¡NAʼLIK OQ AWACH!
2022: Jenaj haabʼ reh kʼaxkilal—¿Chajariik iruqʼor i Santo Laj Huuj?
Pan 2022, xqabʼiraj rubʼiral chi riij taqeh qʼaqʼinik, kʼaxkilal ruukʼ tumiin eh taqeh kowlaj teew eh jabʼ. Chi riij chuʼnchel i kʼahchiʼ rukʼulariik xa reʼ woʼ i Santo Laj Huuj ne iruqʼor qeh.
Reʼ korik kʼahchiʼ rukʼulariik pan haabʼ 2022
Chuʼnchel i kʼahchiʼ rukʼulariik chupaam i haabʼ wilih irukʼuhtaaj chi kʼacharik chik inqabʼan pan «rukuxiik taqeh qʼiij» reʼ iruqʼor i Santo Laj Huuj (2 Timoteo 3:1). Reʼ kʼaxkilal wilih xtohqʼik cho pan haabʼ 1914. Chakoj rehtaal chi reʼ kʼahchiʼ rukʼulariik irukʼam riibʼ ruukʼ iruqʼor i Santo Laj Huuj chi na naq rukʼulariik pan qaqʼijil:
«Qʼaqʼinik (Mateo 24:6).
«2022: Reʼ haabʼ ahaʼ wiiʼ i qʼaqʼinik xwihʼik woʼ chik ar Europa» a
Chawil i naʼojbʼal «Reʼ Rusia iruchop naah i Ucrania».
«Wiʼjaleel» (Mateo 24:7).
«2022: Jenaj haabʼ xnimbʼik wach i wiʼjaleel». b
Chawil i naʼojbʼal «Reʼ qʼaqʼinik ar Ucrania irubʼan chi reʼ wiʼjaleej kʼahchiʼ rukʼihiik wach».
«Maʼ kʼisa yabʼilaal» (Lucas 21:11).
«Inkʼutinik woʼ chik wach i yabʼilaal polio ruʼihbaal, inkʼihik wach i kiyowabʼjik ruukʼ i viruela reh i mono eh reʼ COVID-19 ko kʼahchiʼ woʼ runihem riibʼ, chuʼnchel i wilih irukʼuhtaaj chi yohbʼaal taqeh yabʼilaal reʼ inkinihej kiibʼ eh chi reʼ kʼachareel maʼ kow ta». c
Chawil i naʼojbʼal «Waqiibʼ millón xikimik ruum i COVID».
«Xa chibʼih jariik inaakikʼuhtaam cho kiibʼ ti yoʼjoq kuum» (Lucas 21:11).
«Korik chi maʼ ajwach ta ne insahchik pan rukʼux chi reʼ haabʼ 2022 xti tzʼaʼ woʼ chik i qʼiij, xwihʼik woʼ taqeh yeʼaabʼ ahaʼ wiiʼ xchiqik i haʼ, elel qʼaaqʼ eh elel haʼ. Reʼ taqeh kʼaxkilal wilih rukansam kʼihaal chi kʼachareel chi jun suut i akʼal eh rubʼanam chi kʼih kikanaam i kiyeʼaabʼ». d
Chawil i naʼojbʼal «Reʼ i rutzʼaʼiil i qʼiij».
«Tukinik iibʼ ruum peleto» (Lucas 21:9).
«Reʼ taqeh tinamit kʼahchiʼ kikaqriik ruum i kʼaxkilal ruum tumiin ruum chi chuʼnchel kʼahchiʼ rujohtiik tzʼaaq. Chuʼnchel i wilih irubʼan chi reʼ taqeh inkibʼan i wolik ruukʼ taqeh kitaqʼaniik xti kow wach pan haabʼ 2022». e
Chawil i naʼojbʼal «Injohtik tzʼaaq chuʼnchel».
¿Chaaj woʼ jariik narukʼulariik pan haaʼ chalik reh?
Maʼ ahaʼ ta wach inabʼinik reh i narukʼulariik pan haabʼ 2023. Xa reʼ laʼ qehtʼaliim chi maʼ najt ta chik iraaj chi reʼ Runimaal Rajaawriik i Dios jenaj taqʼanik pan taxaaj narukʼamaam taqeh cho i jalooj chi naah i wach akʼal (Daniel 2:44). Reʼ taqʼanik wilih narusacham wach i qakʼaxkilaal eh narubʼanam i rajwaam i Dios ayuʼ wach akʼal (Mateo 6:9, 10).
Inqayeew rukowiil akʼux reh rukʼamariik naah i naʼojbʼal xuyeew i Jesús chi naʼlik oq qawach reh rilariik chi reʼ qʼorooj cho rubʼiral kʼahchiʼ rojiik eloq wach chi jun suut i akʼal (Marcos 13:37). Chakuy tiqʼoroq quukʼ reh runabʼjiik kʼisiin oq chik chi riij nikʼwach ne tirutobʼeej i Santo Laj Huuj eh nikʼwach ne iruyeew kuyʼinik afamilia eh jeʼ woʼ i hat reh jenaj kʼacharik holohik.
a AP News, «2022 Was Year the Horror of War Returned to Europe», xutzʼihbʼaaj i Jill Lawless, 8 reh diciembre reh 2022.
b Programa Mundial de Alimentos, «Una crisis alimentaria mundial».
c JAMA Health Forum, «Living in an Age of Pandemics—From COVID-19 to Monkeypox, Polio, and Disease X», xutzʼihbʼaaj i Lawrence O. Gostin, JD, 22 reh septiembre reh 2022.
d Earth.Org, «What’s Behind the Record-Breaking Extreme Weather Events of Summer 2022?» xutzʼihbʼaaj i Martina Igini, 24 reh octubre reh 2022.
e Carnegie Endowment for International Peace, «Economic Anger Dominated Global Protests in 2022», xutzʼihbʼaaj i Thomas Carothers eh i Benjamin Feldman, 8 reh diciembre reh 2022.