Noq xpahqaljik keh taqeh i kʼijool ar Estados Unidos mi inkibʼan naq kitiij chuwach i Dios, reʼ i 80% xkiqʼor chi inkibʼan, xa reʼ laʼ xa yeʼjaal keh inkibʼan rajlaal i qʼiij. Mareh juʼjun inkikapaaj: «¿Mi inkamanik ta woʼ i tiij xa reʼ chi suq ne inwikʼraaj wiibʼ?».

•  ¿Pan korik chajariik woʼ i tiij?

•  ¿Mi kiribʼiraj ta woʼ i Dios?

•  ¿Chajariik ne irubʼan chi ne inupahqaj pan nutiij?

•  Reʼ inkiqʼor i juʼjun taqeh kʼijool

 Reʼ i tiij jenaj qʼorik ruukʼ i Jehová, reʼ rutzʼuhkrisam chuʼnchel. ¿Chajariik iraaj ruqʼorom i wilih? Atoobʼ ta reʼ reh qʼeʼ nim chi qawach, «maʼ najt ta wilik quukʼ i hoj chi qajuʼjunaal» (Hechos 17:27). Reʼ i Santo Laj Huuj iruqʼor laʼ qeh: «Chajil taq i koq awiibʼ ruukʼ i Dios reʼ reh nee taq inwihik awuukʼ» (Santiago 4:8).

 ¿Chajariik naʼabʼanam reh chi ne inajil awiibʼ ruukʼ i Dios?

•   Chabʼan atiij. Jeʼ reʼ ne tiqʼorik ruukʼ.

•   Chatijej chi riij i Santo Laj Huuj. Jeʼ reʼ aqʼorobʼjik irubʼan i Dios.

   Jeʼ reʼ noq reʼ i tiij eh reʼ rutzʼirariik pan i Santo Laj Huuj ne tirutobʼeej reh chi ne tiwihʼik chi ramigo i Dios.

 Reʼ i Jeremy iruqʼor: «Reʼ qʼorik ruukʼ nimlaj Dios qʼeʼ looqʼ. Jenaj kooch ruyeʼem keh i kʼachareel».

 Reʼ i Miranda iruqʼor: «Noq inuqʼor reh i Jehová nikʼwach inwikʼraaj wiibʼ, inwikʼraaj chi inujil wiibʼ ruukʼ».

 Atoobʼ ta awehtʼal chi wilik jenaj Dios eh inabʼan atiij chuwach, mareh inaq’or ¿mi kiribʼiraj ta woʼ i Dios? Mareh kʼaxik rukapebʼjiik chi tirubʼiraj. Pan korik tirubʼiraj. Reʼ i Santo Laj Huuj iruqʼor chi riij i Dios «Reʼ hat inabʼiraj i qatiij» (Salmo 65:2). Iraaj laʼ chi ne inaqʼor reh chuʼnchel i tirukoj chi kapebʼenik. ¿Chaaj woʼ reet? Ruum chi reʼ i Dios iraaj awach (1 Pedro 5:7).

 Chakapaaj chi riij i wilih: ¿Xa tiqʼorik na kuukʼ awamigo? Jeʼ woʼ reʼ chabʼan ruukʼ i Dios. Tiqʼoroq woʼ ruukʼ eh chakoj i rubʼihnaal, Jehová (Salmo 86:5-7; 88:9). Reʼ Santo Laj Huuj iruqʼor aweh xa eliik chabʼan atiij chuwach (1 Tesalonicenses 5:17).

 Reʼ i Moises iruqʼor: «Reʼ i tiij kirutobʼeej reh chi ne kinqʼorik ruukʼ i Wajaaw wilik pan taxaaj eh irubʼan woʼ hoq chi ne inuqʼor reh chuʼnchel i wilik pan wanima».

 Reʼ i Karen iruqʼor: «Inuqʼor reh i Jehová re’ xti aajwaal wach jeʼ rukabʼ inubʼan ruukʼ i nutuut eh ruukʼ taqeh wamigo».

 Reʼ i Santo Laj Huuj iruqʼor: «Chuʼnchel laʼ taq chayeew pan qʼabʼ i Dios panatiij. Eh cha pahqaaj taq i rotobʼil i Dios chatʼiosej taq reh i rubʼan taq chaawuukʼ» (Filipenses 4:6).

 ¿Iraaj na ruqʼorom i wilih chi ne tiqʼorik ruukʼ chi riij taqeh akʼaxkilaal? ¡Hooʼ! Reʼ i Santo Laj Huuj iruqʼor qeh: «Chakanaaʼ pan qʼabʼ i QaJaaw Dios chuʼnchel i tiqaaj wiiʼ kapeew reʼ reh neentoobʼinik aweh» (Salmo 55:22).

 Xa reʼ laʼ maʼ na ta aqʼorik ruukʼ xa chi riij woʼ taqeh akʼaxkilaal. Jenaj qʼaxooq Chantelle irubʼihnaal iruqʼor: «Maʼ hin ta naq ramiga i Jehová mi xa inwaaj nupahqaam nutoʼbʼaal reh. Re’ i peet ne inqabʼan re’ rutyooxjiik reh i Dios ruum chuʼnchel iruyeʼew qeh eh wilik kʼih i ne irubʼan chi ne inqatyooxeej reh».

 Chakapaaj chi riij i wilih: ¿Chajariik inawaaj atyooxeem reh i Dios? Chakapaaj chi riij ixibʼ chi naʼojbʼal oon xa chi jariik inawaaj atyooxeem reh i Jehová.

 Reʼ i Anita iruqʼor: «Atoobʼ ta maʼ nim ta wach, mareh noq inawil jenaj kʼisa uhtzʼubʼ ne inawaaj atyooxeem reh i Jehová».

 Reʼ i Brian iruqʼor: «Tikapebʼinoq chi riij i jenaj chi versículo imponik chawach oon tikapebʼinoq chi riij i rutzʼuhkrisam i Dios re’ xti qʼeʼ imponik chawach. Chi riij i re’, ne irubʼan chi ne i natyooxeej reh ruum i wilih».