¡NA’LIK OQ AWACH!
¿Chaaj woʼ reet yohb’aal wach i ixowanik?—¿Chajariik iruq’or i Santo Laj Huuj?
Pan taq noticia xa chi riij wo’ i ixowanik iib’, i kansanik, i yiib’ wach na’ojb’al eh q’aq’inik k’ahchi’ keeb’ chi q’orik.
«Ruum i q’aq’inik reh i tinamit Israel ruuk’ i tinamit Gaza eh eh re’ taqeh inkitob’eej i wilih, pan taq noticia xa chi riij wo’ ixowanik iib’ k’ahchi’ keeb’ chi q’orik» (The New York Times, 15 reh noviembre reh 2023).
«Pan 7 reh octubre, xqilow chi ruuk’ i kib’anooj eh i inkiq’or taqeh k’achareel inkik’uhtaaj chi re’ ixowanik iib’ k’ahchi’ ruk’ihiik» (Dennis Francis, ajk’amal b’eeh reh i molaab’ Naciones Unidas, 3 reh noviembre reh 2023).
Re’ ixowanik iib’, re’ yiib’ wach eh re’ q’aq’inik ma’ ak’ ta. Re’ Santo Laj Huuj inq’orik chi riij taqeh i «xa q’as chik i ju’ kaaq’ chi q’orik, xa je’ chik q’aslaj ch’ihch’» eh taqeh imponik chi kiwach i q’aq’inik eh taqeh imponik chi kiwach rub’anariik i yiib’ wach (Salmo 64:3; 120:7; 140:1) Atoob’ ta je’re’, re’ Santo Laj Huuj iruqʼor chi reʼ ixowanik iibʼ inqil pan qaqʼijil wilik irukʼuhtaaj qeh.
Reʼ ixowanik iibʼ—Reʼ wilih irukʼuhtaaj qeh pan jarik qʼijil wilkooj wiiʼ
Reʼ Santo Laj Huuj irukʼuhtaaj qeh kiʼibʼ ehtalil chi riij chaaj woʼ reet wilik ixowanik iibʼ pan qaqʼijil.
1. Reʼ wilih ruqʼorom naq chik chi naruponiik i qʼiij chi «ma’ k’isiin taqe inaakikanaam ruk’axariik taqe i tokoom» (Mateo 24:12). Reʼ taqeh kʼachareel maʼ na ta naq kikʼaxam kiibʼ, na laʼ naq kikʼuhtaam ruukʼ i kibʼanooj chi nakixowaam kiibʼ chi kiwach (2 Timoteo 3:1-5).
2. Reʼ yiibʼ wach eh reʼ ixowanik iibʼ inqil irukʼuhtaaj i ruyiibʼ wach naʼojbʼal i Ajyahm. Reʼ Santo Laj Huuj iruqʼor chi «re’ i kib’anik reh i mahk sut i wach ak’al, re’ i aj Yahm wilik rajaawriik chikinaah» (1 Juan 5:19; Apocalipsis 12:9, 12).
Xa reʼ laʼ, reʼ Santo Laj Huuj irukʼuhtaaj chi reʼ Dios narusacham wach i irubʼan chi ne inwihʼik i ixowanik iibʼ. Iruqʼor woʼ, chi narusacham wach chuʼnchel taqeh kʼaxkilal rukʼamam cho i wilih. Reʼ Santo Laj Huuj iruqʼor:
Reʼ Dios «naa rujuxwiik reh chu’nchel i riis naq’ kiwach. Eh ma’ naa ta chik rilariik wach i kimik, ni xata oq’ik, ni xata ti’kiil k’uxliis. Eh ma’ xta chik ti’ naa ruk’ulariik chuwach i Dios, ruum chu’nchel i wilik naq cho najtir xsahchik kiwach» (Revelación 21:4).