Reʼ taqeh testigo reh Jehová kiʼibʼ pech inkimol kiibʼ chuwach i xamaano chupaam taqeh yeʼaabʼ Salones del Reino i kibʼihnaal. ¿Chaaj woʼ jariik inkibʼan ar? ¿Nikʼwach ne tirutobʼeej mi tiponik chupaam taqeh moloj iibʼ reʼreʼ?

•  ¿Chajariik inkibʼan pan jenaj Salón del Reino?

•  ¿Chaaj woʼ reet ko ruman chi ne tiʼoj ar?

•  Reʼ inkiqʼor juʼjun taqeh kʼijool

 Reʼ Salón del Reino jenaj yeʼaabʼ ahaʼ wii imbʼan i tijinik. Ar inyeʼarik kʼih i naʼojbʼal chi riij i Santo Laj Huuj. Reʼ taqeh i moloj iibʼ imbʼan ar ne tirutobʼeej chi:

•   Ne inatijej i korik chi riij i Dios.

•   Rureqariik chi riij i kʼahchiʼ rukʼulariik pan qaqʼijil.

•   Holohik anaʼojbʼal.

•   Ne inareq taqeh awamigo.

 ¿Mi awehtʼal naq i wilih? Reʼ taqeh yeʼaabʼ ahaʼ wiiʼ inkimol kiibʼ taqeh testigo reh Jehová, Salones del Reino inqʼorarik keh, ruum chi ar kiqʼorik chi riij i runimaal rajaawriik i Dios (Mateo 6:9, 10; 24:14; Lucas 4:43).

 Reʼ inkiqʼor ar ne tirutobʼeej. Reʼ taqeh naʼojbʼal intzʼirarik riij pan kiyeʼaabʼ taqeh testigo reh Jehová ne tirutobʼeej reh chi ne inareq anaʼojbʼal (Proverbios 4:5). Reʼ i wilih iraaj ruqʼorom chi reʼ i Santo Laj Huuj ne tirutobʼeej reh chi ne inachih chajariik na’abʼanam pan akʼachariik. Inqʼorik woʼ chi riij taqeh i juʼjun chi pahqanik jeʼ rukabʼ:

•   ¿Chaaj woʼ reet wilkooj ayuʼ?

•   ¿Iraaj ta woʼ i Dios chi ne inqakʼul i tiʼ kʼaxik?

•   ¿Chajariik inkʼularik noq jenoʼ inkimik?

 Reʼ wilih i kibʼihnaal i juʼjun taqeh kʼuhbʼaal inyeʼarik pan moloj iibʼ reh i rukuxik i xamaano:

•   ¿Chaaj wo ʼreet naqakanam chi reʼ i Santo Laj Huuj ne irukʼam qabʼeeh?

•   ¿Ajwach ne qojrutobʼeej noq tiʼ qakʼux?

•   ¿Chajariik kʼahchiʼ rubʼanam i rajaawriik i Dios pan qaqʼijil?

 Reʼ Brenda iruqʼor: «Jenaj wuchʼihil pan escuela xponik pan jenaj moloj iibʼ. Xtzuhnik ruukʼ i nufamilia. Xqayeew reh jenaj reh i qahuuj. Chi riij i reʼ xuqʼor weh chi xponik chuwach xkiqʼor taqeh i kaʼchareel noq xkibʼan taqeh i pahqanik. Xuqʼor woʼ hoq chi pan ruʼiglesia maʼxta taqeh kamambʼal jeʼ rukabʼ wilik qeh i hoj».

 ¿Mi awehtʼal naq i wilih? Reʼ okikʼ pan jenoʼ Salón del Reino maʼ intojarik ta eh maʼ jaruuj impahqaljik tumiin.

 Reʼ taqeh kʼachareel ne inanabʼeej kiwach ar ne inkiyeʼew rukowiil akʼux. Reʼ i Santo Laj Huuj iruqʼor chi jenaj ruwiiʼ chi inkimol kiibʼ i ajnimaneel reh ruyeʼariik rukowiil kikʼux chi kiwach (Hebreos 10:24, 25). Chupaam i akʼal wilih, ne iruyeʼew rukowiil akʼux wihʼik kuukʼ taqeh kʼachareel inkiyeʼew kikʼux chi riij i Dios eh chi riij taqeh i tokoom.

 Reʼ Elisa iruqʼor: «Noq inikʼik i qʼiij wilik pech tiʼ nukʼux eh hin qʼuhteel. Xa reʼ laʼ reʼ ikiponik pan Salón del Reino inkibʼan chi suq nukʼux. Noq kinelik cho pan moloj iibʼ eh kimponik pan nupaat suq chik nukʼux».

 ¿Mi awehtʼal naq i wilih? Chi jun suut i akʼal wilik 120,000 chi molaabʼ keh taqeh testigo reh Jehová eh xiik naah chi 60,000 chi yeʼaabʼ reh moloj iibʼ. Chuwach i haabʼ inkikorsaj 1,500 chi yeʼaabʼ reh moloj iibʼ, ruum chi kʼahchiʼ rukʼihik wach taqeh kʼachareel kiponik pan taqeh yeʼaabʼ reh moloj iibʼ. a