Reʼ kʼaxkilal kʼahchiʼ rukʼuljiik ar Ucrania irukʼuhtaaj chi reʼ taqeh kʼamal bʼeeh reh i maʼ manlik ta nimanik inkiqʼor chi ne inbʼaan i qʼaqʼinik. Chakoj rehtaal nikʼwach kitoobʼinik pan qʼaqʼinik:

•   «Inqaaj qatyooxeem keh eh looqʼ chi qeh taqeh qajqʼaqʼineel reʼ inkikoʼleej i kitinamiit Ucrania ahaʼ wiiʼ xiʼasjik, pan kiqʼabʼ taqeh ixowaneel . . . Juneliik na taq kaat qatobʼeem, naqabʼanam qatiij taq chawiij» (Metropolitano Epifanio peet reh Kiev, reh i The Jerusalem Post, 16 reh marzo reh  2022.

•   «Reʼ domingo wilih, reʼ kʼamal bʼeeh reh i iglesia Ortodoxa Rusia xubʼan jenaj mixa pan kibʼihnaal taqeh soldado aj Rusia ahaʼ wiiʼ xuyeew rukowiil kikʼux reh chi ne inkikoʼleej i kitinamiit ‹jeʼ rukabʼ i kichol rubʼaan i aj Rusia› eh reʼ tinamit Moscú kʼahchiʼ rumolom wach taqeh rusoldado reh qʼaqʼinik ar Ucrania» (Reuters, 3 reh abril reh 2022).

 ¿Mi ne irubʼan chi ne kiʼooj taqeh ajnimaneel chi qʼaqʼinik? ¿Chajariik iruqʼor i Santo Laj Huuj?

 Reʼ Santo Laj Huuj iruqʼor chi ajwach kitahqanik reh i Jesús maʼ ne ta irubʼan chi ne kiʼooj chi qʼaqʼinik.

•   «Chamol qohoq achʼihchʼ parupaat, ruum chuʼnchel i kikansanik ruukʼ chʼihchʼ, ruukʼ woʼ chik chʼihchʼ naa kikanteesjiik i keh» (Mateo 26:52).

   Mi jenoʼ kʼachareel inooj pan qʼaqʼinik oon iruyeew i rutobʼaal reh, ¿ne na inaqʼor chi kʼahchiʼ rukʼamaam naah i xuqʼor i Jesús?

•   «Reʼ hin i nuqʼor taq aweh i jinaj i akʼ kʼuhbʼaal wili, reʼ chi kʼul taq cha kʼax awiibʼ chawach. Nikʼ wach noq ti nukʼax taq i hin, jeʼ woʼ reʼ inchol taq aʼnam i hat kʼul taq cha kʼax awiibʼ chawach. Eh wilaʼ kʼul taq xakʼax awiibʼ chawach, chuʼnchel i tinamit naa kikojom rehtaal chi hat taq waj tahqaneel» (Juan 13:34, 35).

   ¿Kʼahchiʼ na rukʼuhtaam i kʼaxooj xuqʼor i Jesús reʼ narukʼuhtaam chi manlik ajnimaneel?

 Mi inawaaj anaʼbeen ruman i wilih, chawil i huuj «El cristianismo y la guerra: ¿son compatibles?»

 ¿Korik na chi reʼ taqeh ajnimaneel maʼ ne ta irubʼan chi ne inkimin kiibʼ chupaam taqeh qʼaqʼinik yuʼnaak? Korik. Pan Santo Laj Huuj qʼorooj naq chik rubʼiral chi pan qaqʼijil reʼ rubʼihnaleej «pan rukuxiik taqeh qʼiij» nakiwihʼiik kʼachareel reh reh wach i kitinamiit «maʼ naa ta chik kitijem i qʼaqʼinik» reʼ wilih irukʼam riibʼ ruukʼ i xukʼuhtaaj i Jesús (Isaías 2:2, 4, ruman).

•   Reh runabʼjiik kʼisinoq chik chi riij i wilih chawil wach i huuj La Atalaya «¿Qué piensa Dios de las guerras?»

 Maʼ najt ta chik iraaj chi reʼ Jehová a reʼ Dios reh i tuqkilal narukojom i runimaal rajaawriik reh rukoʼljiik taqeh kʼachareel «chuwach i yiibʼ wach minooj taqe wiiʼ. Eh jeʼ woʼ chuwach taqe i tiʼ kʼaxik» (Filipenses 4:9; Salmo 72:14).

•   Reh runabʼjiik nikʼwach narubʼanam, chawil i video ¿Chajariik i runimaal Rajaawriik i Dios?