik inqareq rukowiil qakʼux chunimjiik i Jesucristo, eh i rusuqbʼisaj woʼ qakʼux chi ruyubʼjiik i naa qakʼulum» (Romanos 15:4).

•   Reʼ Jesús eh taqeh rajtahqaneel xiqʼorik chi riij taqeh xtzʼihbʼjik woʼ chik reh xtzʼihbʼjik pan hebreo, eh maʼ nikʼ ta xikapebʼinik chi riij mi manlik wach oon maʼ manlik ta wach i ruqʼorbʼal i Dios (Lucas 4:16-21; Hechos 17:1-3).