Reʼ i wilih iraaj ruqʼorom rutaqʼabʼjiik taqeh qʼorik, foto eh video chi riij i kʼoyomal pan mensaje. Jenaj kʼijool xuqʼor: «Reʼ wilih inkibʼan chuʼnchel taqeh kʼachareel yuʼnaak. Inatoqʼaaʼ rukʼulariik eh rutaqʼabʼjiik taqeh mensaje, eh chi riij i reʼ inataqʼaaj eh inakʼul taqeh foto ahaʼ wiiʼ tʼusulkaat.»

 Chupaam jenaj artículo reh i The New York Times iruqʼor chi, wilik taqeh kʼijool inkikapaaj chi, «mi wilik jenaj foto reh i kuchʼihil chi tʼuslik pan kicelular, reʼ wilih irukʼuhtaaj keh taqeh tokoom chi inkisuqkileej i wihʼik pan kʼoyomal». Iruqʼor woʼ: «Reʼ wilih jeʼ jenaj ehtalil reh i tzʼubʼuuj wach kalaq». Jenaj qʼahxoq xuqʼor chi rubʼanariik i kʼoyomal pan celular «maʼ irukʼam ta kʼaxkilal» ruum chi «maʼ tikahnik ta wach kʼacharik eh maʼ ne ta inareq ayabʼilaal».

 Wilik woʼ taqeh kʼijool kiqʼorik chi riij i kʼoyomal pan celular ruum i wilih:

•   Inkikapaaj chi maʼ kʼaxik taj i qʼuninik iibʼ ruukʼ i wilih.

•   Inkikʼul jenaj foto eh inkikapaaj chi ko ruman «chi ne inkitaqʼaaj woʼ jenaj i keh».

 Noq inataqʼaaj xa chajariik pan celular, inaqʼahsaj pan kiqʼabʼ chuʼnchel. ¡Eh reʼ hat maʼ awehtʼal ta chajariik ne inkiqʼor chawiij ruukʼ i xataqʼaaj! Jenaj aj ilol reh i kʼaxkilal wilih, reʼ inkamanik chupaam i Centro de Investigación Pew iruqʼor chi «yuʼnaak maʼ kʼaxik ta chik rujohsjiik xa chajariik keh taqeh i tokoom».

 Chakoj rehtaal chajariik xkʼuljik kuukʼ juʼjun taqeh kʼijool i xkijohsaj i kifoto chi tʼuslik taqeh:

•    Xkitaqʼaaj i foto wilih keh taqeh i kamigo reh chi ne inkiseʼlaaj.

•    Reʼ i ruchʼihil naq xutaqʼaaj i foto keh chuʼnchel ruum chi maʼ kuchʼihil ta chik kiibʼ.

 ¿MI AWEHTʼAL NAQ I WILIH? Rutaqʼabʼjiik i kifoto taqeh kʼijool qʼahxoq pan teléfono chi tʼusulkeebʼ taqeh, pan juʼjun taqeh yeʼaabʼ xkiqʼor chi reʼ wilih irujotʼ taqeh halakʼun. Eh xqʼorarik chi wilik taqeh halakʼun inkibʼan i naʼojbʼal wilih.

 Reʼ Santo Laj Huuj irukʼuhtaaj, chi maʼ reʼ ta jenaj mahk mi jenaj winaq eh jenaj ixoq kibʼanam chik kaxaro ne kiwihʼik kikabʼcheel (Proverbios 5: 18). Xa reʼ laʼ, iruqʼor qeh chi maʼ ne ta kojqʼehbʼik pan kʼoyomal. Qatzʼir riij juʼjun taqeh versículo:

•    «Eh maʼ rukʼul taj chi nee taq inakʼutjaaj aweh kʼoyomal, i xa chibʼih chik jariik chi chʼuwaʼ wach naʼojbʼal. [...] Maaqʼor taq aweh i kʼixbʼilaal chi qʼorarik. Moʼ-oq awach taq aweh i xa teheeh wach chuqʼorariik i memil laj qʼorik. Eh moʼ-oq awach taq aweh inqʼorik yiibʼ wach.» (Efesios 5:3, 4.)

•    «Reʼ taq i hat, cha kanaaʼ taq rubʼaan i yiibʼ wach naʼojbʼal. Ma aʼn taq chik i kʼoyomal, jeʼ woʼ i chʼuwaʼ wach chi bʼanarik, jeʼ woʼ xa chibʼih jariik iraaj maʼ raaj bʼanarik, jeʼ woʼ rubʼaan i yiibʼ wach chi bʼanarik.» (Colosenses 3:5.)

 Reʼ taqeh versículo wilih inkiqʼor chi «reʼ kʼoyomal» maʼ holohik taj (reʼ kʼoyomal, reʼ noq jenaj winaq eh jenaj ixoq maʼ kaxaro ta taqeh kʼacharik inkibʼan kikabʼcheel), iruqʼor woʼhoq chi maʼ ne ta inqabʼan «i chʼuwaʼ wach chi bʼanarik» eh i «xa chibʼih jariik iraaj maʼ raaj bʼanarik». Reʼ i chʼuwaʼ wach chi bʼanarik yiibʼ wach eh irujotʼ awamigohiil ruukʼ i Jehová. Eh reʼ i xa chibʼih jariik iraaj maʼ raaj bʼanarik iraaj ruqʼorom reʼ rotowjiik i kʼoyomal, eh reʼ wilih ne tirukʼam chi rubʼanariik jenoʼ naʼojbʼal yiibʼ wach. Maʼ jenaj ta mahk chi kiʼibʼ chi kʼachareel ne inkaaj wihiʼk kikabʼcheel mi kaxaro chik taqeh.

 Chakapaaj chi riij i wilih:

•   ¿Chaj woʼ reet qʼorik chi riij i kʼoyomal pan celular jenaj «chʼuwaʼ wach bʼanooj»?

•   ¿Ne naa inaqʼor chi reʼ wilih ne irubʼan chi ne inawaaj abʼanam i kʼoyomal?

•   ¿Inqaqʼor naak chi rilariik oon rutaqʼabʼjiik jenoʼ foto reh jenoʼ kʼachareel tʼuslik ne tirujotʼ? ¿Chaj woʼ reet inakapaaj chi jeʼreʼ?

 Reʼ taqeh versículo wilih neʼ qojrutobʼeej reh runabʼjiik chaj woʼ reet maʼ na ta qabʼanam i wilih.

•    «Eh xti cha chop akʼux chi korik chi neenakʼuhtaaj chuwach i Dios chi hat atoobʼlaj raj kamanoom, eh moʼ-oq chih kʼisinoq neetikʼixik wiiʼ». (2 Timoteo 2:15.)

•    «Chibʼih reet noq maʼ nee taq ti kʼacharik pan santohiil i hat ¿Chibʼih reet noq maʼ nee taq i nayeew ruloqʼil i Dios?» (2 Pedro 3:11.)

 Reʼ taqeh texto wilih inkikʼuhtaaj chi ko ruman rubʼanariik i holohik. Mi inabʼan ahaʼ wilik irupahqaaj aweh i Dios eh maʼ inayeew ta qʼabʼ reh i nawotowaaj, maʼ ne ta inamin awiibʼ pan kʼaxkilal eh maʼ ne ta tirujotʼ akapebʼaal (Gálatas 6:7).

 Chakapaaj chi riij i wilih:

•    ¿Nikʼwach i nunaʼojbʼal?

•    ¿Inukapaaj naa taqeh tokoom?

•    ¿Inwaaj naa nubʼanam jenoʼ naʼojbʼal i ne iruyeew rutiʼkiil kikʼux taqeh tokoom?

•    ¿Nikʼwach ne irujotʼ i nukʼachariik qʼorik chi riij i kʼoyomal pan celular?

•    Mi reʼ nutuut wajaaw inkehtʼaliij chi kʼahchiʼ nubʼanam i wilih, ¿mi ko ne inkikoj kikʼux wuukʼ?

 REʼ XKʼULJIK «Jenaj wamiga wilik naq jenaj runovio chi maʼ awach ta rehtʼal. Reʼ wamiga xutaqʼaaj jenaj rufoto chi tʼuslik, eh jeʼ woʼ reʼ xubʼan i kʼijool. Ko majaaʼ woʼ naq inikʼik kiʼibʼ qʼiij noq reʼ rajaaw xrilow taqeh i rumensaje. Xrilow chuʼnchel eh qʼeʼ xtibʼik rukʼux. Noq reʼ rajaaw xupahqaaj reh i rixqʼuun chajariik xubʼan, reʼ reh xuqʼor chuʼnchel. Wehtʼal chi reʼ wamiga xureq chi riij chi maʼ holohik ta xubʼan, xa reʼ laʼ, reʼ rutuut rajaaw majaaʼ inikʼik i rutiʼkiil kikʼux. maʼ kehtʼal taj mi ne woʼ chik irubʼan chi ne inkikoj kikʼux ruukʼ.»

 Pan korik: Qʼorik chi riij i kʼoyomal pan celular jenaj chʼuwaʼ wach bʼanooj. Reʼ wilih maʼ iruyeew ta ruloqʼil akʼachariik. Jenaj xqʼun xqʼorik chi riij kʼoyomal pan celular ruukʼ i runovio iruqʼor: «Chʼuwaʼ chik inwikʼraaj wiibʼ, eh maʼ suq ta chik nukʼux».

 Mi inabʼan i yiibʼ wach naʼojbʼal wilih, ne inamin awiibʼ pan kʼaxkilal ruukʼ i Dios, kuukʼ taqeh awamigo, ruukʼ atuut awajaaw eh kuukʼ taqeh aj qʼatal qʼorik. Ruum chabʼan i inkiqʼor taqeh naʼojbʼal wilih:

•   «Jeʼ reʼ noq reʼ hat, maa aʼn aweh i mahk inki aʼn taqe kʼijolaq.» (2 Timoteo 2:22.)

•   «Eh chawesaj i naqʼnuwach chinaah i xamaʼ xta rukʼam chaloq», oon i maʼ holohik taj (Salmo 119:37).

 Chakoj pan akʼachariik i ruqʼor i Santo Laj Huuj. Chakoj rehtaal i xukʼul i Janet eh chachih wach chajariik naq ne inabʼan i hat.

 «Jenaj q’iij xnunab’eej wach jenaj k’ijool, eh xqik’saj i qanúmero chi qawach. Xa jenaj xamano xik’ik eh k’ahchi’ naq chik rupahqaam chi ne inutaq’aaj reh jeno’ foto aha’ wii’ t’usulkiin.» (Janet)

 ¿Chajariik naq xubʼan i Janet? ¿Chajariik naq xabʼan i hat?

•  PEET. Xutaqʼaaj naq reh. Mareh ne inaqʼor chi reʼ wilih maʼ mahk taj, ruum chi noq tiʼooj chi muux maʼ kʼih ta woʼ asoʼ inakoj.

•  RUKABʼ. Rutaqʼabʼjiik reh juʼjun taqeh foto ahaʼ wiiʼ maʼ maas ta tʼuslik. Mareh ne inakapaaj chi ko majaaʼ inareq chi riij chajariik iraaj i kʼijool.

•  ROOX. Rujuxariik i mensaje. Mareh inakapaaj eh inareq chi riij chajariik kʼahchiʼ rupahqaam i kʼijool.

 ¿Maj korik chi ne naq inachih i roox naʼojbʼal? Wilik ruwiiʼ noq reʼ Santo Laj Huuj iruqʼor chi «reʼ i wilik runaʼojbʼal i rukoj rehtaal ahaʼ wilik i yohbʼaal, i rukotej riij. Eh reʼ i maʼ xta runaʼojbʼal, maʼ rukoj ta rehtaal, ko qʼehbʼinaq chik ar noq irikʼraaj» (Proverbios 22:3).

 Wilik pech reʼ kʼaxkilal wilih inwihʼik, ruum chi jenoʼ maʼ iruchih ta wach chi korik taqeh ramigo. Wilik taqeh kʼachareel ne inkibʼan chi ne inabʼan i maʼ holohik taj. Raj i hat, ¿mi inachih wach chi korik taqeh awamigo (Proverbios 13:20.) Jenaj qʼahxoq Sara i rubʼihnaal iruqʼor: «Tiwihʼoq kuukʼ taqeh i holohik i kinaʼojbʼal». Reʼ Delia iruqʼor: «Wilik taqeh amigo maʼ tikitobʼeej ta chi rubʼanariik i holohik, inkibʼan laʼ chi ne inabʼan jeʼ rukabʼ inkibʼan i keh. Xa reʼ laʼ, mi inkibʼan i maʼ imponik ta chuwach i Dios eh reʼ hat tiwihʼik kuukʼ, mareh reʼ hat ne woʼ inabʼan i maʼ holohik taj. ¿Maj korik chi reʼ hat maʼ inawaaj ta abʼanam i reʼ?».