Chakoj rehtaal chajarik inkʼuljik noq inawil i kʼoyomal pan Internet. Pan korik, reʼ rilariik i kʼoyomal pan Internet iruchʼuwaʼrisaj wach i xukorsaj wach i Dios, chi jenoʼ winaq neʼ inwihʼik ruukʼ jenoʼ ixoq. Noq inareq chi riij i wilih, neʼ tirutobʼeej reh chi ne inawixowaaj wach i yiibʼ wach (Salmo 97:10).

 Chakapaaj chi riij i kʼaxkilal naʼakʼulum. Rilariik i kʼoyomal pan Internet irujotʼ i kikʼachariik inkibʼan i wilih eh jeʼ woʼ i kiʼilwik reh. Reʼ Santo Laj Huuj iruqʼor chi «reʼ i wilik runaʼojbʼal i rukoj rehtaal ahaʼ wilik yohbaʼal, i rukotej riij» (Proverbios 22:3).

 Chakoj akʼux chi rubʼanariik i wilih. Chabʼan jeʼ rukabʼ i Job, reʼreh xuqʼor: «Reʼ hin xnuqʼor i xti korik chi maʼ naa ta nukʼaxam kiwach i kokʼ qaʼhxoq» (Job 31:1). ¿Wilik naak jenoʼ naʼojbʼal inawaaj abʼanam i hat? Ne irubʼan chi ne inabʼan i wilih:

•  Mawil Internet mi awutkeel.

•  Chatzʼap Internet mi kʼahchiʼ rukʼuhtaam cho i yiibʼ wach.

•  Tiqʼoroq ruukʼ jenoʼ awamigo wilik runaʼojbʼal.

 Tiqʼoroq ruukʼ i Jehová chi riij i wilih. Jenaj i xutzʼihbʼaaj i Salmo xupahqaaj reh i Jehová Dios: «Chawesaj i naqʼnuwach chinaah i xamaʼ xta rukʼam chaloq» (Salmo 119:37). Reʼ i Dios tiraaj rutobʼeem, eh miinabʼan atiij chuwach, ne iruyeew awansil (Filipenses 4:13).

 Tiqʼoroq ruukʼ jenoʼ kʼachareel wilik runaʼojbʼal. Reh chi ne tiʼelik korik chupaam i kʼaxkilal wilih tiqʼoroq ruukʼ jenoʼ awamigo wilik runaʼojbʼal (Proverbios 17:17).

 Kʼoʼloq pan akʼux: Noq’ inaq’or chi ma’ inawaj ta chik awilom i yiib’ wach pan Internet, ti’elik korik chupaam i wilih. Chaqʼor i wilih pan atiij eh chatyoxeej reh i Jehová chi xatrutobʼeej. Chakapaaj chi riij i suqkiil kʼuxliis narikʼraam i Jehová mi maʼ inawil i yiibʼ wach pan Internet (Proverbios 27:11).