¡NAʼLIK OQ AWACH!
2023: Wihʼoq quyʼinik—¿Chajariik iruqʼor i Santo Laj Huuj?
Yuʼnaak xtohqʼik i haabʼ 2023, chi qunchelaal inqaaj i holohik chi qeh eh jeʼ woʼ keh i qafamilia. ¿Chaaj woʼ reet i hoj holohik inqil i kʼacharik?
Reʼ Santo Laj Huuj iruyeew quyʼinik
Reʼ Santo Laj Huuj iruqʼor qeh taqeh holohik qʼorik. Iruqʼor chi reʼ kʼaxkilal qojikʼik wiiʼ yuʼnaak narusachariik wach. Iruqʼor woʼ chi chuʼnchel i tzʼihbʼamaj pan Santo Laj Huuj «tiijbʼal qeh noq xtzʼihbʼjik, reh chi ruukʼ i rikowiil eh i chʼikinbʼal qakʼux reʼ iriyeew i Looqʼ laj Huuj wihʼoq ta rinimaal quyʼiniik chi juneliik» (Romanos 15:4, RLLH).
Mi inawaaj anabʼeem kʼisinoq chik chi riij taqeh irubʼehsaj i Dios pan Santo Laj Huuj, chawil i naʼojbʼal «La esperanza real de un mañana mejor».
Jenaj uyʼinik ne irubʼan chi ne qojrutobʼeej yuʼnaak
Reʼ quyʼinik wilik pan Santo Laj Huuj «jeʼ rikabʼ jinoʼq ankla chi reh i qánima» (Hebreos 6:19, RLLH). Reʼ uyʼinik wilih iruyeew rukowiil qakʼux, qojrutobʼeej reh ikʼik chupaam taqeh kʼaxkilal, irubʼan chi suq qakʼux eh chi inqakʼax wach i kʼacharik. Chawil juʼjun ehtalil:
Chanabʼeej nikʼwach i uyʼinik wilik pan Santo Laj Huuj xutobʼeej jenaj winaq reh elik chuwach i bʼanaj haʼ. Chawil i video «Xinqʼuhtik naq chik reh i nukʼachariik».
Chakoj rehtaal nikʼwach i uyʼinik iruyeew i Santo Laj Huuj qojrutobʼeej noq inkimik jenoʼ inqaaj wach. Chawil i video Toobʼal keh i tiʼ kikʼux ruum chi xkimik ajwach inkaaj wach.
Jenaj uyʼinik iruyeew rukowiil qakʼux
Kʼih taqeh kʼachareel inkuyʼeej chi reʼ kʼacharik ne injaljik xa reʼ laʼ maʼ chʼiklik ta kikʼux chi jeʼ reʼ ne inkʼuljik. Ruukʼ i Santo Laj Huuj maʼ jeʼ ta reʼ inkʼuljik. ¿Chaaj woʼ reet? Ruum chi reʼ taqeh iruqʼor i Santo Laj Huuj reʼ i Jehová inqʼorik reh, a reʼ Dios «maʼ inchukwik ta qʼorik» (Tito 1:2). Xa reʼ woʼ reh wilik rajaawriik reh rubʼanariik chuʼnchel taqeh irubʼehsaj, ruum chi reʼ reh «nikʼ nimaal iraaj, inbʼanarik ruʼuum» (Salmo 135:5, 6, RLLH).
Reʼ hat ne irubʼan chi ne inakoj akʼux ruukʼ i uyʼinik iruyeew i Santo Laj Huuj. Inqayeew rukowiil akʼux chi rajlaal qʼiij ne inatijej riij i ruqʼorbʼal i Dios tzʼihbʼamaj pan santo laj huuj reh chi ne inakowej akʼux (Hechos 17:11). ¿Mi ne naq imponik chawach tijinik chi riij i Santo Laj Huuj chi siih? ¡Chakapaaj rubʼanariik i holohik pan haabʼ wilih 2023!
a Jehová i rubʼihnaal i Dios (Salmo 83:18, TNM).