Maʼ chih taj.

 Pan korik reʼ inkikul i wilih xa ikʼik irubʼan.

 Jeʼ reʼ xureq chi riij i Lisette, reh wilik 16 haabʼ reh. Reʼ reh irukʼax naq wach jenaj xqʼun. Reʼ reh iruqʼor: «Noq kʼahchiʼ naq qatijem chi riij i kitiʼjolal taqeh kʼachareel, xnutijej chi noq ko hoj kʼijool qʼahxoq, reʼ qatiʼjolal ko reʼ kʼahchiʼ rukorsam riibʼ. Maʼ rehtʼal ta chajarik iraaj. Mi reʼ taqeh kʼijool qʼahxoq kehtʼal ta naq nikʼwach inkamanik i kitiʼjolal ne naq inkireq chi riij chi reʼ inkikʼraaj xa junkʼaam eh maʼ ne ta naq imponik chi kiwach wihʼik chi winaq ixoq taqeh».

 Xa reʼ laʼ, ¿inakapaaj naak chi reʼ inawikʼraaj maʼ na ta chik rikʼiik? ¿Inakapaaj naak chi reʼ Dios maʼ holohik taj i runaʼojbʼal ruum chi irupahqaaj aweh chi maʼ ne ta inabʼan i raaj atiʼjolal?

 Mi xaqʼor chi hooʼ reh i pahqanik wilih, ko ruman chi ne inanabʼeej chi reʼ kapabʼenik wilih maʼ holohik taj. Chi xa na woʼ abʼanam chajarik iraaj atiʼjolal. Reʼ Dios rehtʼal chi manlik nikʼwach inkamanik i kitiʼjolal taqeh kʼachareel. Reʼ Santo Laj Huuj iruqʼor chi, mi inkaaj, ne irubʼan chi ne inkikuy kiibʼ (Colosenses 3:5).

 Reʼ iruqʼor i Santo Laj Huuj maʼ kʼaxik taj. Iruqʼor laʼ chi jeʼ reʼ naq naqabʼam chi qunchelaal, atoobʼ ta ixoq winaq taqeh oon maʼ chih taj. «Chaqʼeb taq chi riij akʼux i koyomal» (1 Corintios 6:18). Kʼih taqeh kʼachareel inkaaj kikʼamam naah i kʼuhbʼaal wilih, inkibʼan chuʼnchel wilik pan kiqʼabʼ reh chi maʼ ne ta kiqʼehbʼik pan mahk, atoobʼ ta kiʼikʼik pan pajarik. Jeʼ reʼ noq, reʼ taqeh inkaaj wihʼik kuukʼ i kuch winaq, ne irubʼan chi suq kikʼux mi inkinimaj i rukʼuhbʼaal i Jehová Dios (Deuteronomio 30:19).